三亞之旅-第二日

2008年9月27日 (星期六) 早上風和日麗, 午後下雨, 晚上清爽

大慨半夜二點, 正當我同大頭瞓到好夢正甜嘅時候, 我突然聽到朗豬飲泣嘅聲音, 初時我仲以為自己發夢, 後來又覺得d聲音好真下, 於是就起身望下, 原來朗豬真係醒咗呀, 佢撐起咗半邊身周圍望, 一路望又一路烏烏聲咁喊, 好淒涼~~

於是我即刻安慰佢, 跟住整支奶比佢等佢鎮定下, 支奶果然有dd安撫作用, 可惜唔能夠令佢即時入睡, 但飲咗之後已經無喊, 仲夠膽落地走動下忝。朗豬一落地要去嘅地方, 原來係搵門口/出口呀, 佢一搵到度門就打開, 跟住仲同我講“要返屋企”, 我實在估唔到佢有呢一著, 當時我手忙腳亂之下仲整嚮咗防盜鐘忝, 死火....即刻捉住朗豬, 閂番好防盜&大門, 再帶返朗豬入房嘅時候, 發現大頭依然同一個睡姿, 郁都無郁過.....oh, my god!!!!

呢個時候, 朗豬已經全無睡意, 佢開始認真地喺房間入面四圍搜索&周圍睇真d, 嘵嚷咗大慨兩粒鐘, 卒之要做晒晚上要做嘅事情, 飲奶, 疴臭臭, 沖涼, 到大慨四點先再安然入睡。

究竟呢兩粒鐘入面, 大頭有無醒過呢, 答案係有嘅, 當我同朗豬剛剛沖完涼嘅時候, 佢就醒咗去廁所, 仲同我對答咗幾句, 之後佢莫視我嘅求救訊號, 再拍拍枕頭又再瞓過, 豈有此理丫.....我當時真係想一野扑濕佢呀!!!!xyz^#z!*^%$#^&
====================================
一覺瞓醒8am, 又係新嘅一日喇! 走去打開個露台窗望下, 哇....原來我地嘅房間對住兩個池, 籃色係游泳池, 綠色係魚池.....好舒服好靚呀!



周圍仲有好多椰樹&草地, 酒店大堂係泰國式嘅尖頂設計, 絕大部份酒店範圍雖然無冷氣, 但一d都唔會焗熱, 反而四周充滿住陽光氣息, 不時吹送著徐徐清風, 好relax啊~~~


我地即刻換衫去酒店食豐富嘅自助早餐, 大頭選擇咗一張室外池邊坐位, 我地食飽飽之後, 大頭就同朗豬去魚池度餵魚仔, 此行一連三日嘅早餐之後, 餵魚仔都成為我地嘅第一個節目, 你地睇下朗豬餵得幾開心。

今日好好太陽呀, 餵完魚仔之後, 我地即刻返房間換泳衣, 去酒店嘅泳池游水, 游完水又食飽飽之後, 就返房瞓晏覺喇, 朗豬瞓醒晏覺嘅時候, 無端端落咗一陣雨, 到陣雨停咗朗豬就醒喇, 我地見未係好夜, 於是就去酒店嘅私人沙灘度行下, 去到時已經無乜人喇, 原來酒店嘅私人沙灘係收6:30pm架, 我地行咗一陣就回程返酒店食晚餐, 第二日圓滿而開心地結束。