顯示具有 4歲 標籤的文章。 顯示所有文章
顯示具有 4歲 標籤的文章。 顯示所有文章

2010年12月31日 星期五

2010年大除夕

2010年12月31日(星期五) 天晴陽光普照

轉眼間, 便踏入2010年的最後一個月了, 今年的冬季來得特別早也特別寒冷, 十二月初便曾經下跌至6度的氣溫, 在這嚴寒的12月, 我們依然節目多多.

12月18日 - 保良局田家炳幼稚園的學校旅行


目的地是西貢北潭涌渡假中心





到達目的地, 首先是大人和小朋友的集體遊戲時間, 朗朗照常在集體遊戲時拒絕參加, 還有點發皮氣, 直至集體遊戲結束後, 他的表現才好轉, 還願意找老師和好朋友影相。


第一位的好朋友慶文


有好朋友在, 朗朗都變得鬼馬起來。


第二位好朋友是康翹

影相後, 便開始BBQ時間, 食飽BBQ後便玩自己帶去的spiderman大風箏, 可惜無風不能成功放出。

隨後便在渡假中心內四處參觀和玩各樣康樂設施, 至下午四時便回程了.


與婆婆吃61歲生日兼冬至晚飯


還有, 和嫲嫲吃冬至晚飯




最後, 必然的節目, 是到尖沙咀看聖誕燈飾。
依家朗朗已經識得同我地影相喇, 都影得幾四正唔錯架。

朗朗身高114cm; 體重23kg

2010年11月1日 星期一

HALLOWEEN PARTY

2010年10月29日 (星期五) 天晴, 清涼, 乾燥, 己經正式踏入秋季了

今日係朗朗學校嘅halloween party, 剛巧天氣又涼咗好多, 於是朗朗就以呢一身跳跳虎造型返學校開party喇。


套跳咷虎衫係由西瓜夫人贊助, 今年著啱啱好, 明年就唔啱架喇。


套衫整得好靚好別緻, 連條尾都係攣攣地彈下彈下咁架。


朗朗近期嘅最愛活動, 就係玩滑板車Scooter, 佢部winnie pooh單車仔已經維理咗幾次, 再加上朗朗一日一日長大, 身體一日一日長高, 部單車仔已經頂腳, 現在已經功成身退, 完成第一部單車仔的使命了。


為咗買呢一部Scooter, 上星期我地一家三口行足一日, 朗朗先可以買到呢件心頭好, 依家佢每日都要落公園起碼玩一粒鐘先滿意架, 睇下佢玩到四萬咁嘅口, 就知佢玩得幾開心啦!

2010年10月28日 星期四

美術畫作

2010年10月23日 (星期六) 天晴有雲, 漸漸轉涼

現在每逢星期六上午, 朗朗都要參加興趣班美勞課, 大鼻襯放假每次都自己接送佢, 每次看見朗朗放學時, 手拿著剛剛完成的作品, 一臉興奮滿足的笑容, 滔滔不絕的笑語, 伴隨著他彈跳彈跳的步伐, 一起開開心心的回家去, 大鼻心底裡便會覺得實在、覺得愉快。


今天他的作品, 是一幅晚間的貓頭鷹畫作。大鼻和大頭都覺得好靚好鐘意呀, 隻貓頭鷹嘅身形比例, 與及整幅圖畫的構圖都好恰當, 真係ichiban呀。

2010年10月7日 星期四

海洋公園一天遊

2010年10月2日 (星期六) 天晴有陽光有微風, 漸有秋意


今日朗朗第一次去海洋公園, 佢晨早7點就叫爸爸媽媽起身, 我地食埋早餐, 10點就已經到達海洋公園了。

由於城巴629直上大樹灣, 所以我地就從山上開始玩起, 先玩海洋摩天塔, 之後去睇海獅。


然後, 去霸位睇海洋劇場, 朗朗第一次睇海豚海獅表演, 睇到入晒神, 不斷拍手叫好野呀! 不過大鼻就覺得無咗鯨魚海威嘅海洋劇場, 真係失色咗好多呀!!!
之後, 我地去咗海洋冰室食午餐, 呢個時候海洋公園內已經人山人海, 到處都是自由行了。
午飯後, 便到海洋館及水母館參觀, 看見各式各樣大大小小的魚類、海龜與及千變萬化的水母, 朗朗真的看到目不轉睛、目不暇給。




接著我們便乖搭吊車到另一邊山的海洋樂園, 去繼續其他的行程, 乖搭吊車時朗朗表現得好鎮定一d都唔驚, 仲不斷話搭吊車好舒服、好開心、好靚呀咁, 大鼻真係估唔到朗朗依家咁大膽咁叻仔。
落到下面山, 首先去睇一個雀鳥劇場。
睇完表演, 就去兒童樂園玩機動遊戲, 環迴水世界、砵砵火車頭、幻彩旋轉馬、昇空奇遇, 本來大鼻仲想玩埋七彩星空飛球架, 不過實在太多人了, 唯有放棄啦。
之後再行埋熊貓館及亞洲動物天地。由於朗朗仲想搭多次吊車, 於是我地就先搭一轉海洋列車去番高峰樂園果邊, 再玩一次摩天塔又閒逛一陣之後, 便再搭一次吊車重回海洋公園的正門離開了。玩咗一日, 我地三個都倦到散晒了。

2010年9月24日 星期五

中秋節禮物

2010年9月22日 (星期三) 颱風凡亞比於香港北方橫過, 狂風暴雨

今日是農曆八月十五日中秋節, 可惜被颱風影響天氣, 整日烏雲密佈, 夾雜狂風暴雨, 直至晚上, 雨勢才稍為遏止, 但最終我們也未能欣賞到中秋圓月。

不過, 大鼻依然覺得好開心, 因為今日放工一返到屋企, 就收到一份中秋節禮物。

今日係中秋節正日, 大鼻今年終於都有得放早喇, 早收工真開心呀!! 當我一返到屋企, 朗朗就攞住一張寫滿五顏六色數目字嘅紙比我睇, 初時張紙係對摺咗嘅, 我只睇到由0至61號碼果邊, 當時我已經覺得好靚呀, 之後朗朗轉埋另外半邊比我睇, 原來佢已經寫到100號。

我當時就對朗朗說, 寫得好靚呀, 好多顏色呀, 媽咪好鐘意喎, 你可唔可以送比我呀!!

朗朗諗咗一下就答 : 唔...送比你呀, 好呀! 等我寫埋其他果d no.先送比你啦。

於是, 朗朗便從新打開盒水彩筆, 然後正經坐定定, 每個數目字用唔同顏色水彩筆, 繼續由101號寫落去, 當寫到132號時, 全張紙都寫滿晒啦, 之後, 朗朗便正式把這一張手作紙, 送給大鼻作為中秋禮物, 拿著這張完成品再端詳一下, 大鼻覺得真係好靚呀!!


之後幾天的一個晚上, 大頭又發現了朗朗另一張完全不用風格的寫作紙了。
呢張寫作紙, 雖然只用一支顏色筆來完成, 但我卻覺得充滿藝術氣息。而大頭卻說, 這些字體就像一些失落民族的象形文字, 又像一些非洲文字/圖案, 真係好特別呀!!!

2010年9月19日 星期日

why? why? tell me why?

2010年9月19日(星期日) 多雲悶熱, 風雨欲來之象

K2開學後的朗朗, 只需兩三天時間, 便能適應幼稚園的校園生活了。

開學後不久, 朗朗便很喜歡寫字, 每天放學食過午飯, 便會自己做功課寫字, 即使做完功課仍會靜靜坐在枱仔上寫字, 我會給他幾張白紙, 隨著他自己的興趣, 喜歡寫什麼便寫什麼, 他通常是寫數目字及大小階ABC, 間中也會要求我, 教他寫一些有興趣的中文字, 每天通常都要寫大半小時, 填滿兩三張密密麻麻的紙張才會停手。




除了寫字之外, 朗朗亦喜歡用線條, 在密密麻麻的字體中四處穿梭, 好像玩迷宮一樣。

最近, 朗朗開始無所不問, 無論是可以解釋或不可解釋的事情, 他都會問過不停問到底, 初開始的問題是有sense的正常問題, 漸漸地...漸漸地...他的問題包含著很多假切性, 亦開始每事都問點解嘅? 點解呀? 點解會咁嘅?? 答問題都答到倦晒呀!!

短短半小時的車程, 他會不停地問問題, 點解果度會壞嘅? 點解要維修嘅? 點解唔即刻維修嘅? 點解要等嘅? 點解架車會轉灣嘅? 點解要轉灣先到嘅? 點解2.4.6.8.10係雙數嘅? 點解1.3.5.7.9係單數嘅? 哎呀....朗朗幾時變咗做問題兒童 & Mr. why架? 凡事都要問點解, 這標誌著朗朗已經在不知不覺間, 踏入了另一個成長階段, 而我亦應從現在開始, 逐步up le心理上及情緒上的正能量, 隨時迎接新的挑戰。

2010年8月27日 星期五

暑期將盡

2010年8月27日 (星期五) 天晴有雲, 局部地區有聚雨

不經不覺已是八月底, 朗朗的第一年暑假好快就要結束了。

總結朗朗今年的暑假, 他一共參加了四個暑期興趣班, 分別是專注力小組、兒童畫班、美術勞作班、非洲鼓班。要他參與不同的暑假班, 是希望他能夠多面對陌生環境、陌生導師及新同學, 從而提高及鍛鍊他的適應能力, 我覺得他做到了, 我覺得滿意了。

最後一堂非洲鼓課堂, 朗朗顯得有點悶悶不樂, 不知是否有些離別之情, 他全堂都不能集中和投入, 不能開心地打鼓玩樂。


坐在導師對面穿籃色外套的便是朗朗, 他全堂納悶, 不能開開心心的投入打鼓。

經過一個暑假, 我覺得朗朗大個仔咗又大膽咗, 好多野都開始放膽嘗試, 對新事物亦願意接納, 唔知呢個係暑期興趣班嘅功效, 定係大個仔嘅必然成果, 但對於我黎講, 絕對係一個意外驚喜。 9月1日是幼稚園K2的開學日, 朗朗要繼續加油呀!!

2010年8月14日 星期六

探姑婆

2010年8月14日 (星期六) 陽光普照, 局部地區有驟雨

今日又到打非洲鼓嘅日子, 打完非洲鼓, 我們就同嫲嫲一齊, 在荃灣飲茶食午飯, 飲完茶便三人一起搭車到馬鞍山探望姑婆。

姑婆今年已經九十一歲了, 雖然她時常腳痛, 行路時需要依靠輔助器具, 但她的精神是非常好的。



上次見姑婆, 是農曆新年年初二(15/Feb), 當她一看見朗朗, 便流露出無限憐愛、滿心歡喜的樣子, 很想緊緊地抱著他不放。到離別之時, 姑婆更是百般不捨, 千叮萬囑我們要多去探望她。

親親動物農莊

2010年8月1日 (星期日) 陽光普照, 赤熱高溫

今日我地一家三口, 連同婆婆及姨媽一家, 一起到亞洲國際博覽館5號展館, 參加親親動物嘉年華。

朗朗早上一起床, 便立即梳洗、食早餐、換衣服, 而我亦快手快腳, 執捨各樣携帶用品, 9點前我們已經到達博覽館的門外, 排隊等候第一時間進入展館。

由於姨媽及婆婆他們未到, 所以我們一家便先入展覽館了, 一入會場便看見幾個卡通人的列隊歡迎, 朗朗最喜歡豬豬人。

進入會場, 朗朗是最渴望的, 就要可以抱抱小白兔, 又或是近距離給小白兔餵食, 可惜這些都不能在會場入做到, 我們坐在小白兔旁邊, 跟它一起合影, 已經是最最最親近的接觸了。

能夠近距離餵飼的就只有小山羊, 我和朗朗站在鐵籠邊, 手中拿著乾草, 口中叫著咩咩咩, 等著羊羊到來吃草, 嘻嘻....成功了....真有趣。館內還有大烏龜和小馬, 但都只能在遠距離觀看。

除了動物, 館內還有一些攤位遊戲和巨形吹氣彈床, 全部都需要額外收費, 朗朗和毛毛最喜歡就是玩吹氣彈床了, 兩個玩到傻晒癲晒。下午三時左右, 我們離開會場, 轉到東涌東薈城閒逛及休息。

晚上, 一行人轉到東涌諾富特東薈城酒店食自助晚餐, 經過一日的玩樂, 朗朗和毛毛已經很親熱了, 兩個小鬼頭碰在一起便大叫大跳, 當我要求他們一起合照時, 他們便立即攬頭攬頸了。

2010年7月21日 星期三

首年暑假樂

2010年7月21日 (星期三) 三號風球, 天陰多雲, 間中有狂風暴雨

暑假正式開始了, 今年是朗朗的第一次放暑假, 而我亦為他報讀了四個暑期興趣班。

協康 - 非洲鼓
阡陌 - 專注力小組 及 兒童畫班
田家炳 - 美術勞作班

第一個開始的興趣班是非洲鼓, 第一天上課的時侯, 朗朗表現得很緊張, 未能投入課堂內的氣氛, 更未能跟上打鼓的節奏, 上課至末段時, 朗朗更在課室內大哭起來, 幸好最後也能完成一整堂, 其實第一堂有這樣的表現, 我已經非常滿意了。

兩個星期後上第二堂, 朗朗初入課室時仍有少少緊張, 亦曾哭了一會, 但他很快便能投入課堂的氣氛, 開始享受打鼓的樂趣了。


及後更勇於參與嘗試不同的樂器, 第二堂便有這樣的成績, 我真是驚喜了。


隨後要參加的暑假班, 是阡陌的專注力小組和兒童繪畫班, 第一天到阡陌是參加專注力小組, 朗朗要進入課室時便開始哭了, 哭著說不上暑期班, 也害怕姐姐與他的別離, 幸好這只要短暫的恐懼, 在姐姐的鼓勵下, 朗朗終於能夠進入課室, 在課堂內的表現如何, 我們無從考究, 只能從朗朗口中知道, 他說他在上課初期仍有哭, 但在嚴老師的安慰下, 他最終能夠樂於參與課堂的遊戲, 並且心裡已認定非常喜歡嚴老師了, 放學時已經是開開心心的回家了。

第二天到阡陌是參加兒童繪畫班, 今天朗朗已沒有昨天的陌生感, 也沒有害怕與姐姐的別離了, 他己經能夠懷著輕鬆的心情進入課室了, 他下午放學回家時, 已經急不及待的打電話給我, 告訴我他畫畫好開心, 畫了很多畫哩。

晚上, 我終於看到他的第一幅大作了。


我真係喜出望外呀!! 圖畫內容好豐富, 充滿繽紛的色彩。這真是朗朗的一大突破, 他以往無論畫圖畫或填顏色, 都只願意用單一的顏色, 即使在我和大頭的不斷鼓勵下, 他也不願把不用的顏色放在一幅圖畫上, 而且他使用的顏色也比較單調。
上完第一堂的繪畫班, 朗朗便說好鐘意林老師, 好鐘意畫圖畫, 這一刻我忽然明白到, 興趣班背後所蘊藏的力量是何其強大, 我希望朗朗能夠繼續參加不同的興趣班, 並藉著不同的興趣活動, 讓他能漸漸地尋找出一個敞開心窗的方法。

2010年7月10日 星期六

桑拿週

2010年7月5日 - 9日 陽光猛烈, 高溫酷熱, 持續一星期酷熱警告

7月5日-假期的第一天, 今日舊姐姐要走了, 我由今天開始放假一星期, 處理送舊迎新姐姐大行動。

早上, 我們如常起床, 大頭爸爸如常一早上班, 而我則負責送朗朗回幼稚園上學, 在離家的時侯, 朗朗並沒有什麼特別的表現, 只是無論如何也不跟姐姐說拜拜, 反之, 姐姐早已淚流滿面, 我起初還以為, 朗朗仍未真正明白, 姐姐今天是要永遠的跟我們別離。

豈料在我送他上學的途中, 他又似乎是懂得的, 他知道姐姐今次回去印尼之後, 就不會再回來我們的家裡, 他也知道放學便不會再見到姐姐, 雖然如此, 他在整個與我談話的過程中, 各方面的表現都非常平靜, 完全與平時無異。我照常送他到學校門口, 他便自行慢步進入自己的課室。

之後, 我便到課室外的窗邊觀看朗朗, 我看見他進入課室後, 自己一個人悶悶的坐在位子上四處張望, 他亦看見站在窗外的我正在看著他, 他開始時滿身不自然, 隨後便開始不斷在抹眼淚, 這時除了我以外, 班主任也發現了他的異想舉動, 與此同時, 班主任也發現了我正在窗外觀看, 班主任帶著疑惑的眼光過來詢問我, 朗朗今早為何會哭呢? 他已經很久沒有在上課時侯哭了。於是我便告訴班主任, 今天是工人姐姐離開我們家的日子, 朗朗或許是因此有些傷感。這時老師便簡單而肯定的回答我, 明白了, 我今天會特別留意他的, 你放心吧。有了老師的這句說話, 我便安心回家了。

接下來, 下一個任務是帶姐姐到荃灣agent對數, 這是我和姐姐的單獨時刻, 在短短幾十分鐘的車程和路程中, 大家都真切地互道別離的說話, 其間姐姐有三次含淚向我道歉, 說她知道以前做錯了, 希望我能夠原諒她。其實此時此刻, 從提舊事都已經沒意思了, 我只能衷心祝福她有一個開心的工作, 和美好的未來。

之後, 我便回幼稚園接朗朗放學, 我到達幼稚園時, 發現朗朗已經沒什麼了, 我看到他很開心地參與小朋友活動, 後來, 老師對我說, 我今早離開之後, 朗朗的心情都未能平伏, 他在上課後不久, 便獨個兒伏在枱上哭, 當老師問他為何哭時, 他並沒有回答, 只是繼續在哭, 於是老師便擁抱著他, 再問他為什麼哭時, 他便伏在老師的肩膊上繼續大哭, 然後一邊哭一邊告訴老師, 姐姐今日要走, 她要回去印尼了。他終於都能夠把心中的傷感, 表達出來了。

7月6日-假期的第二天, 今日的主要任務是接新姐姐到我們家, 早上我獨自照顧朗朗, 送他到幼稚園上課, 他今天沒有哭了, 但總是有些悶悶不樂的, 而且他仍時常想念著舊姐姐。

送朗朗回幼稚園之後, 我便到荃灣agent接新姐姐了, 第一眼見到新姐姐, 便發覺我們又被相片欺騙了, 新姐姐真人比相片好看多了, 她看上去是蠻純品蠻乖巧的, 我跟她先回家放下行李, 然後便起行去幼稚園接朗朗放學了。

朗朗第一眼看見新姐姐, 便立即偷偷地微微咀笑了, 看來朗朗對新姐姐的第一印象是不錯的, 之後, 朗朗對新姐姐表現出好奇和友善, 好像很喜歡這一個新姐姐, 而且他在第一天的晚上, 便可以跟新姐姐同房睡覺了, 我真是感到很意外很驚喜哩!

對於朗朗和新姐姐的順利接納和互相喜歡, 令我同大頭都放下了心頭大石。

接下的幾天假期, 我每天的工作, 都是接送朗朗上學返家, 帶姐姐去街市買餸, 教姐姐處理日常家居工作, 基本上來說, 都不是辛苦的工作, 但最大的問題是天氣實在太熱太焗, 陽光實在太熾熱了, 每天在家就像處身焗桑房一樣, 酷熱難擋, 熱到頭暈。

2010年7月1日 星期四

回歸假期

2010年7月1日 (星期四) 天晴無雲, 今年第一個酷熱天氣

太陽伯伯今日終於出來了, 天陰密雲驟雨的天氣, 已經持續了二個月了, 今日終於能夠看到久違了的籃天, 不過, 陽光實在太猛了, 走上街上真是熱浪迫人。

實在太耐無出街走走了, 縱使有被曬燶曬溶的可能, 我們也是甘願的。

我們先到葵芳食一個早餐, 然後搭930巴士到中環, 在中環ifc閒遊至香港大會堂。


陽光實在太強烈了, 於是我們便乘搭渡輪到尖沙咀, 睇下呢張相, 就可以知道外面嘅陽光有幾強勁了。


籃色天空下的維港, 幾靚!!


之後我地喺尖沙咀食下野, 行一陣街就打道回府了。在街外真係好曬好熱, 不過朗朗仍然興緻勃勃的四處奔走, 彷彿有耗不盡的精神和體力, 而今天他最喜歡最雀躍的活動, 依然是乘搭渡輪那一環節。

家中的印傭姐姐將會完約了, 她7月5日便會離開, 而新姐姐將於7月6日加入, 希望朗朗會喜歡這一個新姐姐吧!

2010年6月28日 星期一

十八之匙

2010年6月28日 (星期一) 天陰密雲, 間中有暴雨

今年夏天, 香港都被連綿不斷的低氣壓覆蓋著, 今日屈指一算, 兩個月累積下來的晴天日子, 還不夠五天哩! 這樣的天氣, 令人情緒低落, 心情非常悶透, 天陽伯伯....我真係好掛住你呀!!!!!!

由於天氣差勁, 我們最近的活動都非常沉悶, 沒有陽光海灘, 沒有戶外活動, 沒有郊遊樂趣, 只可以重覆又重覆到就近的商場流連。

由於幼稚園要求各小朋友提交英文名, 朗豬昨日終於決定佢嘅英文名叫"Riff"喇。

朗豬最近好識得冧人, 我相信嫲嫲係被氹得最開心果個, 6月中的某一個星期六下午2點左右, 我、朗豬和工人姐姐都在家中, 吃過午餐及沖涼過後, 朗豬差不多要準備午睡, 而我正在交帶工人姐姐, 今晚要煲的湯水和晚餐餸菜之時。突然朗豬想起嫲嫲, 希望要請嫲嫲今晚到我們家來吃晚飯, 而且還坐言起行, 立即打電話給嫲嫲說 :“我好掛住你呀, 好想你今晚黎我地屋企食飯飲湯呀”

嫲嫲聽到這樣窩心的說話, 又怎能拒絕他呢, 於是便立即從元朗起行, 轉搭三程巴士到我們家來吃晚飯, 這是朗豬的第一次, 而嫲嫲是第一個幸運兒, 見到嫲嫲咁開心, 又見到朗豬能夠坦然向別人流露感情, 我都覺得好開心。

第二個被冧嘅人就係大頭喇, 話說6月中的某一個星期日, 大頭如常早起去秘撈, 當我起床梳洗完畢的時候, 看見枱上剩下兩件卷蛋, 於是我便開始吃卷蛋做早餐, 當我在吃第一件卷蛋的時候, 朗豬便告誡我說 :“你食一件蛋糕就夠飽架喇, 另一件是留給爸爸食的, 你千其唔好食呀”聽到這番說話, 我真是愕然, 原來在朗豬心裡, 也時有想念爸爸的時刻, 我把這件事告訴大頭, 大頭也感到很意外、很開心哩!! 我想大頭在品嚐那一件預留的蛋糕的時候, 一定特別滋味、特別窩心。

第三個被冧嘅人, 當然就係我啦。6月27日, 我們一家和婆婆合共四人, 參加了一個本地一天遊, 早上到屯門黃金海岸, 繼而到旺角吃韓國燒烤自助餐, 下午到九龍寨城公園, 最後到山頂遊覽。由於天氣不好, 全日都落雨, 我們只好在每處地方短暫停留, 或尋找能避雨的地方隨便行走一下, 其中在遊覽山頂的時候, 朗豬對纜車特別好奇, 最是感到興趣。

行程從九龍城到山頂的車程, 大慨需要一小時, 其間朗豬倦極而睡, 於是我便自然地環抱著他, 讓他能睡在我的懷裡, 巴士到達山頂的時候, 朗豬便醒了。遊覽完畢回程青衣, 車程也是大慨一小時, 朗豬沒有再睡了, 他看見我在打呵欠。
朗豬便問 : 媽咪, 你係咪眼瞓呀?
大鼻答 : 係呀, 因為我頭先無瞓覺
朗豬說 : 你眼瞓, 咁我攬住你瞓啦。
他立即展開他的一雙小手, 盡力伸長地環抱著我的頭和肩膊, 然後再跟我說 : 你瞓啦, 我攬實你。
我真係冧晒, 甜到入心呀!!!

6月中某一個星期六, 我和朗豬一起乘搭巴士到圖書館, 朗豬眼看著巴士上, 印有八爪魚圖案的緊握扶手貼紙。
朗豬問 : 媽咪, 你鐘唔鐘意八爪魚架?
大鼻答 : 鐘意架, 因為我覺得八爪魚都好得意
朗豬說 : 你鐘意呀, 咁好啦, 等我第日買比你玩啦
大鼻問 : 好呀, 第日即係幾時呀?
朗豬答 : 18歲囉, 我第日18歲就會買一個八爪魚送比你
大鼻說 : 好呀, 我鐘意紫色八爪魚, 你記得18歲時買比我喎
朗豬說 : 好啦
我知道, 朗豬將來必定還有無盡的願望和理想, 冀望在18歲能夠實現的, 此時此刻, 18歲恍惚是成長的密碼金匙, 能開啟成人之門, 通往擁有自主掌握的未來。

2010年5月28日 星期五

小小管家公

2010年5月28日 (星期五) 天晴炎熱, 多雲

4歲大的朗朗, 明顯比以前有主見, 也開始表達自己的喜惡, 他喜歡的人物, 會時常掛在咀邊, 說希望常常見到他。月中他突然很喜歡Barney片中的一位小朋友Mario, 他時常說很掛念他, 更常說要去美國探望他, 看著他痴心一片的眼神, 實在讓我和大頭啼笑皆非, 大頭於是便提議他, 如果真是很喜歡Mario的話, 不如就改英文名叫做Mario好嗎? 朗朗一聽到爸爸的提議, 眼晴即時閃出金光, 咀角含笑地便說 : 我以後係Mario呀....yeah!!

可惜Mario呢個名, 只係用咗一個星期左右, 他便變心了。新歡是Riff, 他是Barney片中橙色的小恐龍, 一個星期後的今天, 他是Baby Bop (Barney片中的綠色小恐龍), 臨睡前他又說 : 我明天是Barney, oh......我暈了。

此外他的言行, 越來越有管家風範了, 我地要做什麼, 都要得到他的批準和指示, 說話時也十足大人口吻。

事件1, 吃飯時, 朗朗間中會夾一些餸菜餵媽咪吃
朗朗問 : 媽咪呢d好唔好味呀
媽咪答 : 好味喎
朗朗說 : 唔...好味呀, 咁好啦, 我第日多d買比你食啦....
媽咪問 : 第日即係幾時呀?
朗朗答 : 第日係我大個仔18歲果陣時囉

事件2, 晚上有蚊茲仔出現在客廳或飯廳時
朗朗說 : 拿...係咪你地兩個大人曳呀, 有蚊茲仔黎咗勒
爸媽答 : 我地無曳喎, 蚊茲仔黎搵曳嘅細路仔架 (我和大頭都忍著笑說)
朗朗說 : 唔係架, 我都無曳, 蚊茲仔一定係黎搵你地兩個大人, 他地記得唔好曳喇

事件3, 有一天晚上, 我約了朋友出街吃晚飯, 臨出門去食飯之時
朗朗說 : 媽咪, 你一陣同朋友食飯, 只可以食飯, 唔可以傾計架
媽媽答 : 下....食咗飯要同朋友傾一陣計好d喎
朗朗說 : 唔得架, 只可以食飯, 唔可以傾計, 食咗飯就快d返屋企
媽媽答 : 哦, 知道 (原來朗朗想我盡早回家, 我只好應承, 否則便不能出去了)
朗朗再說 : 拿, 媽咪記住架, 只可以食飯, 唔可以傾計, 食咗飯就搭車返屋企
事後, 朗朗還打了2次電話提我, 記得唔好傾計, 那我就只好陽奉陰違了

最近鐘意睇Barney碟及Sesame碟的Tingo系列, 也喜歡玩EVI網上遊戲, 搭巴士及地鐵時, 喜歡背誦車站名, 地鐵由葵芳到尖沙咀的站名及顏色, 早已熟稔, 243M巴士線的沿途站名, 亦非常純熟了。而認知方面, 他已能清楚分辨 : 我, 你, 我地, 你地, 大人, 細路仔, 外面, 裡面
高度 : 109cm
重量 : 21.8kg

2010年5月8日 星期六

第一個志願

2010年5月7日 (星期五) 天陰密雲有雨

母親節快到了, 今日我地都同嫲嫲食晚飯慶祝母親節, 連大人和細路一共有14人, 真係人強馬壯呀!!
食完晚飯便各自搭車返家, 在回家途上, 朗朗又看見建築地盆上的天枰.

於是他又問 : 媽咪, 天枰依家郁唔郁架?

我答 : 依家收左工唔郁架喇, 要等聽日有叔叔開工先至會郁

朗朗思索一陣, 就話 : 媽咪, 我聽日就18歲, 我要去起樓果度開工

他當時的說話聲浪是頗大的, 除了我之外, 爸爸和前一排坐的一位姨姨及兩個姐姐, 也能清楚聽見
大家聽到他這番說話, 也覺得很有趣而笑起來, 而我當然也不例外呢!!

我回答他 : 你依家4歲, 聽日無咁快18歲架, 你要努力讀書、寫字、學多d野, 大個仔先可以做野, 如果好似依家咁乜都唔識, 無人會請你做野返工架.

朗朗說 : 哦..會無人請做野架

我回答 : 係呀, 無人請, 就無得返工架喇, 所以你要返學, 要努力讀書, 將來先可以返工, 明白未?

朗朗說 : 明白

真係意想唔到, 朗朗嘅第一個志願, 唔係做巴士司機, 亦不係做巴士維修, 而係去起樓地盆做野, 他最近實在被那個會360度轉、會上下移動、永遠高高在上的天枰迷住了.

2010年4月23日 星期五

四歲生日

2010年4月22日 (星期四) 天陰多雲有驟雨, 早上29度悶熱, 晚上氣溫驟跌8度

今日係朗豬嘅四歲生日, 自從我地搬咗新屋, 有咗一個大d嘅廚房, 又忝裝咗一部焗爐之後, 大鼻比以前鐘意入廚, 又會研究下一d焗爐菜式, 比大頭和朗豬一齊品嚐, 今日大鼻就做咗阿茂, 整個生日餅同朗豬慶祝生日。

7點放工返到屋企, 即刻準備用具及用料, 在蛋糕焗盤內塗上植物牛油, pre-heat焗爐15分鐘, 開始攪拌朱古力漿, 再把攪拌好的朱古力漿放入焗爐焗30分鐘, 個蛋糕焗好之後, 要倒出黎吹涼, 大慨吹咗30分鐘後, 朗豬開始按捺不住了, 於是我在蛋糕上寫字, 然後由朗豬負責在蛋糕上灑上小糖粒, 朗豬的生日蛋糕便完成了。
朗豬一路食, 一路話好好味呀, 足足食咗四份一個。

大鼻整嘅第一個生日蛋糕, 得到讚賞亦即刻食清晒, 都算是成功了...yeah!!!


又係時候要update一下朗豬嘅成長進度喇, 佢依家有109.5cm高, 21kg(46磅)重, 著31號鞋仔。
近排鐘意上EVI兒童頻道玩電腦game, 鐘意睇故事書, 仍然好鐘意玩波和球類的遊戲。
大慨半年前佢已經可以自己砌出100塊嘅puzzle, 不過近排好少玩puzzle了。
3個月前已懂得數數目由1到100(包括中文和英文)。
已認識的中文字, 例如 : 木、花、樹、刀、玩具、家、家具、男、女、爸爸、媽媽、姐姐...等等
能串出的英文字, 例如 : Red, Green, Yellow, Brown, Blue, Boy, Girl, Egg, Cat, Dog, Duck, Frog, Horse...等等
懂得穿褲子, 未懂穿衣服, 懂得拉拉鍊, 未懂扣鈕。
懂得穿鞋子, 未懂穿襪子, 要別人協助把襪子套上腳趾, 然後他才能把襪子穿上。
懂得擦牙和漱口, 但不懂把擦牙時的泡泡吐出, 懂得抹面抹手, 未懂扭毛巾。
懂得自己去大便和小便, 懂得自己洗手, 未懂得自己抹便便。
懂得用小童輔助筷子吃飯, 用匙子飲湯, 只要稍為把餸菜剪細, 便可以自己進食, 不用別人的幫忙。
至於模仿巴士的開關門及叮叮聲, 近兩個星期好像減少了一點。