黃小二生涯 - 煮權交接

2008年10月12日 (星期日) 天晴多雲

9/Oct - 黃小二生涯第15日, 今日約咗奶奶及2位aunties到葵芳飲茶, 朗豬氹得三位老人家好開心, 表情多多又口水多多, 令佢再次成為主角。飲完茶已經2pm, 於是就返屋企瞓晏覺, 襯朗豬瞓咗, 我仲特意準備一d拿手小菜, 等大頭返黎驚喜下。

10/Oct - 黃小二生涯第16日, 本來今日打算同朗豬去海洋公園, 但因為大頭有新工作, 所以要延期去, 對於朗豬黎講, 又無乜野話失望喎, 因為佢都唔知海洋公園係乜東東, 佢依家最最最愛嘅活動, 係到屋企樓下嘅巴士站睇巴士, 每次起碼要睇半粒鐘先肯走, 依家d司機叔叔都同佢熟晒, 知道佢係小小巴士迷。

11/Oct - 黃小二生涯第17日, 姐姐今日回歸啦, 不過都要晚上9pm先到港, 所以今日實質上, 同平時一樣, 但我嘅心情明顯係有分別, 一方面輕鬆而興奮, 因為終點在望又一切順利, 好快就完成創舉喇。另一方面好緊張, 姐姐會唔會如期返黎呢? 會唔會突然放飛機失蹤呢?? 特別係10pm後, 我嘅心情真係好複雜好忐忑不安。
而朗豬今日又好似有d第六感咁, 午睡時間比平時雙倍加長, 以至晚上嘅瞓覺時間都延遲, 直到10:40pm先肯入房飲奶瞓覺, 我同佢入咗房5-10分鐘, 就聽到電話聲嚮喇, 唔夠10秒, 大頭就入bb房宣佈 : 姐姐已經到咗屋企樓下, 依家返黎喇!!
朗豬一聽到呢個消息, 先停一停然後推開支奶, 跟手即刻出廳去開大門, 然後坐定定喺梳化, 一路望住門口一路話 : 姐姐未黎...姐姐咁耐...姐姐咁耐未黎, 姐姐未黎...姐姐咁耐...姐姐咁耐未黎..........。
其實, 我同朗豬嘅心情一樣咁興奮咁緊張架, 終於, 姐姐出現喇, 朗豬見到姐姐, 只係遠遠地笑住同姐姐對望, 並無飛樸過去, 又唔肯叫姐姐, 更無乜親暱表現。
反而姐姐就熱情得多, 一放低行李, 就即刻攬實朗豬, 一路錫一路話朗豬大個咗又大隻咗, 二個星期已經高好多, 我仲昅到姐姐有小小眼濕濕忝呀。

17日嘅黃小二生涯, 終於順利結束, 我今晚可以舒舒服服瞓餐飽喇, 好嘢! 萬歲! 感謝神! 阿彌陀佛! 亞呢路也! 謝天謝地! 周公我來了!!!!!