呢個週末我已經打定輸數，預咗無街去喺屋企渡過，因為天文台預告 : 6月13日-15日連續三天都天陰多雲，間中有雨及有幾陣狂風雷暴。點知今日一瞓醒，發現無落雨不特止，仲有一個大太陽忝，呢個真係太陽伯伯比我地嘅意外驚喜呀!!
為咗唔好浪費呢個咁難得嘅好天氣，我地決定去一個遠離城市嘅地方走動下，我地上網睇晒基本資料，又執捨好一d輕便用品之後，就出發去天水圍濕地公園lu.....
雖然路途遙遠而車程又耐，但朗豬一直都好興奮，搭車時不停咁講野&唱歌。去到目的地，我地首先參觀室內展覽館，由於今日人數唔係咁多，呢度嘅空間又夠大，朗豬無時停咁四圍跑跑跳跳。
唔講你地唔知呀，當日周圍都貼出天文台告示，話雷暴警告現正生效，但我地由展館望出去濕地公園，真係見到籃天白雲、陽光明媚架，真係天有不測之風雲勒。
參觀完室內展觀館，我地就到戶外公園漫步，呢度一共有六個濕地保護區，沿途有不同品種的喬木、灌木及草本植物，又有好多於城市難得見到的小昆蟲、小生物、小紅蟹、彈塗魚，又見到小灣鱷貝貝及四條小鱷魚，唔知點解貝貝係獨自住喺一個叫做"貝貝之家"嘅水池屋，無得同另外四條小鱷魚一齊生活架，我覺得貝貝佢好慘、好孤獨又好苦悶呀......
全日唯一另我地有ddd失望，就係無乜點見到雀鳥呀，可能依家唔係候鳥遷徙季節，所以無乜雀鳥喺度啦!! 不過朗豬沿途把口都無停過，不時就會聽到佢大叫："有蝴蝶呀....有蟻蟻呀....有蟲蟲呀....有蝸牛呀....有蜘蛛呀...."，佢仲會追住d蝴蝶玩捉迷藏，不知幾開心呀!!!
我地一直行到五點收館，先依依不捨地離開，今日真係玩到好倦，成身散晒呀!!!!
今日呢個濕地公園之旅，係我地一家三口嘅即興節目&意外收獲，點解我會一再強調呢? 原因喺今個月嘅四個星期日裡面，大頭有三個星期日都要開工，只有呢個星期日全日放假，而今日又意外地好天氣，意外地風和日麗，真係多謝太陽伯伯對我地嘅眷顧，感激又感動...^_^
