鸚鵡-九號風球

2008月22日 (星期五) 九號風球, 颱風鸚鵡, 正面吹襲香港


今次已經係今年嘅第三個打風假期喇, 上個月第一次打八號風球有半日假期, 而今個月就有兩次全日假期, 今次呢個颱風叫鸚鵡, 係一個風力強勁嘅颱風, 所以, 喺下午一點四十分, 更掛上了九號風球呢。
哇...今年個個颱風都吹到正香港, 究竟係好定唔好呢?? 我地能夠有意外假期, 當然喜出望外啦, 但咁諗又好似自私咗少少呀....

轉頭字的願望

2008年7月22日 (星期二) 大暑, 溫度高升, 陽光熾熱

經過咗一個多月, 日日滂沱大雨嘅悶氣日子之後, 呢幾日終於都見到陽光燦爛的日子喇, 喺屋企悶咗咁多個星期, 終於"放監"喇....yeah!!

十年一度嘅轉字頭盛會又黎喇!!! 回想番上兩次轉字頭嘅時候, 都會覺得轉咗字頭之後, 已經好大個又好老餅喇, 但今次嘅感覺又唔係喎, 我反而覺得自己仲好青春、好有活力。死.. .. ..幣加火!!! 唔知呢d係咪老餅ed嘅"唔認老心態"呢??!!

每年臨近大鼻嘅牛一, 都會有幾班至密好友, 老早就call定我, 約出黎食飯兼慶祝, 而且係從一相識到依家, 都從不間斷又不厭其煩咁約, 有時真係會令我有ddd內疚架, 如果唔係呢d咁有心嘅老友, 我諗....我極有可能, 係會連自己嘅生日都忘記呀(唔係講笑)。而大鼻嘅至密好友, 可以分為3個幫派, 排名次序以相識日子計 :

太極派 - 係開山劈石嘅舊同學, 由於大家識於微時, 大家一齊成長, 一齊走過人生的各樣第一次, 又一齊經歷/面對人生嘅每一個階段, 感覺已經唔係好朋友咁簡單, 而係好似親人/家人feel咁, 有時覺得好親切, 但有時又覺得好疏離, 因為有好多嘢, 已經盡在不言中。

乞兒幫 - 係第一份工認識嘅舊同事, 呢班係我嘅老友兼死黨, 同佢地一齊可以食得、飲得、玩得、乜都傾講得、又乜都笑餐飽, 每次同佢地見面, 都會好熱鬧、好嘈吵又好盡慶, 盡管我地每人嘅性格都各不相近, 但好明顯....我地都係癡癡呆呆坐埋一枱。

娥眉派 - 全女班飛記舊同事, 不經不覺間, 同佢地都相識咗十幾年喇, 呢班係好正正經經嘅朋友, 有情有義又有心, 無論點都一定會記得我, 而且仲無限次寬恕, 我呢個無性記又無貢獻嘅一份子。

大鼻自覺好幸運, 能夠有咁多VSOP級嘅好朋友, 共渡人生開心快樂嘅時刻, 亦有分擔憂傷、互相扶持嘅片段, 今年嘅轉字頭生日飯局, 特別覺得開心、難忘又盡興, 我今年嘅生日願望係 : 三個黃身體健康, 世界和平。

其實, 除咗以上3大幫派之外, 大鼻仲有好多不同門派、兩脇插刀嘅同事及朋友, 又有一d永藏心底、永遠感激嘅知己朋友, 不過我份人好被動, 無記性又大瞢, 唔識得關心人, 永遠唔記得朋友嘅生日, 更加唔會記得買禮物, 所以就襯呢次轉字頭生日, 許多一個願望, 希望咁多位知己、好朋友、老友、死黨、同事一直包容/寬恕, 我呢個末期老人癡呆證患者, 直到永遠...阿門。

朗朗豬與黑芝麻

2008年7月13日 (星期日) 天陰多雲, 間中有驟雨
今日係May姨沙田寶寶店的喬遷之日, 今朝起身見天色陰陰地但無落雨, 間中仲有少少陽光, 從厚實的雲層中透視出來, 可惜大頭今日有外快job, 唔能夠一齊去沙田新店贈慶。直至10:00am天氣都唔太差, 大鼻決定同朗朗豬起程去沙田, 恭賀寶寶店開張之喜。


哇....呢度好多嘢玩又好多嘢食呀!!! 朗朗豬四圍跑跑跳跳, 有好多表舅父&表姨姨同佢玩, May姨婆仲讚朗豬有手尾好乖仔忝bor! 又玩又食咁渡過咗一個好開心嘅下午之後, 大慨3:30pm我地就回程lu。

當返到屋企樓下時, 我地見到有個大哥哥, 同隻黑蚊蚊嘅狗仔玩掟波仔, 朗豬好似同佢地好熟絡, 自自然然行去join埋一齊玩, 佢同隻狗仔似乎好friend咁, 又摸下、又錫下、仲有握手忝, 隻狗仔好叻、好乖又好純, 佢擁有一身軟棉棉嘅黑色鬈髦, 聽主人講, 原來佢叫做"芝麻"呀, 朗朗豬同芝麻玩咗半粒鐘, 先至依依不捨咁返屋企, 臨走時仲大大聲聲咁講 "巴拜...施麻"

朗朗豬與黑芝麻, 去片 >>>

勿以善小而不為

2008年7月9日-7月12日 - 向世界出發(第三輯) - 余慕蓮 - 貴州山區

TVB的節目簡介，是這樣形容的：
余慕蓮，沒有結婚，沒有兒女，亦非有錢人，但她卻在晚年，用自己的積蓄，於貴州的深山，興建了一間學校。.......究竟這一間學校，如何將余慕蓮人生的一個遺憾，變成一班小朋友的希望？ 穿梭於貴州的深山，她領略人到黃昏的另一種人生，另一種智慧。

看罷節目才知道，原來余慕蓮今年已經70歲了。她於65歲退休時，拿到一筆20萬的退休金，她於機緣巧合之下，知道貴州的阿市鄉，沒有一所正式的學校，讓貧窮山區小朋友讀書，於是她便捐出8萬元，興建一所正式的學校－余慕蓮希望小學，讓鄰近貧窮山區的學童，能在合適設備的校舍上課。

余慕蓮於專輯內說 : 「想不到我的學校，有那麼多學生在讀書，我只是付出了一點點，就讓那裡多小朋友受惠，我真的好高興。......我好開心，因為自己的學校能夠讓小朋友受惠，因為我好喜歡好學的人，看到別人有書可讀，我就很開心。......其實我真的沒甚麼錢，不過我捨得捐出來，其實好多有心人都會跟我一樣捐學校，結果就有更多小朋友受惠了！這算不上偉大，只是拿出了一份真心而已！」


一路以黎，我對余慕蓮呢個藝人，最深刻就係佢經常被醜化嘅外形，佢一直都擔任住一ｄ唔起眼嘅小人物角色，感覺就似一ｄ熟悉嘅草根階層，又似喺身邊嘅左鄰右里咁，記憶中，並無凸出嘅代表作, 亦無乜令人留下無深刻印象。直至睇咗呢一輯節目，我先對佢嘅背景有深入ｄ嘅認識，原來佢嘅身世都幾可憐，因為自少父母離異而居無定所，所以要到17歲先能夠小學畢業。


靠著堅定的信念，靠著努力不懈的精神，就像大部份的草根階層一樣，一生人最大的祈望，就是擁有屬於自己的物業。已介晚年的她，雖然唔係好有錢，回望一生亦無乜特別成就，但佢擁有一顆真成而善良嘅心，和知足常樂嘅胸懷，雖然她話自己算不上偉大，亦唔覺得自己捐出／付出咗好多，但我卻被她的言語和行動，而深深受到感動。就鏡頭所見，當佢見到自己嘅捐獻，能夠幫助到幾佰名山區貧窮小朋友到學校上課，嗰種欣慰同滿足嘅笑容，實在比任何成就，更來得自豪和驕傲！


「勿以善小而不為，一顆善心，一個普通人，同樣可以令世界更美好！」我覺得，呢句簡簡單單嘅說話，好有深度又好感動，呢一輯節目好有heart，我會將佢銘記於心。

自學夾喼舞

2008年7月8日(星期二) 下雨天, 烏雲密佈, 間中有橫風橫雨

今年夏天真係好多雨水呀, 7月頭只係出現咗2日太陽天, 又變番日日落雨luu....

依家每晚8:00至9:30都係朗豬嘅睇碟時段, 佢不嬲都鐘意睇d兒歌碟, 而近期最鐘意睇嘅係Barney, 每次都講要睇Barney, Baby Bob, BJ咁, 我漸漸發覺朗豬從Barney碟中, 學識咗好多生字、歌仔同常識, 近排仲學埋跳土風舞忝, 但朗豬已經對影相機有認識又好敏銳, 佢唔會好似以前咁任我影喇, 所以, 依家要同佢影相/拍video真係好有難度, 呢晚佢睇睇下碟又起舞喇, 我真係好想拍底佢嘅有趣舞姿呀......一於從後偷拍!!

朗豬自學夾喼舞, Ac....tion >>>>