海泉灣之旅 Day 1

日期 : 2010年4月3日 - 5日 (三日二夜)
地點 : 珠海海泉灣
住宿 : 海泉灣維景大酒店
人數 : 8大4小 (徐宅, 何宅, 謝宅, 黃宅, 共4個家庭)


4月3日早上十時左右, 我地已經抵達尖沙咀中港城碼頭, 輕輕鬆鬆地食早餐, 餐後仲有大把時間行下商場&影下相, 適逢係復活節, 中港城有好多復活蛋及裝飾比遊人影相, 朗豬當然唔執輸, 係咁攬住d復活蛋&兔仔影靚相。


我地乘搭11:30船, 到達中山斗門碼頭, 已經係中午12:45, 過關後即刻一車人去咗橫琴食海鮮宴, 食飽晒就上車去附近遊覽下, 車程途中去咗一個路邊小擋攤買生果, 果度係一d當地人居住嘅地方, 有畜養少少家禽, 雖然只係有幾隻雞雞鴨鴨, 但對於四個豆丁黎講, 已經係難得一見嘅小動物喇!

大慨15分鐘左右嘅車程, 我地去到一個小動物園, 雖然個動物園好細, 不過有兒童遊樂場, 有空曠嘅草地, 又有幾樣動物可以比小朋友近距離接觸下, 班豆丁都玩得好開心, 好滿足。


同馬仔影相, 每張RMB5.00, 騎馬仔環繞一圈, 每次RMB10.00, 小朋友英姿凜凜, 好威風。


餵鱷魚, 5支釣竿RMB10.00, 好緊張刺激呀, 大人細路都玩到哇哇叫, 大頭認為最抵玩。


餵馬騮仔, 疏菜及香蕉一大筲箕, RMB10.00, 小朋友最興奮、最有滿足感。


原本可以用15分鐘就行晒嘅小小動物園, 我地竟然可以玩足2粒鐘呀!!! 四個豆丁滿足晒, 我地就起程去食晚餐。第一日行程完畢。