聖誕節之朗朗也飲大

2008年12月28日 (星期日) 天陰多雲, 有微雨

又到聖誕!!! 又到聖誕!!! 今年聖誕節, 朗朗豬有三個聖誕party玩呀, 分別係25日, 26日同28日, 三個party都玩得好開心, 又各有特色。

25日嘅party有幾位小朋友一齊玩, 朗朗豬仲學做咗, 第一個ginger bread忝呀, 呢個就係完成品喇!!









26日嘅party有幾位姨姨親自下廚煮海鮮食, 正....好好味道呀, 玩到high high地, 朗朗豬仲學人吹喇叭忝喎, 好在無貓到咋!!









28日係BBQ Party, 有好多朗朗豬至愛嘅腸仔食呀, 食飽飽之後4位小朋友又跑又跳, 好開心呀!!!

當表姑媽遇見豆苗bb

2008年12月11日 (星期四) 天晴乾燥, 藍天白雲

大鼻做咗表姑媽喇, 第一次見小豆苗時, 佢只得2日大, 瞓得好冧呀!! 個樣用表弟一個餅印仔咁, 好得意好標緻啊!!









第二次見小豆苗, 佢12日大喇, 今次見個佢撐大對眼仔四處望, 個樣完全唔同晒啦, 似番個囡囡樣, 仲似足媽咪忝!!









祝願豆苗bb : 身體健康, 快高長大, 精靈活潑, 福至心靈

鴻 - 三代中國女人的故事, 作者張戎

2008年秋天

睇到呢本書嘅頁面咁殘舊，都知道呢一本唔係新書，佢係大鼻空中樓閣嘅珍藏之一，呢本書自1996年7月就跟隨住我，在我記憶中，今次係第三次翻閱呢本書，而上一次翻閱至今次重溫，又已經相差十年了。

呢本書係以近代中國歷史為背景，中國人的命運及共產黨主義為骨幹，一個家庭的真實往事為情節，配上作者既深入又廣闊的洞察力，緊扣心弦的複雜情節，以細緻筆觸，描述豐富多彩的內容，勾劃出層次分明的正反派角色，以家庭往事寫活了中國近代歷史。我以前對中國近代歷史一竅不通，對中國人有著不可言寓的偏見，對中國人的行為和作事方式，或多或少帶著歧視目光，<鴻>這本書讓我打開了心眼，幫助我了解到什麼是共產主義，什麼是大練鋼、大躍進、三反五反、文化大革命、五一運動等等，更幫助我了解到各種事件，對中國人民的影響和衝擊，以至中國文化的變遷與扭曲。中華人民的苦難和辛酸，只能隨著時間的流逝而沖淡。雖說是相隔多年又是第三次閱讀，但我仍然認為這是一本愛不釋手，一開始便不能放下的好書。

現在，手裏執著這一本舊書，令我不其然的想起一位舊人，與及呢本書背後嘅另一個故事。12年前7月份的某一個晚上，我地飯後到荃灣三聯書店閒逛，我喺新到書堆中發現了這本書，於是隨意的揭開來看，怎料一看就是半個小時，書中情節與作者流暢的文筆，實在吸引著我，令我不願把書放下，於是翻到頁底看看，售價是$99.00，其實也不是什麼昂貴的價錢，但我當時想來想去，也不捨得即時買下，當時我還告訴自己，等到聖誕節或新年時才買給自己，作為這一年給自己的獎勵禮物好了，離開書店以後，還跟同行的人說，很喜歡這一本書，語帶興奮的告訴他，等到年尾出雙糧必定黎買。怎料三幾天之後，我便收一份早到的生日禮物，打開禮物一看，原來就係呢一本書，真係一份好驚喜、好難忘嘅生日禮物啊!!!

事隔十二年，我已經搬家五次，這本書仍然跟隨著我，經歷了人生中十年的百感交集。我不願放棄記憶，也不願埋葬過去，事實上過去亦不能從生命裡割捨，今天的我，都是過去重重疊疊的經歷所造成，今天的智慧，亦是過去縱橫交錯的領悟所堆積得來，我曾在另一編文章中看過，沙漠阿拉伯人形容他們一生必喝的三道茶，第一道苦若生命，第二道甜似愛情，第三道淡如微風。生命的神袐與極美，在於不知道將來，因為不知，才益發神奇而顯得美麗。我們生而複雜，一生中不斷追求，總覺得幸福是遙不可及，却不知道那三道茶，正在等著我們慢慢體會、細細品嚐。

忙碌的11月

2008年11月25日 (星期二) 晴朗, 天氣乾燥

踏入11月份，各區幼稚園都舉辦開放日，與及開始招收09年度入學的幼稚園生，於是我、大頭同朗朗豬都去咗幾間幼稚園參觀，與及同朗朗豬報名及面試。由於我地同朗朗豬，之前並無參加過任何學校嘅面試，所以第一次嘅幼稚園面試，喺完全無準備之下失敗咗。

正所謂失敗仍成功之母，嘗試咗失敗嘅經驗之後，我地再去其他幼稚園面試之前, 我會事先同朗朗豬有小小briefing，希望佢會有ｄｄ心理準備，而發揮到佢應有嘅水準，好在…朗朗豬往後嘅面試，都表現得好好又有問有答，終於我地收到心儀學校嘅通知信，朗朗豬已被取錄為09年上午校A班幼稚園生，整個申請入學過程都算順利，大鼻媽可以放下心頭大石…唔洗再煩喇…Yeah!!!

11月份亦係婆婆(大鼻阿媽)生日嘅日子，當日我地一班子子孫孫，中午同婆婆飲茶，然後熱熱鬧鬧去到婆婆屋企，麻鵲耍樂及切生日蛋糕，晚上就拉大隊到荃灣客家好棧食晚飯，共渡了一個快樂的星期天。弟婦Jenny個肚依家有7個月啦，佢嘅預產期係09年1月尾，大家都好開心好期待一位新成員嘅加入，以後我地嘅家庭聚會，將會更加熱鬧、更加嘈吵，唔知佢最終係老鼠囡囡? 定係牛牛囡囡呢?? 大鼻即將升級為姑媽，朗朗豬即將升級為表哥，諗起都覺得好心急好興奮啊~~~

親親大自然

2008年11月2日 (星期一) 天陰多雲, 間中有驟雨

今日相約幾個bb會嘅朋友仔, 一齊去大埔一日遊, 第一個行程係去大埔海濱公園, 公園入面有好多大草地, 可以比小朋友跑下, 朗朗豬一見有草地, 就好興奮係咁跑來跑去又玩波波, 另一邊草地仲有好多人放風箏, 朗朗豬見到覺得好新奇, 不斷咁問果d係咪雀仔飛飛 ??


玩咗一陣開始有少少雨粉, 放是我地轉地頭去室內, 行下公園入面嘅昆蟲館, 館入面有好多大大小小嘅昆蟲標本, 小朋友一面驚一面睇, 行完昆蟲館出黎已經停雨喇, 於是我地起程去下一個行程, 小白鷺餐廳BBQ。

我地今次係第一次去小白鷺餐廳, 原來呢度好靚好舒服呀, 對住一個平靜如鏡嘅小湖, 環境既優美又寧靜, 地方乾淨又寬敞, BBQ嘅食物又好味, 今次真係抵晒!!


食飽飽又係小朋友嘅活動時間喇, 去到親親小羊區, 見到大大小小十幾隻羊仔喺鐵欄入面, 仲有2-3隻羊BB走咗出黎忝, 朗朗豬第一次近距離接觸羊仔, 好開心又好雀躍, 首先要餵下、跟住要摸下、之後仲話要鍚下忝bor。

餵羊咩咩食草, 去片 >>>


之後, 順道去參觀michelle姨姨嘅新居, 點知坐坐下又食埋晚飯忝, 真係多謝michelle姨姨盛情款待, 又細意安排咁豐富嘅行程節目, 成班小朋友都玩得好開心&好投入, 有機會的話一定要去大埔海濱公園再玩過, 今日玩足一日, 大人細路都倦到散晒luuu