黃小二生涯 - 煮權交接

2008年10月12日 (星期日) 天晴多雲

9/Oct - 黃小二生涯第15日, 今日約咗奶奶及2位aunties到葵芳飲茶, 朗豬氹得三位老人家好開心, 表情多多又口水多多, 令佢再次成為主角。飲完茶已經2pm, 於是就返屋企瞓晏覺, 襯朗豬瞓咗, 我仲特意準備一d拿手小菜, 等大頭返黎驚喜下。

10/Oct - 黃小二生涯第16日, 本來今日打算同朗豬去海洋公園, 但因為大頭有新工作, 所以要延期去, 對於朗豬黎講, 又無乜野話失望喎, 因為佢都唔知海洋公園係乜東東, 佢依家最最最愛嘅活動, 係到屋企樓下嘅巴士站睇巴士, 每次起碼要睇半粒鐘先肯走, 依家d司機叔叔都同佢熟晒, 知道佢係小小巴士迷。

11/Oct - 黃小二生涯第17日, 姐姐今日回歸啦, 不過都要晚上9pm先到港, 所以今日實質上, 同平時一樣, 但我嘅心情明顯係有分別, 一方面輕鬆而興奮, 因為終點在望又一切順利, 好快就完成創舉喇。另一方面好緊張, 姐姐會唔會如期返黎呢? 會唔會突然放飛機失蹤呢?? 特別係10pm後, 我嘅心情真係好複雜好忐忑不安。
而朗豬今日又好似有d第六感咁, 午睡時間比平時雙倍加長, 以至晚上嘅瞓覺時間都延遲, 直到10:40pm先肯入房飲奶瞓覺, 我同佢入咗房5-10分鐘, 就聽到電話聲嚮喇, 唔夠10秒, 大頭就入bb房宣佈 : 姐姐已經到咗屋企樓下, 依家返黎喇!!
朗豬一聽到呢個消息, 先停一停然後推開支奶, 跟手即刻出廳去開大門, 然後坐定定喺梳化, 一路望住門口一路話 : 姐姐未黎...姐姐咁耐...姐姐咁耐未黎, 姐姐未黎...姐姐咁耐...姐姐咁耐未黎..........。
其實, 我同朗豬嘅心情一樣咁興奮咁緊張架, 終於, 姐姐出現喇, 朗豬見到姐姐, 只係遠遠地笑住同姐姐對望, 並無飛樸過去, 又唔肯叫姐姐, 更無乜親暱表現。
反而姐姐就熱情得多, 一放低行李, 就即刻攬實朗豬, 一路錫一路話朗豬大個咗又大隻咗, 二個星期已經高好多, 我仲昅到姐姐有小小眼濕濕忝呀。

17日嘅黃小二生涯, 終於順利結束, 我今晚可以舒舒服服瞓餐飽喇, 好嘢! 萬歲! 感謝神! 阿彌陀佛! 亞呢路也! 謝天謝地! 周公我來了!!!!!

黃小二生涯 - 順利倒數中

2008年10月8日 (星期三) 間中有陽光, 間中有微雨

4-6/Oct - 黃小二生涯第10-12日, 日常生活已經好規律化, 我亦可以輕鬆處理好日常家務, 我開始運用一d密碼, 令朗豬可以欣然地讓我完成家務, 依家已經唔再需要打手板, 都可以令佢聽聽話話喇...heeheee

7/Oct - 黃小二生涯第13日, 今日同奶奶一家去拜山, 早上約埋一齊去飲茶, 繼而拜山, 隨後到老三嘅新居玩下, 朗豬今日都好乖, 大家都讚佢大個仔, 識講好多野喇。

8/Oct - 黃小二生涯第14日, 今日約咗班同事食lunch, 兼帶埋朗豬去威下, 同事們見到朗豬都讚不絕口, 話佢識講好多野好叻仔, 做阿媽嘅聽到呢d讚美說話, 當然開心死啦~~~另外, 仲有一樣值得開心嘅, 係晚上我開始有覺瞓喇, 佢今晚只係吚吚哦哦咗兩三次, 就轉身自己再瞓番, 原來佢之前瞓得咁差, 係未習慣同我瞓呀, 終於都開始習慣喇.....ZzzZzzZzzzzz

黃小二生涯 - 中段嘮蘇編

2008年10月3日 (星期五) 天陰多雲, 間中有驟雨

踏入10月份, 天氣漸漸踏入秋季, 微涼的秋意, 總讓人有稍稍停下腳步來的味兒。

適逢今年嘅秋天, 係姐姐第一次放假回鄉的時間, 我一個人要打理一頭家, 買餸、煮飯、做家務、仲要湊仔.....仲要係整整17日忝bor, 我只得一雙手咋, 點做得到呀??? oh, it's impossible!!! >_<

事到如今, 唯有盡量正面d試下啦, 就當比自己一個考驗, 又可以嘗試下, 以另一個身份/角度去過生活, 用咁嘅諗法...心情即刻好小小~~

25/Sept - 今朝一早7am姐姐就出發, 黃小二正式接棒, 今日同平時姐姐星期日放假咁差不多, 最大分別/考驗係晚上, 要同朗豬一齊瞓, 好在....朗豬都肯同我瞓無扭計, 只不過成晚轉來轉去, 又瞓醒好多好多次, 攪到我無乜點瞓就要起身喇。

26-29/Sept - 黃小二生涯第2-5日, 一家三口一齊去三亞旅行, 竟然係意想不到咁開心和順利, 真係開心呀!!!

30/Sept - 1/Oct 黃小二生涯第6-7日, 呢2日大頭都放假, 我地一日喺屋企執下野, 一日同朗豬去下街, 我開始覺得自己嘅EQ唔掂喇, 我原本對自己嘅耐性, 係最有信心嘅一環, 點知....原來最先出事係呢飯喎, 我開始覺得自己好忟憎, 感覺好似好失控好無乎, 時時比朗豬攪到我進退失據, 下下要郁手打手扳先stop到佢, 點算好呢??!! 要諗下計仔先得。

2/Oct - 黃小二生涯第8日, 今日係真真正正一個人面對呢頭家/朗豬, 原來, 一個人湊仔比兩公婆湊仔較易於掌握架, 首先, 我調教一下自己嘅節奏, 刪除返工時嘅效率觀念, 再放輕鬆一下心情&步伐, 果然唔同ddd, 我無咁忟憎時、朗豬又合作咗, 我開始摸索到家庭主婦嘅心得, 有番小小成功感呀!!!

3/Oct - 黃小二生涯第9日, 今日同朗豬返健康院進行2歲半檢查, 結果一切正常, 今次全部合格, yeah....到4歲先再返健康院lu。黃小二生涯剛剛去到一半, 我覺得開始漸入佳景喇, 不過, 真係好疲倦呀, 晚晚無覺好瞓, 又完全無晒私人時間/私人空間, 連去廁所辦事/沖涼/梳洗, 都要以開放式草草完事, 好倦呀...help!!!!
體重 : 16kg(35lb)
腳板 : 16cm

三亞之旅-第四日

2008年9月29日 (星期一) 天陰多雲

今日係三亞之旅嘅最後一日喇, 一早起身我就同朗豬講, 今日要搭飛機走, 食完早餐要執野, 但朗豬就不停咁話, 食完早餐要換泳衣游水水、去沙灘玩沙沙、去波波池玩.....。

朗豬由初到埗一日, 要奪門而出, 到依家唔願走, 仲時時話酒店房間先係佢屋企, 我諗主要原因係 :

1) 有一個大露台, 可以比佢出去活動下


2) 有一個極大浴缸同媽咪一齊沖涼, 仲可以一路沖一路玩沙灘波忝

3) 有呢一張精心設計嘅三一合體床, 平時朗豬可以喺上面點跳都得, 到夜晚瞓覺得既安全又舒適

無論點唔捨得, 我地都要走lu, 餵完魚魚我地返房間執捨行理, 然後搭車到機場。


回程飛機上, 朗豬一路都無瞓覺, 飛機起飛同降落時, 佢都好自然無乜問題, 睇下佢個樣幾醒目仔!!


總結四日嘅三亞之旅, 只係頭一晚有少少阻滯, 其他時候都好順利, 呢個旅行更加係我同大頭意料之外咁開心咁好玩忝, 雖然我地無去過什麼名勝&景點, 只係食、玩、瞓、接近下大自然、陽光、海浪, 但對於我黎講, 呢個旅程肯定是難忘的。

三亞之旅-第三日

2008年9月28日 (星期日) 早上陽光普照, 午後突然滂沱大雨, 晚上清爽

一早醒來就聽到雀仔叫聲, 又見到陽光普照, 我地又高高興興咁去食早餐同餵魚魚, 之後就即刻返房間換上泳衣, 帶齊裝備同沙灘玩具, 向酒店私人沙灘出發...yeah!!

所謂嘅酒店私人沙灘, 其實係亞龍灣沙灘嘅其中一部份, 不過設有太陽傘同沙灘椅, 免費提供比酒店住客用, 我地一踏入個沙灘, 就feel到d沙好幼細又好軟棉棉, 而且周圍環境都好乾淨, 更加無人抛垃圾同放飛劍, 真係一流水準嘅靚沙灘呀!!! 朗豬好快就投入佢嘅堆沙遊戲, 之後大頭仲同佢玩沙灘波。

可惜當日好大浪, 我同朗豬都唔敢落水, 但大頭就好過隱咁, 出去玩咗幾轉跳浪。雖然陽光唔係好猛烈, 但我地玩咗個零鐘頭, 朗豬已經曬到成舊ginger bread咁喇。

於是我地執捨細遠回程返酒店, 返到酒店再去泳池游一陣, 先返房間沖涼換衫然後去醫肚, 食飽飽又係時候要眠一眠, 瞓醒又去食晚餐, 餐後喺酒店周圍散下步, 行下行下又搵到一個細細嘅兒童遊戲室, 裡面有一個兒童恩物-波波池。

於是朗豬又高高興興咁玩咗半個鐘, 之後我地就返房間又沖涼瞓覺lu, 第三日興奮而滿足地完結。