鐘意玩puzzle

2009年4月13日(星期一) 天晴、多雲、天陰、有雨--上午有陽光, 下午有微雨

眨下眼, 朗豬就三歲喇, 佢依家好鍾意跟人口水尾野講, 對有興趣嘅事物, 會不厭其煩咁講好多次, 真係超級長氣袋, 仲會模仿大人講說話時嘅語氣&聲線&方式, 因此而攪出好多笑料&爆笑場面。另一方面, 佢依家嘅學習&記憶能力好強, 我同大頭每日睇住佢漸漸長大, 不時就會有d意外驚喜, 就好似呢一日咁, 朗豬自己攞個puzzle出黎玩, 佢玩下玩下竟然可以自己一手一腳, 砌好一個28塊嘅大puzzle呀。

朗豬砌puzzle上集, 去片 >>

朗豬砌puzzle下集大結局, 去片 >>

P.S. 特別鳴謝 : 西瓜奶奶&西瓜大少送出呢個咁益智嘅玩具比朗豬。

長隆宿一宵@day2

2009年4月11日(星期六) 復活節假期第二天, 天晴, 有陽光, 有微風, 間中有雲

今朝一瞓醒就見到陽光, 今日嘅天氣真係好適宜旅遊, 實在太好喇。

一早起身, 大家食咗一個飽飽嘅自助早餐, 執齊行程&裝備, 醒神地準備出發去今次嘅重點節目-長隆香江野生動物世界。

由酒店去動物園, 我地坐shuttle bus大慨5分鐘就到, 由於我地無事先睇定地圖, 我地喺動物園南門果個站, 就急不及待落車入咗動物園, 所以我地一開始去咗步行區, 睇到d毛牛、海獅、白鷺、馬騮、鸚鵡、鴕鳥、白老虎...等等等等不用盡錄。

再行一陣, 突然見到一d好高嘅物體, 喺我地嘅眼前出現, 嘩.....原來係長頸鹿呀!!!! 我地買咗d樹葉, 同朗豬一齊餵長頸鹿, 原來長頸鹿好大力好喉琴架, 食樹葉食到"sir sir聲"好大聲, 兩野就食晒d樹葉lu....

再行一陣, 去到澳洲區, 睇埋不同品種嘅袋鼠&樹熊, 已經係下午一點啦, 我地又要開始搵食lu~~

我地就喺樹熊館對出搵個地方坐低, 由大頭負責去熟食亭買食物, 經過大頭又辛苦又漫長又勞氣又混亂咁排隊一粒鐘之後, 我地終於食咗兩客雞肶飯。

食飽飯再繼續行程, 去到大笨象園, 嘩...突然之間人山人海, 好多人好迫呀, 攪到朗豬都無晒心機同大笨象影相忝。


跟住去到小小動物世界, 入面有好多唔同嘅動物bb, 例如黑熊、白獅子、小鹿等等, 之後我地仲同白獅子仔一齊影相, 期間朗豬不知幾開心, 係咁摸住隻白獅子仔, 一d都唔驚。

之後, 我地好想趕去乘車遊覽區果度, 睇去亞洲森林、東非草原, 南非高原與及猛獸地帶果度睇動物, 但呢段時間, 實在係太多人喇, 我地為免廷誤行程, 最終都放棄咗無坐車, 雖然大家都有少少失望, 但唔緊要啦, 我地可以下次再組團, 再黎玩多一次吖嘛。

臨走之前, 我地影番張大合照先, 好開心今次嘅"四隻青蛙 Cross Over 四位公主 Mix & Match 三粒蝌蚪 廿載情之2009年春季 大龍鳳激玩豪食旅行團"能夠順利完成。

總括黎講, 今次嘅旅程大家都覺得好成功、好開心, 希望明年我地又可以group埋一齊, 再去玩一次啦。

長隆宿一宵@day1

2009年4月10日(星期五) 復活節假期第一天, 天陰多雲有微風, 間中有陽光

今日我地晨咁早就起身梳洗, 然後飛的去中港城, 我地食咗一頓匆忙嘅早餐之後, 就急急衝閘跑去搭船, 終於全部都趕到, 一行人8大3小, 齊齊向長隆出發....yeah!!!


原本諗住朗豬會喺船上瞓下覺, 養足精神先玩嘅, 點知佢成個船程都好興奮咁睇船船, 完全唔願瞓, 不知幾醒神。

大慨二個半鐘頭嘅車船時間之後, 我地就到咗新長隆酒店喇, 我地全體一致贊成去食餐勁嘅, 於是我地喺酒店內嘅白獅子餐廳, 食咗一個豐富嘅自助午餐, 食到個個嘅肚仔漲卜卜之後, 大家就分組活動喇。

因為朗豬仲細, 歡樂世界入面嘅機動遊戲佢仲未啱玩, 所以我地同朗豬去咗參觀廣州鱷魚公園, 呢個公園嘅位置比較偏遠, 由長隆酒店搭的士, 要差不多20分鐘先到, 個公園入面好少人, 我地可以舒舒服服咁慢慢行慢慢影相, 首先見到一群黑天鵝, 之後, 見到兩隻馬仔, 三隻鹿仔。

再行一陣, 就見到一大一小兩隻河馬, 原來河馬個口係好大好大架, 佢地係咁樣問人攞野食架, 真係好攪笑呀~

朗豬睇河馬睇到唔願走, 佢仲學河馬撐大個口, 問人攞野食。

睇完河馬繼續行, 仲分別見到牛仔, 羊仔, 豬仔, 當然仲有好多好多條唔同品種嘅鱷魚啦, 朗豬第一次近距離睇活生生嘅動物, 佢全程既興奮又好奇亦好大膽咁, 想嘗試接觸下唔同嘅動物。

而我地唯一有接觸嘅動物, 就係呢個龜先人勒!!

總括黎講, 呢個鱷魚公園比較細&舊式, 某d區份會有少少嗅味, 值得睇嘅野唔係咁多, 慢慢散步咁行的話, 都係行兩個鐘就行晒, 但勝在人少唔洗迫兼且平, 買大馬戲票加十蚊就可以去, 都算值得嘅。

行完鱷魚公園, 我地匯合其他朋友, 一齊睇5:30pm嘅大馬戲-森林密碼, 大馬戲表演全程60分鐘, 內容都算精彩&老少咸宜, 最激嘅表演係五個大轆嘅車輪轉, 睇到我同朗豬眼定定好緊張, 最失望係完全睇唔到大象、獅子、老虎等等嘅動物表演, 而最最最失敗嘅, 就係我完全唔記得影相呀...too bad....

表妹也滿月

2009年2月22日(星期日) 天陰多雲有微雨

今日表妹滿月喇, 祝茜瞳表妹 : 身體安康, 笑口常開, 多福多壽, 美麗人生。

今日我地去舅父屋企探舅母和表妹, 同埋一齊食滿月飯, 飯後去舅公屋企玩, 朗豬同表姐兩粒豆豉又跑又跳、玩得好開心、又玩到傻晒, 好難先影到一張正經d嘅相呀。

今日表妹係主角, 本來想同埋表妹一齊影相, 再黎一張三粒豆豉合照架, 但表妹實在太忙又太眼瞓喇, 唯有等下次有機會先再影啦。
擾攘咗一輪兩個小朋友仲係四圍走, 卒之要到婆婆出手, 捉實兩粒豆豉, 先可以正經影返張靚相。

埋身肉博"輪狀病毒"

2009年2月8日-12日 天晴, 乍暖還寒

2月8日(星期日) - 第一天 - 東窗事發
今日一早, 我就比朗豬淒厲嘅喊聲嘈醒, 於是即刻出廳睇吓發生乜事, 原來朗豬肚痾賴屎呀, 佢一見到我仲喊得淒涼d仲大聲d, 我初時仲以為係前一日食得太多太雜, 所以有少少肚痾, 但其後不斷痾咗幾次, 又嘔咗兩次, 之後更加有痾水嘅情況出現, 到下午我發覺唔對路, 於是一家四口出發去醫院睇急証。睇急証時, 朗豬又再嘔一次, 兼且開始有微燒, 醫生話佢已經有缺水現象, 建議入院吊鹽水及觀察, 於是, 埋身肉博正式開始...

2月9日-10日 - 第二天、第三天 - 病情反覆
呢兩日朗豬仍然有痾水, 但已經無嘔、無肚痛, 最令我擔心嘅係朗豬呢兩日以黎, 試過三次突然發高燒, 第一次高燒至攝氏39.9(華氏103.8), 第二次高燒至攝氏41.3(華氏106.3), 第三次高燒至攝氏40.7(華氏105.2), 頭兩次高燒係半夜發生, 第三次係中午發生, 幾次突然高燒都係15分鐘之內發生嘅事, 所以, 我無時無刻都提 心吊膽、細心留意住佢嘅病情變化, 真係好擔心呀!!!
直至第三天嘅晚飯時間, 醫生親自黎通知我地, 終於從朗豬嘅大便中驗出"輪狀病毒 ", 呢隻病輪嘅病徵係大量水樣腹瀉, 嘔吐, 輕微攪肚痛, 有突發性高燒, 病況會反覆出現, 症狀通常持續3-9天。
從醫生口中確認朗豬受"輪狀病毒"感染, 我即時鬆了一口氣。

2月11日(星期三) - 第四天 - 漸趨隱定, 肚餓難擋
朗豬今日無發燒, 又無痾水, 但仍然一日肚痾5-6次, 醫生話今日開始可以飲粥水, 但試問對於一個餓咗三日嘅小朋友黎講, 一碗粥水又點能夠滿足佢呢。佢又嘈又喊話要食野, 飯飯, 粉粉, 麵麵, 曲奇, 餅餅, 麵包, 蛋糕....佢心目中嘅美食, 不斷從口中數出黎, 我實在唔忍心見佢咁肚餓呀, 我終於偷偷地比咗d雞蛋糕, 又比咗d白麵包佢食, 先能夠安撫到佢嘅食慾咋。不過, 見佢開始肚餓, 又開始四圍行&玩玩具, 我都安心好多lu。

2月12日(星期四) - 第五天 - 可以出院了
今日朗豬已經好精神, 只係早上肚痾一次, 醫生巡房時話, 如果下午嘅情況一樣, 傍晚時間就可以出院喇, 醫生只係短短一句說話, 就帶比我無限歡樂、無限希冀、眼中充滿睙光。終於我地無驚無危地渡過咗一個下午, 到傍晚時份, 朗豬首先拆咗個吊鹽水針回復自由, 之後我地就辦出院手續, 返到屋企時已經8點幾, 雖然只係4-5日嘅光景, 但我地已經深深感受到, 一家人一起回家的溫暖和舒適, 遠勝於一切。

經過呢一次埋身肉博, 我同大頭更加堅定不移, 每個人於困難之中, 能夠得到伴侶的扶持和體諒是最重要的, 佢對我嘅細心關懷, 尤勝於千言萬語。