再玩ELMO

2008年8月31日 (星期日) 陽光熾熱

朗豬依家好多口, 我地講乜, 佢就跟住講乜, 有時我同大頭傾計, 佢會無端端搭咀, 又不時自問自答, 悶悶地時又會唱下歌仔自娛。

我發覺朗豬對聲音好敏感, 時常會不自覺地, 自己哼唱一d新嘅音樂旋律, 又會對一d特別聲響好有興趣, 經常因為一d古怪聲音, 而笑得前仆後繼, 例如去某d商場廁所, 有電動抹手紙機器, 朗豬一聽到d機器轉出紙張嘅聲音, 就會覺得好有趣、好新奇, 繼而會學習模仿, 然後哈哈大笑、樂在其中、 一玩再玩, 甚至可以留喺廁所玩15分鐘都唔願走。

依家朗豬識講嘢識表達, 大家嘅溝通就變得好互動, 同佢傾計&玩遊戲又好有交流, 佢嘅學習能力&模仿力好強, 呢頭做過嘅動作, 轉頭佢就學得似模似樣, 因此, 爆笑場面不時出現。但有時, 亦另我地覺得好頭痕, 因為佢識得要求、識得爭取, 下下要講交換條件, 少d耐性&心機都唔掂。

呢日朗豬又攞個Elmo玩具出黎玩, 我諗住等佢玩到入晒神之際, 黎個靜靜雞偷拍, 點知一拍就比佢發現咗, 唯有光明正大繼續拍啦, 好在佢都比我拍一陣, 可惜只係分咗心, 唔能夠比大家見到佢嘅食力。再玩Elmo玩具, 去片 >>>