２歲檢查又肥佬呀

2008年4月25日(星期五) 天陰多雲、間中有陽光

今日要同朗豬返健康院，主要係跟進佢嘅語言表達能力，與及身高體重增長是否合比例。
朗豬當日所量度嘅身高係91.4cm, 體重係14.2kg(31.2lb)，結果顯示朗豬嘅身高同體重，都係97線附近嘅加大碼，無超重之餘仲啱晒比例忝 >>> so, passed

其實我自己都會定期同朗豬度下身高架，睇番朗豬1歲至2歲嘅身高紀錄，就可以見到朗豬通常每個月都會增高1cm，但每當佢有發燒嘅月份，就會增高1.5cm，所以一年計計埋埋就高咗14.5cm喇。

其次就係測試語言表達能力，姑娘攞咗一本書仔出黎比朗豬睇，跟住就講一d物件名稱，要朗豬喺本書仔度指番個物件出黎，大慨問咗10樣，朗豬指啱咗7-8樣，之後姑娘問朗豬識講d乜，咁我就講比姑娘知，朗豬識講：爸爸、媽媽、姐姐、嫲嫲、伯伯、姨姨、哥哥、弟弟、妹妹、大巴士、波波、波波池、mom mom、包包，咁姑娘就話，朗豬識講嘅嘢只係叠字，而一般2歲小朋友，應該識講一d詞語，同簡單嘅動詞或容易詞 >>> so, failed

姑娘話朗豬2歲半要再返健康院，跟進語言表達能力嘅進度，如果到時都未可以達到水平，就要約見醫生，哇下....原來咁大劑架，咁朗豬真係要加把勁講嘢至得喇!!!!!

2歲牛一喇

2008年4月22日(星期二) 天陰多雲

眨下眼又到朗朗豬2歲牛一喇!! 同往年一樣, 今年生日都無乜特別節目, 只係普普通通一家人咁過, 但由於嫲嫲同各位伯伯叔叔, 都想同朗朗豬一齊食下疍糕, 所以我地特別安排喺月頭嘅一次家庭聚會中, 舉行咗一個既簡單又隆重嘅食餅儀式, 等大家一齊高興下, 個疍糕仲係大頭一手包辦, 又靚又好味道, 大頭今次真係抵讚呀!!



除咗食疍糕, 當日嘅重頭節目係同朗豬去泳池游水, 朗朗豬對住d水水, 又驚又喜又愛又恨, 一時之間都唔知點表達, 而我同大頭更加意想不到, 朗豬喺呢種充滿矛盾衝擊嘅心情之下, 佢個樣係好滑稽又好可愛架。

小企鵝嬉水記

2008年4月6日 (星期日) 陽光普照, 夏日我愛你

朗朗豬第一次落水玩, 原來佢好細膽又好驚落水呀! 無論我地點鼓勵佢&陪佢一齊玩, 佢都好怕怕唔敢落水, 當佢一見到爸爸在水中央, 就好緊張好怕爸爸會有事, 係咁要拉番爸爸上水, 真係好攪笑!! 佢全程最enjoy就係玩波波。

嬉水記之一

嬉水記之二

嬉水記之三

嬉水記之四

嬉水記之五

朗朗豬好鐘意著住大拖鞋行草地, 見到蝴蝶仔fly~fly~, 仲想玩樸蝶忝呀!!!

廸欣湖一天遊

2008年3月30日(星期日) 天陰、潮濕、有霧

今日我地一家三個黃，約埋幾個同事朋友，中午喺青衣城集合兼食餐飽飽，然後就浩浩蕩蕩一行幾人，向今次嘅目的地“廸欣湖”進發。

我地先搭東涌線再轉廸士尼線，到廸士尼站再轉乘巴士，全程大慨25分鐘就到達廸欣湖喇。廸欣湖嘅面積比我想像中大，綠化環境和配搭也很簡潔，主要是以廸欣湖為中心點，而圍繞湖邊則有一條平坦石路，既可供遊人漫步、又可供租用單車行駛，而石路兩旁配置大量植物和草地，供遊人休息和嬉戲。

我已經好耐無見過咁多幅草地喇，而且仲可以事無忌憚咁行上去，真係覺得又興奮又舒服，特別係朗豬，佢一見到草地就好開心飛奔過去，於是我地就搵咗一幅面積較大又比較平坦嘅草地，比朗豬盡情跑、盡情high草，我地喺草地上玩肥皂泡吹波波，朗豬就好興奮好開心咁跑足全場，跑至汗流浹背、全身濕晒都唔願停，最後係大頭同大鼻都倦到唔識郁，先再起程慢慢行番起步點；跟住比朗豬發現仲有一個兒童遊樂場，於是佢就不惜一齊耗盡謹餘精力，喺回程車途上一伏上大鼻嘅膊頭，唔洗30秒就呼呼入睡，從朗豬沉睡中的笑容，就知道他仍在夢鄉中回味著愉快的一天。

嘰哩咕嚕嘈嘈閉

2008年3月28日(星期五) 天陰多雲有微雨

踏入3月份開始，朗豬就開始多聲氣喇，依家除咗最多講嘅爸爸、媽媽、姐姐(de de)之外，仲已經學識講嫲嫲、伯伯、阿哥、弟弟、拜拜、mom mom、奶奶、曳曳、大巴士，而且仲成日口翕翕學唱歌仔，又講一ｄ無人明嘢ｂｂ話，講完仲自己同自己笑，成隻傻豬豬咁。

朗豬仲會好主動大大聲叫媽媽、爸爸、de de同佢一齊玩，例如一齊玩遊戲＆睇報紙、一齊唱歌＆拍手、一齊彈彈跳＆打波踢球等等，所以每有朗豬嘅地方，都會變得好熱鬧好嘈嘈閉，想靜下都難！！依家朗豬嘅模仿能力明顯比以前強，好鐘意學大人嘅舉動，特別係爸爸做嘅舉動，時常會即時模仿，呢排就最鐘意學人撓起雙手放喺胸前，又成日偷偷地著媽媽或爸爸嘅大拖鞋，喺屋企行來行去。

朗豬嘅聲線比我想像中幼嫩＆傻氣＆驕嗲，我覺得佢嘅聲線特別可愛＆趣緻，呢ｄ應該係媽媽嘅主觀偏見卦！！依家每當我同大頭聽到朗豬叫媽媽、爸爸，都會覺得好窩心又好冧滋滋，唔知呢種感覺會維持幾耐呢？？一個簡簡單單嘅“媽媽、爸爸”稱呼，就已經可以令我地如沐春風，一個鍚咀咀嘅啜啜，更可以令我地甜到漏，究竟邊隻至係真正嘅傻豬豬呢可？！？！

捧捧鎚打扑扑齋

2008年3月25日 (星期二) 上旋一球, 後抽一球, 左扑扑右扑扑

第一張證件相

2008年1月26日 (星期六) 氣溫驟降, 得番11-12度又濕又凍, 終於都似冬天喇

朗豬到依家都仲係"無證人仕", 除咗出世紙之外, 乜嘢證件都未攞架。

大鼻今日終於啲起心肝, 準備好一d小工具, 就喺屋企同朗豬影咗第一批証件相。原本諗住要花好多時間, 先可以百中抽一咁挑選到幾張好dd嘅, 點知果日朗豬好合作又好有狀態喎, 只係用咗十幾分鐘, 就可以影到幾張四四正正嘅相喇, 係咪好靚仔呢??!!??!!

希望可以襯住新年有幾日假期, 得閒同朗豬去攞定d証件先, 遲少少我哋一家三個黃, 就可以出去週圍碌下反下luu......

無言的憧憬

朗豬依家認到幾個公仔圖案

朗豬想出街街, 會自己揹起mi姐姐送嘅袋, 然後走去門口度.......

一如以上短片所見，朗豬直至現在仍然未肯開口說話，有意識嘅說話，目前仍然停留於爸爸、媽媽、姐姐、嫲嫲四個稱呼，大約喺兩三個星期前，曾經講過“da巴dee” & “da 的dee”，發音類似是“大巴士” & “搭的士”，但講咗一個星期左右又無講喇。於是乎有一日，大鼻忽發奇想咁問大頭，朗豬會唔會好似我地偶像歐樂民咁，到三歲先開始說話呢？唔通………！！！

區樂民係一位專科醫生，又係一位業餘專欄作家，我同大頭都好喜歡睇佢嘅作品，喺每一本區樂民嘅作品，都有一個作者簡介：『區樂民，廣東省增城縣人。六十年代在番港廣華醫院出生，屬難產，先見腳後見頭。三歲還未說話，家人以為是出世時缺氧悶壞了腦袋，自此不存厚望，只盼望將來能自力更生；真至第一次開口叫爸爸，父親喜極而泣，母親劏雞還神。』

刹那間，大頭和大鼻都充滿憧憬，眼光中滲出無限希冀。

眨下眼又過07年

2007年12月28日(星期五) 天晴暖和, 今個冬季不太冷

眨眼間07年就快過去lu, 只剩下四日就到08年; 年紀越大覺得時間越過得快, 自從有咗朗豬之後, 時間過得比以前更加快, 簡直就好似開咗turbo咁。

今年聖誕節我哋一家三口下午去街街, 夜晚去Zoe屋企開Party, 下晝先去行九龍公園睇雀仔、睇噴水池, 之後由尖沙咀搭船到中環, 呢次係朗豬第一次搭船船, 全個船程朗豬都目不轉睛, 既新奇又興奮, 佢眼珠仔不停咁轉不停咁望, 當佢見到周圍都係水水、四圍都有船船, 就好雀躍咁手指指。另一方面, 佢嘅眼神又充滿疑惑, 好似好唔明白, 點解無端端四圍都係水水, 又四圍都有咁多船船嘅呢??????



當短短嘅船程結束之後, 佢喺碼頭見到自己剛搭過嘅船離開, 就即時充滿離愁別緒嘅傷感, 依依不捨咁不斷"噢~~噢~~啊~~啊~~"以下有相為証, 一睇佢個樣就知道, 佢當時係幾咁愁眉深鎖兼望穿秋水呀.....

1歲8個月大的喜好

2007年12月16日(星期日) 天晴, 唔凍又唔熱, 咁嘅天氣好多人病呀
朗豬1歲8個月大, 近排至鐘意玩嘅遊戲&玩意, 排名不分先後 :-
1) 聽歌仔, 依家會跟住歌仔做動作, clap your hand, jump up and down, turn around.......

2) 玩車仔玩具, 呢個玩具係近排先學識點玩, 之前一路未識點放正架車仔喺路軌度

3) 睇報紙期間, 見到洗髮水廣告, 跟住做動作, 洗頭頭, 洗手手, 洗耳仔, 擦牙牙.....

4) 睇報紙, 依家朗豬每日都要揭報紙睇, 每次喺報紙上見到認識嘅野, 都會手指指, 特別一見到有萬寧, 八達通, 7-11, 惠康, 百佳, 就會好雀躍又呱呱叫

唔識講野又超重....failed

07年11月5日 (星期一) 天氣清涼, 秋意正濃

今日同朗朗豬返健康院, 做歲半檢查和發展監測評估, 結果係 :-
體重13.2kg (29lb) - 有小小超重, 姑娘話驚佢會變肥仔, 需要跟進
叠積木仔 - passed. 好快就可以做到, 仲玩咗好多次忝
聽別人指示 - passed. 姑娘問朗朗豬邊個係mami, 佢即刻指住我
講說話 - failed. 姑娘問朗朗豬問題, 佢只係識得指住d野, 然後發出"吚""呀""噢""啊"嘅音, 咁姑娘就問我, bb平時識得講乜野呀, 我答佢淨係識叫爸爸, 媽媽, 姐姐同mom mom咋. 於是姑娘就話又需要跟進
進食及介片 - passed. 現時表現良好, 但要開始續漸提升佢嘅自理能力, 例如自己用匙根"不"飯仔食, 自己穿着或除掉衫褲鞋襪, 介片、自己去厠所及洗手等等

由於有二個項目failed和需要繼續跟進, 朗朗豬2歲時要再返健康院check多一次, 我依家至驚係朗朗豬遺傳咗我嘅肥胖血統呀, 希望佢只係大隻仔而唔係肥仔啦~~~

足歲半大

2007年10月28日(星期日) 初秋時份, 清爽宜人

不經不覺就踏入初秋季節, 依家嘅天氣好舒服, 清清涼涼又有小小太陽温暖, 真係出外郊遊嘅好時機, 我地一家三口都襯住咁難得嘅好天氣, 今個月去咗九龍公園玩, 同去參觀嘉道理農場, 經過呢兩日嘅郊遊, 我發覺朗朗豬比以前進步咗, 一來無咁怕生保同怕羞, 佢會主動走去小朋友堆度一齊玩, 二來係每當朗朗豬見到一d認識嘅野, 例如 : 肥豬仔、雞仔、雀仔、龜仔、魚魚、花花草草、水水等等嘅野, 都會好快用手指指住, 然後係咁吚吚呀呀話比我地知佢嘅發現, 如果我地唔啋佢, 佢會越叫越大聲又哇哇嘈, 真至我地聽到同回應佢為止, 認真長氣架。

初秋季節去九龍公園, 氣候舒適又有活動空間, 真係一個舒展身心嘅好去處, 園內仲有好多唔同品種嘅雀仔/鳥類, 又可以玩肥皂泡吹波波, 至開心仲有兒童遊樂場, 等朗朗豬可以玩餐飽...yeah!!!!

遊樂場玩珠仔, 去片 >>>


玩滑梯之一, 去片>>>


玩滑梯之二, 去片 >>>

玩到倦..兩手fig fig遊走樂園, 去片 >>>

朗朗豬剛滿歲半大, 佢嘅身高同體形都比較大隻仔, 個樣又比較老積, 同佢出街時常會比其他人, 以為佢已經二歲至三歲大。今朝早我第一次同佢去圖書館, 我地喺兒童圖書閣入面, 一齊坐定定睇圖書睇咗20分鐘, 之後就喺兒童圖書閣入面周圍行, 佢對圖書館嘅環境及圖書及電腦都充满好期, 仲有小朋友撩佢傾計&一齊睇書忝。 體重29磅, 85cm高, 腳板仔15cm。

16隻牙仔喇

2007年9月

朗豬喺呢一個月裡面, 噼嚦拍拍係咁出牙, 短短個零月就出齊幾隻牙, 依家佢總共有16隻牙仔喇, 以佢現時嘅成長階段嚟計, 佢應該算係出齊晒牙, 我諗要到2歲以後, 先至會出埋剩餘嘅4隻大臼齒.

隨住朗豬出牙嘅同時, 佢嘅生活習慣同飲食習慣亦跟着改變, 佢依家嘅午餐會食粉麺一碗, 晚餐會食爛飯仔一碗, 早晚一定會飲一大支奶, 至於下午茶, 有時會飲半支奶, 有時會飲維他奶加麺飽或餅仔, 再加半個水果咁, 真係一日五餐, 餐餐不同, 所以呢, 依家抱佢上手, 真係啖啖肉又好重手下架.

朗豬平時喺屋企時, 係非常活躍好動, 又時常有好鬼靈精主意, 佢好鐘意整估我地, 又鐘意做一d不合乎規則嘅事情, 就連玩玩具亦會以唔正常嘅方法去玩, 我諗佢依家係另一個成長階段, 以及正在發展另一種思考方式. 至於講野方面, 暫時仲係毫無進展, 真係好期待聽到佢嘅bb話呀~~

同米奇遊車河, 去片 >>

見到冒險樂園就興奮, 去片 >>

傻下傻下玩襟襟, 去片 >>


我愛肥皂泡, 去片 >>

成長的驚喜

2007年8月28日(星期二) 天陰多雲有驟雨

朗豬一歲四個月大, 重量 : 28磅, 高度 : 83cm, 腳板仔 : 14cm, 係一個高頭大馬b。

雖然朗豬已經脫離嬰兒期, 但佢喺我哋心目中, 仍然係小bb一個, 呢個四支發逹頭腦簡單嘅小bb, 暫時仲未肯點講野, 但已經明顯有喜惡, 有主見, 有思考, 有部署, 有強烈的表達及理解能力, 絶對唔可以睇小佢嘅小宇宙。

佢好多時會喺你毫無預期之下, 突然給你驚喜, 無端端學大人嘅舉動, 學唱歌仔學跳舞, 學電單仔及救火車嘅聲, 學bb煲嘅水滾聲, 仲會識得喺雪櫃偷偷地攞維他奶, 然後即閃出廳, 仲會點媽咪唱佢鐘意聽嘅歌仔, 所以話, 生命處處都充滿驚喜, 真係無錯!!!!

扭紋柴之迷

2007年7月30日(星期一) 天晴炎熱, 日日都33度, 熱到爆燈




今個月我同大頭去咗一轉澳門, 我哋已經好多年無去過澳門lu, 近期澳門好旺場, 又多咗好多旅遊新景點, 所以我哋兩個都襯吓熱鬧, 四圍行行行!!! 隨處食食食!!! 肚腩漲卜卜就回程啦!!! YEAH~~~

朗豬上個星期開始, 突然變得好大皮氣, 又好爆燥, 仲時常會無情情扭一場大計, 扭紋程度前所未有, 我哋每日真係疲憊不堪又苦不堪言, 但我實在朝思夜想, 都百思不得其解, 點解佢一下子會變得咁曳曳呢????

尋日, 終於比我解開呢個迷喇!! 登登登櫈....朗豬出緊下面兩隻大牙呀, 朗豬依家已出上四下四, 八隻門口牙, 正在長出上面兩隻犬牙, 與及最新發現下面呢兩隻大牙, 夾夾埋埋一共12隻牙仔呀, 為咗呢兩隻大牙, 我哋辛苦d都無計啦......

此後的幾天, 即8月3日(星期五), 經過我嘅親手驗證, 發現下面嗰兩隻犬牙都出緊呀, 咁即係話, 上下四隻犬牙, 加下面兩隻大牙, 一共係六隻牙仔一齊出, 原來係因為同一時間出咁多隻牙仔, d牙肉好唔舒服、又痕又痛, 所以朗豬呢排先會又忟憎又扭紋又曳曳豬咋~~~

改名叫做粗魯豬

2007年7月15日(星期日) 天晴炎熱, 最高溫度34, 汗流浹背, 熱到爆炸

朗豬踏入15個月大, 開始學發音學講說話, 但暫時仍只識叫爸爸, 媽媽, 嫲嫲, 姐姐, mum mum 同 奶奶, 雖然我哋能夠聽到的只有以上幾個發音, 但我哋聽唔明嘅發音, 就有好多好多。

只要係喺屋企, 佢成日都會嘰呢咕嚕、吱吱喳喳又或者大叫大嚷, 最近, 就最鐘意大叫 "噢~~~" "哦~~~" 或者 "呀~~~" 而每次大叫嘅時候, 仲會出盡全身氣力, 撐到行咁向住你叫, 成個潮州怒漢咁, 所以我呢排, 己經同佢改名叫做"粗魯豬"。

party time.....去片 >>


如果你想保持至fit身材, 嚟朗豬舞蹈室學新創舞步吖, 結合猩猩、袋鼠、馬騮嘅舞步於一身, 自創一格。 自創舞步.....去片 >>


跳下跳下, 彈下彈下, 朗豬要做彈弓人!!! 彈弓人.....去片 >>


朗豬學揸大膽車, 佢一上車就好似頭文字D上身咁, 風馳電掣, 左片右片, 差D仲玩埋飄移忝.......
揸大膽車.....去片 >>

係電視蟲又係巴士迷

07年6月30日 (星期日) 天陰多雲, 時而狂風暴雨

唉!!! 又係一個落雨嘅假期天, 一連幾個星期嘅天氣都唔好, 一係曬到飛起熱到溶, 一係就狂風暴雨咁, 攪到我哋無得出街玩, 真係掃興呀!

無得出街玩嘅日子, 朗豬唯有留喺屋企騰嚟騰去, 攪下東又攪下西咁, 依家佢係百厭仔一名, 成日爬上爬落, 又鐘意將d野搬嚟搬去, 呢樣野可能係似大頭掛。

要數朗豬至愛活動, 不能不提嘅係睇電視, 佢無論做緊咩, 當一聽到廣告聲, 就即刻變成電視蟲, 見到電視有bb或者小朋友, 會即刻打hello hello手勢, 如果見到人哋拍手 、聽到唱歌或者聽到話好野好野咁, 都會即刻拍手仔。

朗朗豬係電視蟲...去片


另一樣朗豬嘅至愛, 就係睇巴士勒, 佢每日都要睇N咁多次巴士, 見親巴士會打hello同bye bye手勢, 有時仲會好興奮咁大叫話我哋知, 仲不時會流露出, 傾慕而又痴痴纏纏嘅眼神忝架

至愛大巴士.....去片

背水車身一星期

07年6月17日-23日 天晴, 炎熱, 氣溫高達33度
朗豬快要14個月大, 適逢這個星期二是端午節假期, 原本預定一家三口子, 可以輕鬆愜意的家庭樂幾天, 怎料一場突如其來的大戰, 一舜間已把我家圍堵, 當我家被殺氣騰騰、來者不善的入侵者重重包圍的時候, 我們仍茫然不知, 直至朗豬的脈搏奏起十面埋伏的樂曲時, 我才驚覺大戰竟在我們毫無準備下爆發了!!!

自從朗豬出世以後, 我一直都知道又熟悉、經常聽到、又經常被提醒, 嬰幼兒時期是經常會發高燒的, 以我亦自以為有足夠心理質數和心理準備, 跟這大敵隨時來個正面交鋒, 怎料敵軍在17日晚成功突襲, 並隨即肆無忌憚駐紮家中時, 我這才恍然大悟, 我的準備並不充裕啊。

朗豬持續在起初的3日2夜中, 發燒溫度一直在100至104度之間進進出出, 令我無時無刻都緊張兮兮, 之後敵方改變攻勢, 令朗豬腹痛肚瀉、嘔吐大作、拒絕進食幾天, 這時我每天的心情都幻得幻失, 心裡不時想着的都是作戰策略, 如何可以來一個俯底抽身、力挽狂瀾, 之後我痛定思痛, 給敵方來個迎頭痛擊, 其後朗豬又無言無故的, 在身上和面上長滿紅點紅疹, 這時我們已變得從容不迫、義無反顧, 我知道勝利就在眼前, 終於朗豬在24日康復了, 而我家也隨即恢復平靜閒適的生活。

經過這次背水車身的一役, 我己吸收到寶貴的經驗, 增長了處變不驚的能力, 而朗豬的戰績是出了上面兩隻犬齒, 與及高了1.5cm哩.

真係大個仔咗喎

2007年5月中 陽光普照, 天氣清爽

呢排嘅天氣非常好, 完全無以往回南天時嘅濕濕笠笠, 亦無又翳悶又焗熱嘅感覺, 我個人覺得咁嘅天氣, 真係正到不得了, 依家朝朝返工搭車時, 都會望下個天, 然後幻想自己去郊遊, 返工都返得開心d輕鬆d呀。

朗朗豬自從一歲生日之後, 真係大個仔咗好多咁, 佢開始識得點去玩玩具, 唔係一味放入口度, 佢開始有觀察力、專注力、模仿力同思考力, 會研究下件玩具要點玩法, 而佢呢排最鐘意玩嘅玩具係 :-

一) 一個可以放不用形狀方塊入去嘅立方體, 譬如抽到一個三角形嘅方塊, 就要搵番三角形嘅窿窿, 先可以放到入去咁, 個立方體共有12個不同形狀嘅方塊同窿窿, 呢個玩具又平又簡單又益智。
學玩立體方塊.....去片 >>


二) 玩書仔, 其實所有可以遏下遏下嘅野, 朗朗豬都鐘意玩, 特別係d硬皮嘅書仔就更加鐘意勒, 不過唔好以為佢係睇書喎, 佢只係鐘意用手指, 將本書左遏右遏咁咋。 本來想拍段朗朗豬睇書仔嘅短片嘅, 不過無意中拍到朗朗豬自己攞玩具玩, 玩完識得放番好喎, 佢咁乖仔嘅一次, 緊係要mark底佢啦....
至乖仔呢次.....去片 >>


三) 一個碌波波玩具, 呢個係大鼻買比朗朗豬嘅生日禮物, 初時砌起同佢玩時, 佢會好興奮咁衝埋黎, 拆散佢兼攪亂檔, 唔識得坐定或企定玩架, 但依家就唔同勒, 佢知道要坐定定, 先可以碌波波.....再去片 >>


四) 呢個game係朗豬最最最鐘意玩架勒, 就係同我哋响屋企追追逐逐, 捉下迷藏, 每次都會好興奮好投入咁樂此不疲, 特別係鐘意爸爸做佢對手, 直情當咗爸爸係佢嘅大玩具咁。
朗朗豬同爸爸追追逐逐....去片 >>