四歲生日

2010年4月22日 (星期四) 天陰多雲有驟雨, 早上29度悶熱, 晚上氣溫驟跌8度

今日係朗豬嘅四歲生日, 自從我地搬咗新屋, 有咗一個大d嘅廚房, 又忝裝咗一部焗爐之後, 大鼻比以前鐘意入廚, 又會研究下一d焗爐菜式, 比大頭和朗豬一齊品嚐, 今日大鼻就做咗阿茂, 整個生日餅同朗豬慶祝生日。

7點放工返到屋企, 即刻準備用具及用料, 在蛋糕焗盤內塗上植物牛油, pre-heat焗爐15分鐘, 開始攪拌朱古力漿, 再把攪拌好的朱古力漿放入焗爐焗30分鐘, 個蛋糕焗好之後, 要倒出黎吹涼, 大慨吹咗30分鐘後, 朗豬開始按捺不住了, 於是我在蛋糕上寫字, 然後由朗豬負責在蛋糕上灑上小糖粒, 朗豬的生日蛋糕便完成了。

朗豬一路食, 一路話好好味呀, 足足食咗四份一個。

大鼻整嘅第一個生日蛋糕, 得到讚賞亦即刻食清晒, 都算是成功了...yeah!!!


又係時候要update一下朗豬嘅成長進度喇, 佢依家有109.5cm高, 21kg(46磅)重, 著31號鞋仔。

近排鐘意上EVI兒童頻道玩電腦game, 鐘意睇故事書, 仍然好鐘意玩波和球類的遊戲。

大慨半年前佢已經可以自己砌出100塊嘅puzzle, 不過近排好少玩puzzle了。

3個月前已懂得數數目由1到100(包括中文和英文)。

已認識的中文字, 例如 : 木、花、樹、刀、玩具、家、家具、男、女、爸爸、媽媽、姐姐...等等

能串出的英文字, 例如 : Red, Green, Yellow, Brown, Blue, Boy, Girl, Egg, Cat, Dog, Duck, Frog, Horse...等等

懂得穿褲子, 未懂穿衣服, 懂得拉拉鍊, 未懂扣鈕。

懂得穿鞋子, 未懂穿襪子, 要別人協助把襪子套上腳趾, 然後他才能把襪子穿上。

懂得擦牙和漱口, 但不懂把擦牙時的泡泡吐出, 懂得抹面抹手, 未懂扭毛巾。

懂得自己去大便和小便, 懂得自己洗手, 未懂得自己抹便便。

懂得用小童輔助筷子吃飯, 用匙子飲湯, 只要稍為把餸菜剪細, 便可以自己進食, 不用別人的幫忙。

至於模仿巴士的開關門及叮叮聲, 近兩個星期好像減少了一點。

蛻變

2010年4月16日(星期五) 天陰多雲, 間中有驟雨

大鼻今日好開心呀!! 因為今日係朗豬上幼稚園以黎, 第一次得到老師真正的稱讚, 說他有進步、有改善 。作為一個媽媽, 兒子得到別人的認同和稱讚, 固然是高興的, 而我的欣慰, 還包含著另一個隱憂。

朗豬上幼稚園至今, 已經有七個半月了, 亦大概是過了第一個學年的四份之三。回想起他上幼稚園的第一個星期, 我便收到老師三次來電, 說朗豬在學校的表現不佳, ,不過, 這是我的預期之內, 因為朗豬一直以來, 從沒參加任何playgroup和興趣班, 沒有入讀nursery, 更從未試過離開父母家人, 獨自在陌生環境與陌生人相處, 所以我當時的感覺是, 幼園老師是蠻有責任心的, 能經常留意學生, 也能密切跟家長溝通, 很不錯啊!! 怎料一個月...二個月...三個月後..., 老師仍時常和我通電話, 說朗豬的表現不單沒有進展, 問題還持續惡化, 老師要求駐校社工介入觀察朗豬的表現, 其後更要求和我面談, 連社工也要求和我面談, 這時我才漸漸意識到, 問題並非我想像的那麼簡單。

經過三次的面談, 和數十個電話聯絡, 老師終於說出她的想法了, 她懷疑朗豬患有"亞氏保加症"。

〝亞氏保加症（Asperger syndrome, 簡稱AS）是神經發展障礙的一種, 是自閉症的其中一類。外界一般被認為是「沒有智能障礙的自閉症」, 病患者有溝通的障礙以及社交的困難。比較起自閉症患者，亞氏保加症患者通常有較少的語言問題。他們一般都說話流利，但他們的措詞聽起來卻非常拘謹和生硬。另一方面，亞氏保加症患者不會像自閉症患者般普遍地有著學習的困難。而事實上，亞氏保加症患者一般都擁有正常或比正常較佳的智能。對視覺和背誦方面的表現普遍良好，許多科學家和數學家也患有亞氏保加症。
被診斷為亞氏保加症的兒童，必須具有以下三種徵狀：
1) 社交困難 - 自我中心, 不合群, 很少主動與人分享感受或成就 , 較少與別人作眼神接觸或身體接觸
2) 溝通困難 - 不懂使用有意義的言詞與人交往, 鸚鵡式地重覆別人的說話
3) 固執或狹窄興趣 - 一些生活細節或遊戲方式很固執，難於適應環境的改變, 可能終日沉迷某些興趣，例如交通工具、八達通咭或財經資訊等〞

以上資料, 是我從醫學網站上取得的。而根據以上的資料, 朗豬又的而且確, 某程度上有齊了三種徵狀, 難怪老師和駐校社工, 那麼緊張地跟我聯絡了。在駐校社工的建議下, 我同意在2009年年底, 便去信到健康院要求作初步評估, 而我們亦已預約於5月13日到健康院作初步評估。

雖然, 朗豬是否真的患有亞氏保加症, 現在仍言之尚早。但今天老師跟我說 :
第一, 最近朗豬於課堂上, 重覆老師的說話已開始漸漸減少
第二, 朗豬終於在學校交上朋友了, 這兩天他和最要好的兩個朋友仔都有對答交談
第三, 他今日終於願意在上音樂課時, 和同學們一起玩遊戲了

即使是少少的進步和改善, 老師已經非常開心了, 試問我在聽到這些消息的時候, 又怎會不欣慰、不感動呢!!!

海泉灣之旅 Day 3

2010年4月5日 (星期一) 天陰多雲有微雨

今日要準備回程喇, 快樂嘅時光過得特別快, 又係時候講拜拜。


早上食咗早餐之後, 我地就要執好行理, 辦理退房手續, 之後搭車去拱北關口商場行下街shopping兼食lunch。

飯後就起程去斗門碼頭, 準備乘搭4:00pm船回程lu。


落船後, 各人帶著睡眼惺忪的眼神, 懷著依依不捨的心情, 便結束了珠海海泉灣三日二夜之旅。

今次旅程總結 :
最驚喜之處, 就係朗豬嘅零的突破, 佢終於都大個仔, 可以玩機動遊戲喇!!!
最開心之處, 就係四個媽媽吱吱喳喳, 四個爸爸嘰嘰呱呱, 四個豆丁嘻嘻哈哈!!!
最滿意之處, 就係酒店嘅中菜餐廳, 味道好、價錢合理又坐得舒適。
最失望之處, 酒店房安排失當, 神秘島樂園好細, 溫泉不正宗也無特色, 各項設備均比較殘舊。

海泉灣之旅 Day 2

2010年4月4日 (星期日) 兒童節 天陰多雲

今日嘅行程, 係全日留喺海泉灣入面玩, 日間去玩神秘島樂園, 晚上去浸溫泉。

早上食飽飽, 準備起行lu....


由海泉灣維景酒店步行至神秘島樂園, 只需要5分鐘, 非常方便。

今日個天陰陰地無太陽, 有少少涼風, 都幾適合戶外活動...so good!!
我地嘅行走路徑, 係由幸運大道區開始, 到冒險叢林區, 到加勒比海岸區, 到海盜城堡區, 最後到美人魚湖區。

去到加勒比海岸區, 見到有水上單車玩, 班豆丁即刻好興奮, 我地租咗一架大車RMB40玩30分鐘, 可以四家人輪流玩, 啱晒。


之後就去到美人魚湖區, 終於都去到兒童樂園喇, 第一個遊戲係"小火車", 小朋友要用盡氣力來回咁推支槓桿, 架火車仔先至會行, 玩咗一個圈, 班豆丁已經叫晒辛苦, 唔再玩喇。


之後, 見到第二個遊戲"大火車"(機動的), 四個豆丁即刻好開心咁去玩喇。

而呢一次亦係朗豬嘅第一次, 佢終於都玩到機動遊戲喇。

跟住, 見到有旋轉木馬, 我就同朗豬企埋一邊, 望下人地點玩先, 睇咗一轉之後, 朗豬就好有信心咁話 : "我唔驚, 要玩", 於是我就同佢玩....一轉....二轉....三轉, 我地足足玩咗三轉呀, 朗豬真係大個仔喇!!


最後, 我地又租咗四部車電動車, 每部RMB25玩30分鐘, 四家人一齊去片車, 好好玩呀。

之後, 一行人返去酒店附近嘅漁人碼頭, 慢慢散步行咗一轉。

食飽晚飯之後, 就到溫泉區去浸溫泉, 今日玩足一日, 好倦呀!!

第二日行程完畢。

海泉灣之旅 Day 1

日期 : 2010年4月3日 - 5日 (三日二夜)
地點 : 珠海海泉灣
住宿 : 海泉灣維景大酒店
人數 : 8大4小 (徐宅, 何宅, 謝宅, 黃宅, 共4個家庭)


4月3日早上十時左右, 我地已經抵達尖沙咀中港城碼頭, 輕輕鬆鬆地食早餐, 餐後仲有大把時間行下商場&影下相, 適逢係復活節, 中港城有好多復活蛋及裝飾比遊人影相, 朗豬當然唔執輸, 係咁攬住d復活蛋&兔仔影靚相。


我地乘搭11:30船, 到達中山斗門碼頭, 已經係中午12:45, 過關後即刻一車人去咗橫琴食海鮮宴, 食飽晒就上車去附近遊覽下, 車程途中去咗一個路邊小擋攤買生果, 果度係一d當地人居住嘅地方, 有畜養少少家禽, 雖然只係有幾隻雞雞鴨鴨, 但對於四個豆丁黎講, 已經係難得一見嘅小動物喇!

大慨15分鐘左右嘅車程, 我地去到一個小動物園, 雖然個動物園好細, 不過有兒童遊樂場, 有空曠嘅草地, 又有幾樣動物可以比小朋友近距離接觸下, 班豆丁都玩得好開心, 好滿足。


同馬仔影相, 每張RMB5.00, 騎馬仔環繞一圈, 每次RMB10.00, 小朋友英姿凜凜, 好威風。


餵鱷魚, 5支釣竿RMB10.00, 好緊張刺激呀, 大人細路都玩到哇哇叫, 大頭認為最抵玩。


餵馬騮仔, 疏菜及香蕉一大筲箕, RMB10.00, 小朋友最興奮、最有滿足感。


原本可以用15分鐘就行晒嘅小小動物園, 我地竟然可以玩足2粒鐘呀!!! 四個豆丁滿足晒, 我地就起程去食晚餐。第一日行程完畢。