三亞之旅-第一日

2008年9月26日 (星期五) 天陰多雲

今日係三個黃沖出香港去旅行嘅日子, 我地三個都係第一次去海南島架, 真係既擔心又興奮亦緊張呀!

我地晨早6:45am就出發去機場, 雖然朗朗豬比我夾硬攪醒, 但佢都好合作又無扭計, 我地照原定計劃依時抵達機場, 上到飛機時, 朗朗豬亦一路無乜異常, 一去到坐位就好乖扣好安全帶坐定定, 佢個樣仲好醒目又好精神忝。


架飛機由停機坪碌咗十幾分鐘先去到跑道, 就喺飛機差不多起飛之際, 朗豬佢居然......頂唔住......瞓著咗呀, 直至飛到半空隱定狀態, 朗豬先比食物嘅聲音嘈醒, 佢起身之後, 就集中精神食餅餅飲橙汁, 接近著陸時, 朗豬都好雀躍咁睇住窗外綠油油嘅景色。


終於安全著陸喇, 朗豬全程no problem, 我同大頭都即刻鬆一口氣, 真係意想不到咁順利呀。

過咗海關之後就去食午餐, 餐後有幾個行程要去, 包括 : 珍珠工場、水晶工場、土產手信店、貝殼館、蝴蝶谷, 其中朗豬最有興趣嘅就係蝴蝶館入面嘅昆蟲標本勒, 其實五個行程點都無乜特別, 不過點都要影番張到此一遊相啦。

完成晒今個團嘅五個行程之後, 就係晚餐時間, 餐後回程返酒店嘅時候已經係8:30pm喇, 朗豬佢終於响車上瞓著咗, 我抱住佢到達酒店房間, 一放底佢落床, 望下個錶都已經9pm喇, 唔洗5分鐘佢仲打埋鼻寒忝, 今日大家都好倦, 我地都早早上床休息lu。

原本我以為第一日, 已經完滿又順利咁過晒關, 點知半夜有下文.....第二日待續。