眨下眼又過07年

2007年12月28日(星期五) 天晴暖和, 今個冬季不太冷

眨眼間07年就快過去lu, 只剩下四日就到08年; 年紀越大覺得時間越過得快, 自從有咗朗豬之後, 時間過得比以前更加快, 簡直就好似開咗turbo咁。

今年聖誕節我哋一家三口下午去街街, 夜晚去Zoe屋企開Party, 下晝先去行九龍公園睇雀仔、睇噴水池, 之後由尖沙咀搭船到中環, 呢次係朗豬第一次搭船船, 全個船程朗豬都目不轉睛, 既新奇又興奮, 佢眼珠仔不停咁轉不停咁望, 當佢見到周圍都係水水、四圍都有船船, 就好雀躍咁手指指。另一方面, 佢嘅眼神又充滿疑惑, 好似好唔明白, 點解無端端四圍都係水水, 又四圍都有咁多船船嘅呢??????



當短短嘅船程結束之後, 佢喺碼頭見到自己剛搭過嘅船離開, 就即時充滿離愁別緒嘅傷感, 依依不捨咁不斷"噢~~噢~~啊~~啊~~"以下有相為証, 一睇佢個樣就知道, 佢當時係幾咁愁眉深鎖兼望穿秋水呀.....

1歲8個月大的喜好

2007年12月16日(星期日) 天晴, 唔凍又唔熱, 咁嘅天氣好多人病呀
朗豬1歲8個月大, 近排至鐘意玩嘅遊戲&玩意, 排名不分先後 :-
1) 聽歌仔, 依家會跟住歌仔做動作, clap your hand, jump up and down, turn around.......

2) 玩車仔玩具, 呢個玩具係近排先學識點玩, 之前一路未識點放正架車仔喺路軌度

3) 睇報紙期間, 見到洗髮水廣告, 跟住做動作, 洗頭頭, 洗手手, 洗耳仔, 擦牙牙.....

4) 睇報紙, 依家朗豬每日都要揭報紙睇, 每次喺報紙上見到認識嘅野, 都會手指指, 特別一見到有萬寧, 八達通, 7-11, 惠康, 百佳, 就會好雀躍又呱呱叫

我家有支AA膠

2007年11月30日(星期五) 天晴, 踏入冬季, 漸漸寒冷

踏入11月嘅下半月, 天氣變得非常乾燥又漸漸寒冷, 香港的冬季已在不知不覺間到了。

由於天氣漸漸寒冷, 我便重新整理朗豬的衣服鞋襪, 把舊的衣物執拾收藏好, 然後把今年所需的冬天衣物準備好, 在整理過程中, 才驚覺朗豬原來大個仔咗好多呀!!!

原來喺我眼中嘅小bb已經高咗好多, 又大舊咗好多喇, 唔認真睇番d衫褲, 都唔覺佢原來已經咁大舊, 依家從外表上睇落, 朗豬真係一個小朋友仔咁架, 一d都唔bb仔feel luu....估唔到bb階段咁快就過去咗。

雖然依家朗豬仲未認得講說話, 但佢好識得用身體語言黎表達所想所需, 而呢樣野, 亦係我認為佢唯一最bb行為嘅時候, 我時時都會諗, 如果佢識得講說話, 可能就會更加快大個仔, 又可能好快變得好老積咁。大鼻媽媽係好貪心嘅人, 一方面好希望朗豬健康成長, 另一方面又好想盡量保留朗豬嘅天真童年時刻, 所以我唔會吹谷朗豬快d講野同快d學習, 我希望一切都順其自然, 希望大家可以好好享受難得嘅純真童年。

以前, 未有小朋友之前, 曾經聽過好多人講, 要有小朋友嘅家庭, 先至係一個圓滿嘅家庭, 我喺未有朗豬之前, 對於呢個見解, 始終係一知半解又無法想象到, 直到依家, 大頭同大鼻嘅家加入咗朗豬之後, 經過一年半嘅時間, 朗豬已經漸漸溶入我哋嘅生活, 佢好似一隻強勁嘅AA膠咁, 將我哋一家人緊緊地黏貼喺一齊, 有小朋友嘅家庭的確係時常充滿歡樂及笑聲, 小朋友嘅心情及行為表現, 係好直接又會毫不掩飾, 而呢種感覺, 往往能夠令到我哋呢d忘記童真嘅人, 可以重拾一d童年率性而為嘅記憶, 又可以勾起遺忘咗嘅赤子之心, 幸福美滿嘅家庭生活, 其實真係好簡單好簡單, 我哋有好多難忘而美好嘅生活片段, 都係一家人去下公園, 齊齊整整食餐飯, 又或未經特別安排咁玩一日, 都已經係好甜蜜好難忘又好窩心, 呢種感覺真係難以筆墨形容, 一定要親身體會先可以領略到。

當然, 每一件事情, 都有好與壞、優點同缺點, 問題係視乎你點睇同點去衡量; 我亦知道, 依家我地正處於所為嘅蜜月期, 因為暫時未需要處理或面對, 小朋友嘅成長同學習嘅問題, 到第日我地要被迫同朗豬一齊成長、一齊返學、一齊做功課、一齊捱夜車、一齊温習、一齊考試.......嘅時侯, 可能就無咁風騷無咁快活, 到時又可能會日日"罵罵聲"都唔定, 希望, 我到時都會以平常心咁面對每件事情, 正所謂謀事在人, 成事在天; 世事往往自有安排, 生命充滿奧妙, 未來難以猜透。

唔識講野又超重....failed

07年11月5日 (星期一) 天氣清涼, 秋意正濃

今日同朗朗豬返健康院, 做歲半檢查和發展監測評估, 結果係 :-
體重13.2kg (29lb) - 有小小超重, 姑娘話驚佢會變肥仔, 需要跟進
叠積木仔 - passed. 好快就可以做到, 仲玩咗好多次忝
聽別人指示 - passed. 姑娘問朗朗豬邊個係mami, 佢即刻指住我
講說話 - failed. 姑娘問朗朗豬問題, 佢只係識得指住d野, 然後發出"吚""呀""噢""啊"嘅音, 咁姑娘就問我, bb平時識得講乜野呀, 我答佢淨係識叫爸爸, 媽媽, 姐姐同mom mom咋. 於是姑娘就話又需要跟進
進食及介片 - passed. 現時表現良好, 但要開始續漸提升佢嘅自理能力, 例如自己用匙根"不"飯仔食, 自己穿着或除掉衫褲鞋襪, 介片、自己去厠所及洗手等等

由於有二個項目failed和需要繼續跟進, 朗朗豬2歲時要再返健康院check多一次, 我依家至驚係朗朗豬遺傳咗我嘅肥胖血統呀, 希望佢只係大隻仔而唔係肥仔啦~~~

足歲半大

2007年10月28日(星期日) 初秋時份, 清爽宜人

不經不覺就踏入初秋季節, 依家嘅天氣好舒服, 清清涼涼又有小小太陽温暖, 真係出外郊遊嘅好時機, 我地一家三口都襯住咁難得嘅好天氣, 今個月去咗九龍公園玩, 同去參觀嘉道理農場, 經過呢兩日嘅郊遊, 我發覺朗朗豬比以前進步咗, 一來無咁怕生保同怕羞, 佢會主動走去小朋友堆度一齊玩, 二來係每當朗朗豬見到一d認識嘅野, 例如 : 肥豬仔、雞仔、雀仔、龜仔、魚魚、花花草草、水水等等嘅野, 都會好快用手指指住, 然後係咁吚吚呀呀話比我地知佢嘅發現, 如果我地唔啋佢, 佢會越叫越大聲又哇哇嘈, 真至我地聽到同回應佢為止, 認真長氣架。

初秋季節去九龍公園, 氣候舒適又有活動空間, 真係一個舒展身心嘅好去處, 園內仲有好多唔同品種嘅雀仔/鳥類, 又可以玩肥皂泡吹波波, 至開心仲有兒童遊樂場, 等朗朗豬可以玩餐飽...yeah!!!!

遊樂場玩珠仔, 去片 >>>


玩滑梯之一, 去片>>>


玩滑梯之二, 去片 >>>

玩到倦..兩手fig fig遊走樂園, 去片 >>>

朗朗豬剛滿歲半大, 佢嘅身高同體形都比較大隻仔, 個樣又比較老積, 同佢出街時常會比其他人, 以為佢已經二歲至三歲大。今朝早我第一次同佢去圖書館, 我地喺兒童圖書閣入面, 一齊坐定定睇圖書睇咗20分鐘, 之後就喺兒童圖書閣入面周圍行, 佢對圖書館嘅環境及圖書及電腦都充满好期, 仲有小朋友撩佢傾計&一齊睇書忝。 體重29磅, 85cm高, 腳板仔15cm。

16隻牙仔喇

2007年9月

朗豬喺呢一個月裡面, 噼嚦拍拍係咁出牙, 短短個零月就出齊幾隻牙, 依家佢總共有16隻牙仔喇, 以佢現時嘅成長階段嚟計, 佢應該算係出齊晒牙, 我諗要到2歲以後, 先至會出埋剩餘嘅4隻大臼齒.

隨住朗豬出牙嘅同時, 佢嘅生活習慣同飲食習慣亦跟着改變, 佢依家嘅午餐會食粉麺一碗, 晚餐會食爛飯仔一碗, 早晚一定會飲一大支奶, 至於下午茶, 有時會飲半支奶, 有時會飲維他奶加麺飽或餅仔, 再加半個水果咁, 真係一日五餐, 餐餐不同, 所以呢, 依家抱佢上手, 真係啖啖肉又好重手下架.

朗豬平時喺屋企時, 係非常活躍好動, 又時常有好鬼靈精主意, 佢好鐘意整估我地, 又鐘意做一d不合乎規則嘅事情, 就連玩玩具亦會以唔正常嘅方法去玩, 我諗佢依家係另一個成長階段, 以及正在發展另一種思考方式. 至於講野方面, 暫時仲係毫無進展, 真係好期待聽到佢嘅bb話呀~~

同米奇遊車河, 去片 >>

見到冒險樂園就興奮, 去片 >>

傻下傻下玩襟襟, 去片 >>


我愛肥皂泡, 去片 >>

成長的驚喜

2007年8月28日(星期二) 天陰多雲有驟雨

朗豬一歲四個月大, 重量 : 28磅, 高度 : 83cm, 腳板仔 : 14cm, 係一個高頭大馬b。

雖然朗豬已經脫離嬰兒期, 但佢喺我哋心目中, 仍然係小bb一個, 呢個四支發逹頭腦簡單嘅小bb, 暫時仲未肯點講野, 但已經明顯有喜惡, 有主見, 有思考, 有部署, 有強烈的表達及理解能力, 絶對唔可以睇小佢嘅小宇宙。

佢好多時會喺你毫無預期之下, 突然給你驚喜, 無端端學大人嘅舉動, 學唱歌仔學跳舞, 學電單仔及救火車嘅聲, 學bb煲嘅水滾聲, 仲會識得喺雪櫃偷偷地攞維他奶, 然後即閃出廳, 仲會點媽咪唱佢鐘意聽嘅歌仔, 所以話, 生命處處都充滿驚喜, 真係無錯!!!!

扭紋柴之迷

2007年7月30日(星期一) 天晴炎熱, 日日都33度, 熱到爆燈




今個月我同大頭去咗一轉澳門, 我哋已經好多年無去過澳門lu, 近期澳門好旺場, 又多咗好多旅遊新景點, 所以我哋兩個都襯吓熱鬧, 四圍行行行!!! 隨處食食食!!! 肚腩漲卜卜就回程啦!!! YEAH~~~

朗豬上個星期開始, 突然變得好大皮氣, 又好爆燥, 仲時常會無情情扭一場大計, 扭紋程度前所未有, 我哋每日真係疲憊不堪又苦不堪言, 但我實在朝思夜想, 都百思不得其解, 點解佢一下子會變得咁曳曳呢????

尋日, 終於比我解開呢個迷喇!! 登登登櫈....朗豬出緊下面兩隻大牙呀, 朗豬依家已出上四下四, 八隻門口牙, 正在長出上面兩隻犬牙, 與及最新發現下面呢兩隻大牙, 夾夾埋埋一共12隻牙仔呀, 為咗呢兩隻大牙, 我哋辛苦d都無計啦......

此後的幾天, 即8月3日(星期五), 經過我嘅親手驗證, 發現下面嗰兩隻犬牙都出緊呀, 咁即係話, 上下四隻犬牙, 加下面兩隻大牙, 一共係六隻牙仔一齊出, 原來係因為同一時間出咁多隻牙仔, d牙肉好唔舒服、又痕又痛, 所以朗豬呢排先會又忟憎又扭紋又曳曳豬咋~~~

改名叫做粗魯豬

2007年7月15日(星期日) 天晴炎熱, 最高溫度34, 汗流浹背, 熱到爆炸

朗豬踏入15個月大, 開始學發音學講說話, 但暫時仍只識叫爸爸, 媽媽, 嫲嫲, 姐姐, mum mum 同 奶奶, 雖然我哋能夠聽到的只有以上幾個發音, 但我哋聽唔明嘅發音, 就有好多好多。

只要係喺屋企, 佢成日都會嘰呢咕嚕、吱吱喳喳又或者大叫大嚷, 最近, 就最鐘意大叫 "噢~~~" "哦~~~" 或者 "呀~~~" 而每次大叫嘅時候, 仲會出盡全身氣力, 撐到行咁向住你叫, 成個潮州怒漢咁, 所以我呢排, 己經同佢改名叫做"粗魯豬"。

party time.....去片 >>


如果你想保持至fit身材, 嚟朗豬舞蹈室學新創舞步吖, 結合猩猩、袋鼠、馬騮嘅舞步於一身, 自創一格。 自創舞步.....去片 >>


跳下跳下, 彈下彈下, 朗豬要做彈弓人!!! 彈弓人.....去片 >>


朗豬學揸大膽車, 佢一上車就好似頭文字D上身咁, 風馳電掣, 左片右片, 差D仲玩埋飄移忝.......
揸大膽車.....去片 >>

係電視蟲又係巴士迷

07年6月30日 (星期日) 天陰多雲, 時而狂風暴雨

唉!!! 又係一個落雨嘅假期天, 一連幾個星期嘅天氣都唔好, 一係曬到飛起熱到溶, 一係就狂風暴雨咁, 攪到我哋無得出街玩, 真係掃興呀!

無得出街玩嘅日子, 朗豬唯有留喺屋企騰嚟騰去, 攪下東又攪下西咁, 依家佢係百厭仔一名, 成日爬上爬落, 又鐘意將d野搬嚟搬去, 呢樣野可能係似大頭掛。

要數朗豬至愛活動, 不能不提嘅係睇電視, 佢無論做緊咩, 當一聽到廣告聲, 就即刻變成電視蟲, 見到電視有bb或者小朋友, 會即刻打hello hello手勢, 如果見到人哋拍手 、聽到唱歌或者聽到話好野好野咁, 都會即刻拍手仔。

朗朗豬係電視蟲...去片


另一樣朗豬嘅至愛, 就係睇巴士勒, 佢每日都要睇N咁多次巴士, 見親巴士會打hello同bye bye手勢, 有時仲會好興奮咁大叫話我哋知, 仲不時會流露出, 傾慕而又痴痴纏纏嘅眼神忝架

至愛大巴士.....去片

背水車身一星期

07年6月17日-23日 天晴, 炎熱, 氣溫高達33度
朗豬快要14個月大, 適逢這個星期二是端午節假期, 原本預定一家三口子, 可以輕鬆愜意的家庭樂幾天, 怎料一場突如其來的大戰, 一舜間已把我家圍堵, 當我家被殺氣騰騰、來者不善的入侵者重重包圍的時候, 我們仍茫然不知, 直至朗豬的脈搏奏起十面埋伏的樂曲時, 我才驚覺大戰竟在我們毫無準備下爆發了!!!

自從朗豬出世以後, 我一直都知道又熟悉、經常聽到、又經常被提醒, 嬰幼兒時期是經常會發高燒的, 以我亦自以為有足夠心理質數和心理準備, 跟這大敵隨時來個正面交鋒, 怎料敵軍在17日晚成功突襲, 並隨即肆無忌憚駐紮家中時, 我這才恍然大悟, 我的準備並不充裕啊。

朗豬持續在起初的3日2夜中, 發燒溫度一直在100至104度之間進進出出, 令我無時無刻都緊張兮兮, 之後敵方改變攻勢, 令朗豬腹痛肚瀉、嘔吐大作、拒絕進食幾天, 這時我每天的心情都幻得幻失, 心裡不時想着的都是作戰策略, 如何可以來一個俯底抽身、力挽狂瀾, 之後我痛定思痛, 給敵方來個迎頭痛擊, 其後朗豬又無言無故的, 在身上和面上長滿紅點紅疹, 這時我們已變得從容不迫、義無反顧, 我知道勝利就在眼前, 終於朗豬在24日康復了, 而我家也隨即恢復平靜閒適的生活。

經過這次背水車身的一役, 我己吸收到寶貴的經驗, 增長了處變不驚的能力, 而朗豬的戰績是出了上面兩隻犬齒, 與及高了1.5cm哩.

半空中的心情

07年6月6日(星期三)
今天天氣很好, 藍天白雲, 陽光普照, 第三次出差到越南河內

今次出差跟以往有點不同, 特別想在飛機起行前, 再至電回家及至電大頭, 於是至電家中, 再提醒工人姐姐一些瑣碎事, 着她好好照顧家中大爺少爺, 才算放心。但直至航班接近起飛, 都未能跟大頭聯絡上, 唯有發短訊告訴他:- “飛機9:00飛, 快要關電話, 到埗後再call你.” 直至飛機開始移動, 我才把手機關上, 當時心中隱隱有一點失落。

之後飛機如常升空, 半空中的雲層稀薄, 我可以極目遠眺地面上的每一個島嶼, 看到難得一見的藍天, 看到絢麗陽光, 看到狀如忌廉慕絲的白雲, 看到碧海晴空, 更分別見到兩道七色彩虹, 這才使我心中隱隱的陰霾漸漸散去, 最後航程亦全無驚險, 安全到達目的地。

而令我心中黯然的陰霾, 是發生在今年初, 上一次獨自出差越南河內的時候, 當日也是9:00早機, 我如常抵達機場辦離境手續, 如常登機, 飛機亦如常起飛, 大慨至飛機己飛行1小時的時候, 飛機像遇到一般的氣流一様, 機身有輕微擺動, 之後不久, 全部座位上方的氧氣罩突然跌落, 當時我和機上的其他乘客都不以為然, 有些乘客更大笑, 以為有人錯誤按鈕又或機件鬆脫, 就在那些乘客在嘲笑機件太兒戲的時候, 廣播器突然傳來機師一個非常短、非常急促的廣播, 機上的乘客全都聽不到機師說什麼, 在大家茫無頭緒和充滿疑問的時候, 大家開始想找空中服務員查問一下, 於是全機乘客四處張望, 但都沒法搜索到任何空中服務員的影子, 這時我才開始意識到事情不尋常, 就在此時, 再次傳來機師的廣播, 今次大家都屏息靜氣, 細心留意機師的指示, 又是一個極短、極急促的廣播, 但今次機師明顯加重語氣, 並刻意把信訊一字一字吐出來, 大部份人都聽到了, 是 “Get The Mask”, 於是大家開始手忙腳亂地拿起自己座位上方, 已鬆脫下來的口罩, 除了立時收斂笑容, 大家都顯得有些慌張, 因為大家都不確定, 怎樣才是正確配帶口罩的方法, 怎樣才可以呼吸到口罩內的氧氣, 而我也不例外。

帶上口罩隨後的數分鐘, 機身並未有更大的震動, 仍然只有輕微的搖晃和擺動, 但耳朵就感到非常不適, 可能是高空氣壓的轉變; 這時機倉內的氣氛已明顯變得緊張, 除了小孩的哭聲之外, 並沒有其他的聲音, 大家都在氧氣罩下屏息以待, 祈望處境的明朗化。

就在這寧靜而緊張的氣氛中, 大頭的樣子突然在我眼前浮現出來, 之後浮現出來的是朗豬的樣子, 噢….他倆是我此時此刻最牽掛的人, 而我確實還有千言萬語未曾講, 千叮萬囑未吟哦, 現在他們倆父子在做什麼呢? 會否也正在想念我呢? 就在我胡思亂想, 思緒越想越遠的幾分鐘後, 突然再次傳來機師的廣播, 同様是極快、極短促的訊息, 我聽到 ”xx Off”, 但不肯定是什麼Off, 之後開始有乘客放下氧氣罩, 然後跟身旁的人和其他乘客說 : “是Mask Off, 我肯定聽到機師說的是Mask Off”, 於是大家半言半疑, 有些人放下氧氣罩, 而有些人則仍舊套着氧氣罩。

再過大慨二、三分鐘, 空中服務員開始出現了, 他們都手持細小的氧氣樽, 詢問各乘客的身體狀況, 查問是否需要氧氣, 當大家見到空中服務員, 都急切的查問剛才究竟發生什麼事, 是否飛機的機件發生故障? 現在還有沒有危險? 是否可以安全到達目的地等等的問題。我聽到空中服務員回答說 : “剛才飛機突然遇到一個強大的氣流, 飛機曾一度急降2-3千呎, 但現已脫離險境並一切回復正常, 機師已確認機件沒有任何故障, 現正繼續向河內機場飛行, 一定可以在預定時間到達目的地, 請安心也可以不用再套氧氣罩了。” 於是大家都鬆了一口氣, 而飛機最後亦可在預定時間, 安然降落在河內機場。

從此以後我的人生中, 便多了一個難以忘懷的經歷, 我雖然沒有宗教信仰但我也感恩, 我感謝命運對我的眷顧, 感謝命運讓我擁有愛我的人和讓我愛的人, 而不同的生活經歷和體驗, 讓我對生命更感到知足和快樂。

真係大個仔咗喎

2007年5月中 陽光普照, 天氣清爽

呢排嘅天氣非常好, 完全無以往回南天時嘅濕濕笠笠, 亦無又翳悶又焗熱嘅感覺, 我個人覺得咁嘅天氣, 真係正到不得了, 依家朝朝返工搭車時, 都會望下個天, 然後幻想自己去郊遊, 返工都返得開心d輕鬆d呀。

朗朗豬自從一歲生日之後, 真係大個仔咗好多咁, 佢開始識得點去玩玩具, 唔係一味放入口度, 佢開始有觀察力、專注力、模仿力同思考力, 會研究下件玩具要點玩法, 而佢呢排最鐘意玩嘅玩具係 :-

一) 一個可以放不用形狀方塊入去嘅立方體, 譬如抽到一個三角形嘅方塊, 就要搵番三角形嘅窿窿, 先可以放到入去咁, 個立方體共有12個不同形狀嘅方塊同窿窿, 呢個玩具又平又簡單又益智。
學玩立體方塊.....去片 >>


二) 玩書仔, 其實所有可以遏下遏下嘅野, 朗朗豬都鐘意玩, 特別係d硬皮嘅書仔就更加鐘意勒, 不過唔好以為佢係睇書喎, 佢只係鐘意用手指, 將本書左遏右遏咁咋。 本來想拍段朗朗豬睇書仔嘅短片嘅, 不過無意中拍到朗朗豬自己攞玩具玩, 玩完識得放番好喎, 佢咁乖仔嘅一次, 緊係要mark底佢啦....
至乖仔呢次.....去片 >>


三) 一個碌波波玩具, 呢個係大鼻買比朗朗豬嘅生日禮物, 初時砌起同佢玩時, 佢會好興奮咁衝埋黎, 拆散佢兼攪亂檔, 唔識得坐定或企定玩架, 但依家就唔同勒, 佢知道要坐定定, 先可以碌波波.....再去片 >>


四) 呢個game係朗豬最最最鐘意玩架勒, 就係同我哋响屋企追追逐逐, 捉下迷藏, 每次都會好興奮好投入咁樂此不疲, 特別係鐘意爸爸做佢對手, 直情當咗爸爸係佢嘅大玩具咁。
朗朗豬同爸爸追追逐逐....去片 >>

2週年紀念日

2007年5月13日(星期日) 天氣晴朗, 陽光燦爛, 郁兩郁就一身汗

今日係大頭同大鼻嘅結婚週年紀念日, 適蓬今日又係母親節, 所以今日大鼻又有疍糕食勒, 今次大頭買咗一個有明堂嘅疍糕我嘆, 係叫做"知您心意"喎(即是意大利朱古力芝士疍糕), 又真係幾棧鬼又幾好味嘅....yummy yum....好掂。



朗朗豬打咗一歲mmr針已經13日喇, 到依家都無發高燒同出疹嘅徵狀, 而喺呢段期間內, 曾經有2-3日係有出現輕微發熱, 但後來都無驚無險平安渡過, 依家真係可以鬆一口氣喇~~~

最近見到大鼻媽嘅親戚同朋友, 都讚大鼻媽整咗個blog, 好勁好叻好醒呀咁; 其實大鼻除咗工作需要之外, 平時無興趣攪電腦架, 老實講我係電腦白痴黎架, 能夠令大鼻啲起心肝, 排除萬難咁整呢個blog, 最大目的當然係朗朗豬, 但依家我發覺, 其實最受益嘅係大鼻自己, 而最大推動力嘅係睇blog嘅蕃薯(即係您, 你, 妳)呀!!! 當我收到一眾大蕃薯細蕃薯, 睇到朗朗豬嘅相片或短片嘅笑聲, 稱讚或開心欣慰嘅回應, 我就會好開心、好有滿足感, 因為我真係好希望好希望, 可以將朗朗豬帶比我嘅喜悅, 同各位蕃薯一齊分享, 亦希望將來大家可以同我一齊, 睇住小朗豬變大朗豬, 而我哋呢班蕃薯呢....就齊齊變做蕃薯乾咯, 哈哈哈...

升格為大碼B呀

07年4月30日 (星期一) 天陰有微雨

今日請假一天, 同朗朗豬去打一歲MMR針, 兼且返健康院進行身體檢查。
結果係 - 手瓜 8寸, 肚腩 21寸, 大脾 12寸, 頭圍 18寸, 高度 77cm, 腳板仔 13.5cm, 體重 11.02kg

依家朗朗豬嘅體重已經由中碼b, 升格為大碼b喇, 姑娘仲話朗朗豬嘅體重size, 應該係頭三位忝bor; 不過佢就承繼唔倒大頭嘅特點, 佢個頭就只係中碼size咋, 以整體比例上計佢個頭細咗小小, 不過都屬於正常咁話, 而其他的測試及檢查都pass過晒關, 大鼻安樂晒luu~~~

朗朗豬一歲生日

07年4月22日(星期日) 天色陰暗, 空氣悶熱有微雨

今日姐姐放假, 我先起身接手照顧朗朗豬, 當餵飽佢食粥仔之後, 佢就瞓晏覺, 我襯佢瞓覺覺豬嘅時候, 就準備好工具, 為朗朗豬打手印腳印作為一歲留念, 個完成品整得麻麻地, 不過己經攪醒咗朗朗豬喇, 唯有收手啦。

當爸爸瞓醒嘅時候, 見到當日山雨欲來嘅天氣, 就改變計劃去青衣城行吓商場嘆冷氣勒。 晚飯前, 等姐姐都返到屋企之後, 我地一齊唱生日歌, 影吓相, 食豆豆疍糕, 之後朗朗豬仲好happy咁聞歌起舞忝, 以下有片為証架。

一歲生日聞歌起舞 http://www.youtube.com/watch?v=tYF8CpG53k4

第二日就啋我都傻 http://www.youtube.com/watch?v=K56JKZGHw_Y

大鼻有2個生日架

07年4月16日(星期一)
晚上放工回家, 見到嫲嫲給我們的三封生日利是。

第一次見到嫲嫲的筆跡, 感覺很親切, 因為嫲嫲的筆跡跟婆婆的筆跡很相似, 雖然利是封上只是簡單的祝願快樂、平安、健康、成長, 但內裡郤蘊藏着她對我們的無限祝褔與關懷。

收到這三封利是, 大頭郤不滿地跟我說, 嫲嫲大細超, 我係佢個仔, 我封利是竟然細封過朗朗豬嘅, 嘿嘿嘿~~

大頭接着還說, 大鼻媽咪最着數, 以後每年都有2個生日, 10年之後我50歲, 大鼻就60歲lu, 發達喇~~

40歲的大男人, 仍會呷醋, 仍然小孩子氣, 這就是大頭了!

而我就有一種奇妙感覺, 覺得.....三個人的關係更加密切, 更加三為一體, 更加緊緊地扣在一起, 所以我很樂意地跟大家說, 我以後每年都有2個生日喇。

爸爸牛一

07年4月7日(星期六)

今日係大頭爸爸牛一, 大鼻例牌準備咗一個大頭至愛嘅黑森林疍糕, 等爸爸放工返黎一齊慶祝慶祝。
而所謂的生日慶祝, 都無咩特別同新意架, 只係唱吓生日歌, 影吓相, 切吓疍糕咁, 但呢個係 "三個黃的家庭 " 嘅第一個生日會, 所以亦可以話, 係一個既簡單而又隆重的紀念日子。

最近朗朗豬嘅至愛新遊戲係行樓梯, 佢依家每次一見到樓梯就會飛樸去玩, 每次起碼要玩7-8轉先肯收腳

行樓梯之一....去片 >>


行樓梯之二....去片 >>

一歲生日的前奏

07年4月4日兒童節 (星期三) 天氣驟變, 無端端凍到14度

踏入4月的第一天, 我地全家人去參加BB一歲生日會, 當日約有77個BB一齊慶祝一歲生日, 當全場爸爸媽媽各自擁抱BB, 高聲合唱生日歌嗰一刻, 我覺得好溫馨好感動亦好感觸, 時間真係過得好快好快, 不驚不覺BB一歲大了。

唔知係咪因為接近BB一歲生日嘅關係, 我呢兩日經常不由自住地回想起, 呢一年以來嘅生活鎖事, 包括BB各個不同階段嘅成長變化, 不同時期嘅擔憂及喜悅, 兩夫婦之間不同階段嘅關係及衝突等等各樣各樣, 總之呢一年所發生嘅事不斷湧上心頭, 就好似電影片段咁一幕幕重播。

唔係好明白, 點解自己無端端會咁傷感及感觸, 其實BB一歲生日應該係好開心好欣慰嘅事, 但我就無情情變得情緒低落起黎, 或者呢d就係我以前一路都唔明白嘅阿媽心態啦……

何謂"熱愛生命"

07年3月13日(星期二) 陰天, 似暖還寒, 是感染風寒的高峯期

這段時間, 我在看一本名"狼圖騰"的書, 書中作者喜歡草原, 酷愛大自然, 敬配遊牧民族, 更加愛上狼, 他走到內蒙古生活, 研究甚麼是狼圖騰, 他愛狼至瘋狂程度, 後來甚至養着小狼, 在他養了小狼一個多月以後, 他就這樣描述自己生活上的轉變 --- ”陳陣覺得自從對草原狼着了魔以後，他身上萎靡軟弱無聊的血液像正在減弱，而血管裏開始流動起使他感到陌生的狼性血液。生命變得茁壯了，以往蒼白乏味的生活變得充實飽滿了。他覺得自己重新認識了生命和生活，開始珍惜和熱愛生命和生活。他漸漸理解為什麼｛熱愛生命｝是與一條垂死的狼聯系在一起的。”

作者的一席話我甚為認同，而令我有同感的主因，當然是朗朗豬而不是小狼，朗朗豬差不多１１個月大，他令我感到意外和驚訝的是，原來一個生命的誕生，是會牽動起一個、二個甚至三個家庭的生活色彩，令我真正的體驗到、感受到、思考到、認識到何謂熱愛生命！

朗朗豬有如小企鵝, 通屋行四圍攪....去片 >>


賊仔記, 斷正....去片 >>


大怪獸與小怪獸....去片 >>

少爺仔大進步

07年3月1日 – 朗朗豬已經10個半月大. 不經不覺間佢己經有好大進步。

最近佢學緊自己行, 有時會自己行到7-8步咁, 總之依家佢一瞓醒, 就要昅實佢同佢一齊玩, 真係行開一陣都唔得掂。

朗朗豬漸漸成長, 不但四支發達, 手腳靈活, 頭腦思考亦開始深思熟慮, 佢會識得分別喺唔有人面前, 有唔同程度嘅表現, 喺工人姐姐面前, 佢係最依賴亦最惡霸, 喺爸爸面前係最嗲最就範, 喺媽媽面前係最鬼鬼馬馬嘅。

三圍 : 手瓜8寸, 肚腩21寸, 大脾12寸, 身高74cm

少爺仔開飯之一....去片 >>


少爺仔開飯之二....去片 >>


3月5日行出第一步....去片 >>

第二次打敗扙

07年1月29日(星期一) 寒流襲港, 天氣寒冷, 晚間大慨11-12度

朗朗豬今日要去睇醫生, 因為咳, 有好多啖同流鼻水, 係一般嘅傷風感冒同喉嚨發炎病証, 而今次係佢第2次打敗仗, 之前1次係12月初.

BB依家9個月大, 佢一日一日長大, 一日一日進步, 由當初一舊番薯咁, 到家下四圍爬, 自己企起身, 自己橫行, 自己探索.....不斷尋找新鮮刺激嘅事物, 每當佢能夠以自己嘅能力, 完成自定嘅探險歷程, 佢都會好開心好滿足咁笑, 而呢種充滿童真嘅笑容, 在我嚟講, 係最保貴最珍藏嘅記憶, 希望將來BB長大成人, 佢都能夠保持咁嘅滿足笑容就好喇.

自己推櫈學行

07年1月 - 朗朗豬依家會扶住張有轆嘅搖搖椅or餐椅喺屋企學行, 而我負責幫佢配音, 蝦餃、燒賣、义燒包...又或者…雪糕、雪條、汽水呀咁, 好分工合作架.

到1月尾, 即是朗朗豬9個月大嘅時候, 佢可以自己扶住野企起身, 同扶住d櫃或者櫈自己行黎行去喇。

喺四肢活動呢一方面黎講, 朗朗豬比其他BB學得快, 因為BB會裏面其他同月出生BB, 好多只係識爬到幾步或開始學企下咁; 佢大膽唔怕痛, 只要唔太危險嘅野, 我地都會比佢嘗試, 比佢自己去摸索同發掘, 可能係咁嘅原因, 亦有可能佢係四支發達頭腦簡單型都未定。

朗朗豬橫行無忌....去片 >>

12月爬得好快luu~~

06年11月初, 朗朗豬第一次學識爬行, 至12月底短短兩個月時間, 佢己經爬得好快, 可想而知, 佢嘅活躍及反斗程度係幾咁驚人。

佢依家不但四圍爬, 仲會自己扶住野起身, 同佢參加bb會嘅聖誕party, 比較起其他同月出生嘅bb, 朗朗豬明顯爬得好快好活躍. 佢喺屋企已經爬去邊度都得, 由廳入房又由房出返廳, 總之就係四圍爬。

06年11月4日投降記...去片 >>


06年11月7日爬爬一步曲....去片 >>


06年11月7日爬爬二步曲....去片 >>


06年11月19日初次學企企....去片 >>


06年12月24日變身馬騮仔....去片 >>

06年12月25日行行又企企, bb自由爬....去片 >>


06年12月26日 boxing date去公園玩....去片 >>


06年12月尾通屋爬 http://www.youtube.com/watch?v=PS37NA7gFK0

生命的奇妙與力量

06年10月30日(星期一) 重陽節假期, 天晴, 秋涼天氣, 清爽怡人

時間過得很快, 不經不覺轉眼之間, bb已經6個月大了, 由他嘩.....一聲出生至今, 我們由二人世界, 跳級變為四口之家(連工人), 我們的生活便變得忙碌....變得更充實....也變得更開心, 看着bb每天的成長與進步, 實實在在令我感受到生命的奇妙與力量。

現在, 每天只要細心留意, 都會察覺到bb的改變與進步, 需然每天的進步與改變, 並不是什麼驚天動地的改變, 只是微不足道的進步, 但當每次發現他有所轉變, 都令我感到興奮莫名, 就是這種充滿生命力的興奮感覺, 令我的生活注滿動力, 變得充實, 變得有目標。

6個月大扮牛牛

06年10月22日朗朗豬6個月大, 成日喺度扮牛牛咁, 好想學爬, 但仲未識。

6個月大扮牛牛....去片 >>

到TKO參加半歲生日會

06年10月8日(星期日) 天氣 : 涼涼地, 天晴得黎又陰陰地

今日, 我地一家三口到將軍澳參加半歲生日會, 由於車程較長又路途轉折, 在地鐵上朗朗豬已經倒頭大睡, 去到生日會場地時, 朗朗豬剛好夠鐘要食奶, 所以只好呢喺一邊等朗朗豬食mumum先, 等食飽飽又瞓一陣豬仔覺之後, 朗朗豬就精神飽滿, 跟住豬媽同豬爸到處social, 認識新朋友仔lu.

嘩.....好開心呀!!! 有好多野食, 又有好大個生日疍糕呀, 我地認識到好多新朋友Angus, Angie, 俊鏞, Sophie, 可晴, GiGi, Kimberley, 等等等等, 可惜恆恆今日病左無嚟生日會, 但係恆恆媽咪&爸爸有嚟幫手, 又抱抱朗朗豬同朗朗豬玩, 希望恆恆可以快d好番, 下次出嚟等我抱抱&鍚番佢先.

仲有呀, 生日會中有一個臂王臂后爭霸戰嘅分區賽環節, 0604bb人強馬壯, 朗朗豬當然三甲不入, 但係都有18.5磅重喎, 都算係咁啦, 我都收貨架喇.

BB5個月大

06年9月21日 – 朗朗豬今日5個月大lu,

佢依家每日嘅飲奶量都係無乜進展, 1日4餐共25oz奶, 不過除左奶奶, 每日會另加1/3隻香蕉&半碗糊仔, 都算比之前有進步, bb依家可以坐下sofa邊, 雖然未坐得好隱陣, 但係會坐到成個大老板咁款, 好招積架!!
朗朗豬家陣好鐘意扖喺度玩, 凸起個pat腳撐撐手潑潑, 好似游乾水咁好過隠, 應該係想學爬卦, 不過依家未識住。
三圍是 : 手瓜6寸, 肚腩19寸, 大脾10.5寸, 身高68cm

第一次食糊仔

06年8月21日 – 朗朗豬今剛滿4個月大

由於近呢2個星期, 佢勁厭奶, 由之前6oz x 5下降至依家6.5oz x 4, 仲要唔係餐餐食得晒, 所以決定今日比佢試下食糊仔, 晚上大慨九點開始餵, 初時佢唔係好習慣, 又唔係咁識吞, 慢慢試下試下佢又ok喎, 仲好似幾鐘意食咁忝, 最後, 佢將我開左果半包試食裝全部食晒, 食完之後同佢掃風, 掃完風5分鐘都唔洗, 就瞓到豬仔咁勒。^_^

06年8月29日 – 朗朗豬4個月零1星期大
三圍是 : 手瓜6寸, 肚腩19寸, 大脾9.5寸, 體重7.6kg, 身高65cm(25.5寸)

第一次反身成功

06年8月6日 – 朗朗豬3m16d大

一個要特別紀念的日子, 朗朗豬第一次反身成功了!!!!!!
我見住佢典下典下, 用力向右轉, 終於佢成功左, 轉左扖喺度, 佢扖喺度玩左幾分鐘, 就用盡力拗腰彈返原位, 當佢成功彈返原位後, 先呆一呆, 跟住就哈哈大笑, 好鬼抵死。

BB剛滿3個月

06年7月22日 – BB剛滿3個月

最近朗朗豬開始想翻身, 但仍未成功, 只能腳撐撐轉倒一半, 就彈番原位, 不過佢精力無限, 試完唔得呌一陣又再玩過, 有時連試幾次都唔得, 就會嘰嘰咕咕鬧一輪, 又或者好忟憎發泄不滿, 好攪笑 >_<
三圍 : 手瓜6寸, 肚腩18.5寸, 大脾9.5寸

06年7月24日 – 瑪嘉烈覆診 重量6.71kg, 高度63cm, 頭圍41.5cm

06年7月25日 – 青衣健康院打第3針, 重量6.74kg

朗朗豬雖然最近食奶好曳曳, 唔係次次食晒, 又扭計又發皮氣, 但係體重跳升左一級至中大碼, 姑娘話每個bb喺呢個階段食奶都會唔專心掛住玩, 姑娘話, 話呢個就係聞名喪膽嘅”厭奶期/玩奶期”勒, 過一段時間之後, bb自然就會回復正常食量嘅。

大考驗正式展開敍幕

06年4月24日 – BB二日大, 媽媽大考驗正式展開敍幕

BB出世後兩天便離開育嬰室, 正式交給媽媽照顧, 媽媽當時的傷口仍然很痛, 所以在照顧BB時, 感到十分吃力、非常艱巨。但是能夠抱着BB餵餔、親自照顧BB、親近地看着BB睡覺等等, 還是感到很開心、很滿足、很幸福、很值得的。

當天晚上的探病時間, 爸爸第一次近距離見到BB, 爸爸很想清楚看看BB、親近BB、跟BB拍照留念等等, 但是, 當時有幾個探望BB的朋友不段圍繞在BB身旁, 爸爸根本就不能接近BB, 最後爸爸只能在朋友的隙縫中, 拍到這兩張極為珍貴而又甚具紀念價值的照片。

BB要來也......

06年4月22日 – BB要來也
經過媽媽與BB的一番惡鬥及努力, 媽媽的身體及體力被徹底打敗了, BB終於需要破腹而出。
當我躺在手術床上, 被注入了麻醉針不久, 沒有了難以忍耐的痛楚感覺以後, 便慢慢恢復意識, 我感到手術室內, 原來是這樣的寧靜、緊張、嚴肅及冰冷的, 當我正在想我應該怎樣迎接BB呢? 如果BB第一眼就見到如此狼狽樣子的媽媽, 會有甚麼樣的感想呢? BB會是甚麼樣子呢? 會否很血淋淋呢? BB健康、健全嗎? 我何時可以見到他呢?........
在我這段思索的時候, 我一直以為手術只在準備階段, 仍未正式開始, 因為在”妙手仁心”的手術進行時, 醫生和姑娘一定會有一番醫療對話, 例如醫生會問, BP? Pulse? Injection? 刀, 胶剪, 抺汗, 等等嘅野, 而我當時完全無聽到醫生同姑娘有任何對話, 所以在我的意識中, 手術仍未正式開始的。
就在我這個意識況態之下, 寧靜的手術室突然傳來一聲不太響亮, 又短又局促的嬰兒哭聲, 我當時還在想, 為什麼會有嬰兒哭聲的呢? 莫非是隔壁的手術室傳過來的? 手術室的牆壁太薄了吧, 大約幾秒鐘之後, 再傳來較響亮和較長的嬰兒哭聲, 隨後氣氛突然變得輕鬆, 醫生和護士之間有明快的對話, 大家在確認時間、性別, 之後姑娘們一輪急速的腳步, 快速為BB磅重、打針、清潔、檢查身體狀況等等, 之後我便意識到, 哦…..原來那個嬰兒哭聲, 是來自我的BB, 原來我的BB已經出生了, 噢…..那一刻我真感謝上天啊, 小生命終於誔生了, 而我終於可以”唔洗死”!!!.........人生的起跌實在太快太突然了!!!!!
大慨一、兩分鐘後, 一位姑娘手抱着一個包裏着的小生命來到我面前, 姑娘跟我說, 這便是妳的BB, 請妳看看BB是男或女呢? 當我第一眼看見熟睡中的BB, 我覺得BB實在太漂亮了, 他是我所見最最最美麗的東西, 眼淚已經失控地缺堤湧出, 我強制自己內心的激動, 鎮定地回答姑娘的問題和核對資料, 接着姑娘對我說, 現在會把BB抱出手術室外, 讓他跟爸爸見面和確認。
完成整個手術及休息了一段時間之後, 我同BB一齊被送到產後病房了, 由於我是開刀生產, 暫時不能獨自照顧BB, 所以BB被安排到育嬰室被姑娘照顧, 而我則獨自在病床上休息, 這時麻醉藥漸漸散去, 而我傷口的痛楚就逐漸變大, 就在我獨自在病床上而又不能安睡的時候, 姑娘突然到我的病床邊, 檢查我的身體狀況, 完成檢查時姑娘告訴我, BB將於半小時之後, 就要為他餵餔第一餐奶了。
姑娘問 : 妳希望餵人奶嗎?
我回答 : 我當然希望給BB餵人奶, 但我不能動, 我怕自己不能餵餔他啊!
姑娘說 : 只要你願意忍痛, 慢慢轉動身體至側睡姿勢, 我就會把BB送到妳身邊, 讓他嘗試吸啜人奶的; 只要妳願意, 姑娘一定會幫妳和BB的。
我聽到姑娘這樣鼓勵的說話, 其實我當時的第一個想法是, 可以近距離地見下、接觸下、抱下BB的唯一辦法, 最好就是餵餔人奶了。
於是我就堅定的跟姑娘說 : 好, 我願意嘗試餵餔人奶, 請妳幫我吧!
跟姑娘對話後大慨15分鐘, 姑娘就抱着BB出現在我的床邊, 姑娘教我如何用力支撐身體, 慢慢轉動至側睡姿勢, 其實當時只要稍有郁動, 傷口就好像被千刀萬剮一樣, 痛到入心入肺, 但我當時實在太希望擁抱一下BB了, 於是我忍着痛楚, 成功轉成側睡姿勢, 姑娘便弄醒BB並把他安放在我的旁邊, 在姑娘的協助下, BB成功地吸啜到我的人奶了, 這一刻的感覺, 實在太奇妙太感動了, 實在是一種筆墨難以形容的喜悅、幸福和親密感覺, 是媽媽與BB之間的一個至親至密空間, 而隨着BB吸食人奶的增加, 我的母愛氾濫指數, 也相應地與日俱增。
我漸漸明白一句話 : 一個經驗過生養的喜悅和痛苦的女人, 才是真正的女人。