鐘意玩puzzle

2009年4月13日(星期一) 天晴、多雲、天陰、有雨--上午有陽光, 下午有微雨

眨下眼, 朗豬就三歲喇, 佢依家好鍾意跟人口水尾野講, 對有興趣嘅事物, 會不厭其煩咁講好多次, 真係超級長氣袋, 仲會模仿大人講說話時嘅語氣&聲線&方式, 因此而攪出好多笑料&爆笑場面。另一方面, 佢依家嘅學習&記憶能力好強, 我同大頭每日睇住佢漸漸長大, 不時就會有d意外驚喜, 就好似呢一日咁, 朗豬自己攞個puzzle出黎玩, 佢玩下玩下竟然可以自己一手一腳, 砌好一個28塊嘅大puzzle呀。

朗豬砌puzzle上集, 去片 >>

朗豬砌puzzle下集大結局, 去片 >>

P.S. 特別鳴謝 : 西瓜奶奶&西瓜大少送出呢個咁益智嘅玩具比朗豬。

表妹也滿月

2009年2月22日(星期日) 天陰多雲有微雨

今日表妹滿月喇, 祝茜瞳表妹 : 身體安康, 笑口常開, 多福多壽, 美麗人生。

今日我地去舅父屋企探舅母和表妹, 同埋一齊食滿月飯, 飯後去舅公屋企玩, 朗豬同表姐兩粒豆豉又跑又跳、玩得好開心、又玩到傻晒, 好難先影到一張正經d嘅相呀。

今日表妹係主角, 本來想同埋表妹一齊影相, 再黎一張三粒豆豉合照架, 但表妹實在太忙又太眼瞓喇, 唯有等下次有機會先再影啦。
擾攘咗一輪兩個小朋友仲係四圍走, 卒之要到婆婆出手, 捉實兩粒豆豉, 先可以正經影返張靚相。

埋身肉博"輪狀病毒"

2009年2月8日-12日 天晴, 乍暖還寒

2月8日(星期日) - 第一天 - 東窗事發
今日一早, 我就比朗豬淒厲嘅喊聲嘈醒, 於是即刻出廳睇吓發生乜事, 原來朗豬肚痾賴屎呀, 佢一見到我仲喊得淒涼d仲大聲d, 我初時仲以為係前一日食得太多太雜, 所以有少少肚痾, 但其後不斷痾咗幾次, 又嘔咗兩次, 之後更加有痾水嘅情況出現, 到下午我發覺唔對路, 於是一家四口出發去醫院睇急証。睇急証時, 朗豬又再嘔一次, 兼且開始有微燒, 醫生話佢已經有缺水現象, 建議入院吊鹽水及觀察, 於是, 埋身肉博正式開始...

2月9日-10日 - 第二天、第三天 - 病情反覆
呢兩日朗豬仍然有痾水, 但已經無嘔、無肚痛, 最令我擔心嘅係朗豬呢兩日以黎, 試過三次突然發高燒, 第一次高燒至攝氏39.9(華氏103.8), 第二次高燒至攝氏41.3(華氏106.3), 第三次高燒至攝氏40.7(華氏105.2), 頭兩次高燒係半夜發生, 第三次係中午發生, 幾次突然高燒都係15分鐘之內發生嘅事, 所以, 我無時無刻都提 心吊膽、細心留意住佢嘅病情變化, 真係好擔心呀!!!
直至第三天嘅晚飯時間, 醫生親自黎通知我地, 終於從朗豬嘅大便中驗出"輪狀病毒 ", 呢隻病輪嘅病徵係大量水樣腹瀉, 嘔吐, 輕微攪肚痛, 有突發性高燒, 病況會反覆出現, 症狀通常持續3-9天。
從醫生口中確認朗豬受"輪狀病毒"感染, 我即時鬆了一口氣。

2月11日(星期三) - 第四天 - 漸趨隱定, 肚餓難擋
朗豬今日無發燒, 又無痾水, 但仍然一日肚痾5-6次, 醫生話今日開始可以飲粥水, 但試問對於一個餓咗三日嘅小朋友黎講, 一碗粥水又點能夠滿足佢呢。佢又嘈又喊話要食野, 飯飯, 粉粉, 麵麵, 曲奇, 餅餅, 麵包, 蛋糕....佢心目中嘅美食, 不斷從口中數出黎, 我實在唔忍心見佢咁肚餓呀, 我終於偷偷地比咗d雞蛋糕, 又比咗d白麵包佢食, 先能夠安撫到佢嘅食慾咋。不過, 見佢開始肚餓, 又開始四圍行&玩玩具, 我都安心好多lu。

2月12日(星期四) - 第五天 - 可以出院了
今日朗豬已經好精神, 只係早上肚痾一次, 醫生巡房時話, 如果下午嘅情況一樣, 傍晚時間就可以出院喇, 醫生只係短短一句說話, 就帶比我無限歡樂、無限希冀、眼中充滿睙光。終於我地無驚無危地渡過咗一個下午, 到傍晚時份, 朗豬首先拆咗個吊鹽水針回復自由, 之後我地就辦出院手續, 返到屋企時已經8點幾, 雖然只係4-5日嘅光景, 但我地已經深深感受到, 一家人一起回家的溫暖和舒適, 遠勝於一切。

經過呢一次埋身肉博, 我同大頭更加堅定不移, 每個人於困難之中, 能夠得到伴侶的扶持和體諒是最重要的, 佢對我嘅細心關懷, 尤勝於千言萬語。

恭喜恭喜..精神爽利

2009年1月26日(星期一) 天陰多雲, 間中有陽光

朗朗豬首先祝各位 : 新年快樂, 恭喜發財, 精神爽利

今日係己丑牛年大年初一, 今年我為朗朗豬準備咗一件賀年服, 等佢出去同各位長者親戚拜年時, 可以增忝節日氣氛, 可惜我預錯咗朗朗豬嘅粗壯身形, 件衫著上身顯得稍為窄又稍為短, 不過, 都算係醒醒目目嘅, 睇下佢同嫲嫲拜年時, 幾咁開心...嘻嘻!!

2009年1月27日 (星期二) 天陰密雲, 間中有微雨

大年初二, 我地去屯門同婆婆開年, 順道探望剛剛出世幾日嘅表妹, 唔見兩日表妹又靚囡咗呀, 瓜子口面、眉清目秀、白白淨淨, 似足媽媽咁一個美人胚子。表姐同朗朗豬都好鍚表妹, 仲要抱住表妹影番張相忝。


好耐無同婆婆影相喇, 襯住大家著得靚靚, 臨走時同婆婆影多張合照先。

學識踩單車

2009年1月24日 (星期六) 天陰寒冷

朗朗豬2歲9個月大, 身高已經接近有一米, 以前玩開果部細單車仔, 已經頂膝頭哥啦, 所以我地襯上個月中, 永安有大減價時, 出咗部新車比朗朗豬, 佢初初玩呢部單車仔時, 未夠腳長唔可以好暢順咁踩, 於是佢就半步半步咁踩, 大慨玩咗一個月倒腳又長咗, 先真正學識點樣踩單車, 佢依家每日都要踩住單車仔去睇巴士、去球場打波, 好招積架。

朗朗豬踩單車仔, 去片 >>>

去球場打波

2008年12月31日 (星期三) 天陰多雲有微雨

朗朗豬2歲9個月大, 比一般小朋友大件頭, 唔識佢嘅人都會以為佢有3歲幾, 佢依家嘅至愛活動, 第一位依然係睇巴士, 第二位係打波, 包括藍球、羽毛球、足球、所有球類, 第三位喜歡係踩單車仔。呢個聖誕節假期, 我再同朗朗豬去球場玩, 發現佢已經學到少少哄球技巧, 仲會識得轉用左右手, 又拍到幾下忝呀。

朗朗豬打藍球, 去片 >>>

打打下藍球, 佢仲會走去入藍忝, 去片 >>>

聖誕節之朗朗也飲大

2008年12月28日 (星期日) 天陰多雲, 有微雨

又到聖誕!!! 又到聖誕!!! 今年聖誕節, 朗朗豬有三個聖誕party玩呀, 分別係25日, 26日同28日, 三個party都玩得好開心, 又各有特色。

25日嘅party有幾位小朋友一齊玩, 朗朗豬仲學做咗, 第一個ginger bread忝呀, 呢個就係完成品喇!!









26日嘅party有幾位姨姨親自下廚煮海鮮食, 正....好好味道呀, 玩到high high地, 朗朗豬仲學人吹喇叭忝喎, 好在無貓到咋!!









28日係BBQ Party, 有好多朗朗豬至愛嘅腸仔食呀, 食飽飽之後4位小朋友又跑又跳, 好開心呀!!!

忙碌的11月

2008年11月25日 (星期二) 晴朗, 天氣乾燥

踏入11月份，各區幼稚園都舉辦開放日，與及開始招收09年度入學的幼稚園生，於是我、大頭同朗朗豬都去咗幾間幼稚園參觀，與及同朗朗豬報名及面試。由於我地同朗朗豬，之前並無參加過任何學校嘅面試，所以第一次嘅幼稚園面試，喺完全無準備之下失敗咗。

正所謂失敗仍成功之母，嘗試咗失敗嘅經驗之後，我地再去其他幼稚園面試之前, 我會事先同朗朗豬有小小briefing，希望佢會有ｄｄ心理準備，而發揮到佢應有嘅水準，好在…朗朗豬往後嘅面試，都表現得好好又有問有答，終於我地收到心儀學校嘅通知信，朗朗豬已被取錄為09年上午校A班幼稚園生，整個申請入學過程都算順利，大鼻媽可以放下心頭大石…唔洗再煩喇…Yeah!!!

11月份亦係婆婆(大鼻阿媽)生日嘅日子，當日我地一班子子孫孫，中午同婆婆飲茶，然後熱熱鬧鬧去到婆婆屋企，麻鵲耍樂及切生日蛋糕，晚上就拉大隊到荃灣客家好棧食晚飯，共渡了一個快樂的星期天。弟婦Jenny個肚依家有7個月啦，佢嘅預產期係09年1月尾，大家都好開心好期待一位新成員嘅加入，以後我地嘅家庭聚會，將會更加熱鬧、更加嘈吵，唔知佢最終係老鼠囡囡? 定係牛牛囡囡呢?? 大鼻即將升級為姑媽，朗朗豬即將升級為表哥，諗起都覺得好心急好興奮啊~~~

親親大自然

2008年11月2日 (星期一) 天陰多雲, 間中有驟雨

今日相約幾個bb會嘅朋友仔, 一齊去大埔一日遊, 第一個行程係去大埔海濱公園, 公園入面有好多大草地, 可以比小朋友跑下, 朗朗豬一見有草地, 就好興奮係咁跑來跑去又玩波波, 另一邊草地仲有好多人放風箏, 朗朗豬見到覺得好新奇, 不斷咁問果d係咪雀仔飛飛 ??


玩咗一陣開始有少少雨粉, 放是我地轉地頭去室內, 行下公園入面嘅昆蟲館, 館入面有好多大大小小嘅昆蟲標本, 小朋友一面驚一面睇, 行完昆蟲館出黎已經停雨喇, 於是我地起程去下一個行程, 小白鷺餐廳BBQ。

我地今次係第一次去小白鷺餐廳, 原來呢度好靚好舒服呀, 對住一個平靜如鏡嘅小湖, 環境既優美又寧靜, 地方乾淨又寬敞, BBQ嘅食物又好味, 今次真係抵晒!!


食飽飽又係小朋友嘅活動時間喇, 去到親親小羊區, 見到大大小小十幾隻羊仔喺鐵欄入面, 仲有2-3隻羊BB走咗出黎忝, 朗朗豬第一次近距離接觸羊仔, 好開心又好雀躍, 首先要餵下、跟住要摸下、之後仲話要鍚下忝bor。

餵羊咩咩食草, 去片 >>>


之後, 順道去參觀michelle姨姨嘅新居, 點知坐坐下又食埋晚飯忝, 真係多謝michelle姨姨盛情款待, 又細意安排咁豐富嘅行程節目, 成班小朋友都玩得好開心&好投入, 有機會的話一定要去大埔海濱公園再玩過, 今日玩足一日, 大人細路都倦到散晒luuu

黃小二生涯 - 煮權交接

2008年10月12日 (星期日) 天晴多雲

9/Oct - 黃小二生涯第15日, 今日約咗奶奶及2位aunties到葵芳飲茶, 朗豬氹得三位老人家好開心, 表情多多又口水多多, 令佢再次成為主角。飲完茶已經2pm, 於是就返屋企瞓晏覺, 襯朗豬瞓咗, 我仲特意準備一d拿手小菜, 等大頭返黎驚喜下。

10/Oct - 黃小二生涯第16日, 本來今日打算同朗豬去海洋公園, 但因為大頭有新工作, 所以要延期去, 對於朗豬黎講, 又無乜野話失望喎, 因為佢都唔知海洋公園係乜東東, 佢依家最最最愛嘅活動, 係到屋企樓下嘅巴士站睇巴士, 每次起碼要睇半粒鐘先肯走, 依家d司機叔叔都同佢熟晒, 知道佢係小小巴士迷。

11/Oct - 黃小二生涯第17日, 姐姐今日回歸啦, 不過都要晚上9pm先到港, 所以今日實質上, 同平時一樣, 但我嘅心情明顯係有分別, 一方面輕鬆而興奮, 因為終點在望又一切順利, 好快就完成創舉喇。另一方面好緊張, 姐姐會唔會如期返黎呢? 會唔會突然放飛機失蹤呢?? 特別係10pm後, 我嘅心情真係好複雜好忐忑不安。
而朗豬今日又好似有d第六感咁, 午睡時間比平時雙倍加長, 以至晚上嘅瞓覺時間都延遲, 直到10:40pm先肯入房飲奶瞓覺, 我同佢入咗房5-10分鐘, 就聽到電話聲嚮喇, 唔夠10秒, 大頭就入bb房宣佈 : 姐姐已經到咗屋企樓下, 依家返黎喇!!
朗豬一聽到呢個消息, 先停一停然後推開支奶, 跟手即刻出廳去開大門, 然後坐定定喺梳化, 一路望住門口一路話 : 姐姐未黎...姐姐咁耐...姐姐咁耐未黎, 姐姐未黎...姐姐咁耐...姐姐咁耐未黎..........。
其實, 我同朗豬嘅心情一樣咁興奮咁緊張架, 終於, 姐姐出現喇, 朗豬見到姐姐, 只係遠遠地笑住同姐姐對望, 並無飛樸過去, 又唔肯叫姐姐, 更無乜親暱表現。
反而姐姐就熱情得多, 一放低行李, 就即刻攬實朗豬, 一路錫一路話朗豬大個咗又大隻咗, 二個星期已經高好多, 我仲昅到姐姐有小小眼濕濕忝呀。

17日嘅黃小二生涯, 終於順利結束, 我今晚可以舒舒服服瞓餐飽喇, 好嘢! 萬歲! 感謝神! 阿彌陀佛! 亞呢路也! 謝天謝地! 周公我來了!!!!!

黃小二生涯 - 順利倒數中

2008年10月8日 (星期三) 間中有陽光, 間中有微雨

4-6/Oct - 黃小二生涯第10-12日, 日常生活已經好規律化, 我亦可以輕鬆處理好日常家務, 我開始運用一d密碼, 令朗豬可以欣然地讓我完成家務, 依家已經唔再需要打手板, 都可以令佢聽聽話話喇...heeheee

7/Oct - 黃小二生涯第13日, 今日同奶奶一家去拜山, 早上約埋一齊去飲茶, 繼而拜山, 隨後到老三嘅新居玩下, 朗豬今日都好乖, 大家都讚佢大個仔, 識講好多野喇。

8/Oct - 黃小二生涯第14日, 今日約咗班同事食lunch, 兼帶埋朗豬去威下, 同事們見到朗豬都讚不絕口, 話佢識講好多野好叻仔, 做阿媽嘅聽到呢d讚美說話, 當然開心死啦~~~另外, 仲有一樣值得開心嘅, 係晚上我開始有覺瞓喇, 佢今晚只係吚吚哦哦咗兩三次, 就轉身自己再瞓番, 原來佢之前瞓得咁差, 係未習慣同我瞓呀, 終於都開始習慣喇.....ZzzZzzZzzzzz

黃小二生涯 - 中段嘮蘇編

2008年10月3日 (星期五) 天陰多雲, 間中有驟雨

踏入10月份, 天氣漸漸踏入秋季, 微涼的秋意, 總讓人有稍稍停下腳步來的味兒。

適逢今年嘅秋天, 係姐姐第一次放假回鄉的時間, 我一個人要打理一頭家, 買餸、煮飯、做家務、仲要湊仔.....仲要係整整17日忝bor, 我只得一雙手咋, 點做得到呀??? oh, it's impossible!!! >_<

事到如今, 唯有盡量正面d試下啦, 就當比自己一個考驗, 又可以嘗試下, 以另一個身份/角度去過生活, 用咁嘅諗法...心情即刻好小小~~

25/Sept - 今朝一早7am姐姐就出發, 黃小二正式接棒, 今日同平時姐姐星期日放假咁差不多, 最大分別/考驗係晚上, 要同朗豬一齊瞓, 好在....朗豬都肯同我瞓無扭計, 只不過成晚轉來轉去, 又瞓醒好多好多次, 攪到我無乜點瞓就要起身喇。

26-29/Sept - 黃小二生涯第2-5日, 一家三口一齊去三亞旅行, 竟然係意想不到咁開心和順利, 真係開心呀!!!

30/Sept - 1/Oct 黃小二生涯第6-7日, 呢2日大頭都放假, 我地一日喺屋企執下野, 一日同朗豬去下街, 我開始覺得自己嘅EQ唔掂喇, 我原本對自己嘅耐性, 係最有信心嘅一環, 點知....原來最先出事係呢飯喎, 我開始覺得自己好忟憎, 感覺好似好失控好無乎, 時時比朗豬攪到我進退失據, 下下要郁手打手扳先stop到佢, 點算好呢??!! 要諗下計仔先得。

2/Oct - 黃小二生涯第8日, 今日係真真正正一個人面對呢頭家/朗豬, 原來, 一個人湊仔比兩公婆湊仔較易於掌握架, 首先, 我調教一下自己嘅節奏, 刪除返工時嘅效率觀念, 再放輕鬆一下心情&步伐, 果然唔同ddd, 我無咁忟憎時、朗豬又合作咗, 我開始摸索到家庭主婦嘅心得, 有番小小成功感呀!!!

3/Oct - 黃小二生涯第9日, 今日同朗豬返健康院進行2歲半檢查, 結果一切正常, 今次全部合格, yeah....到4歲先再返健康院lu。黃小二生涯剛剛去到一半, 我覺得開始漸入佳景喇, 不過, 真係好疲倦呀, 晚晚無覺好瞓, 又完全無晒私人時間/私人空間, 連去廁所辦事/沖涼/梳洗, 都要以開放式草草完事, 好倦呀...help!!!!
體重 : 16kg(35lb)
腳板 : 16cm

中秋撈魚夜

2008年9月13日 天晴炎熱, 中秋迎月之夜

今日我地一家四日去葵芳食晚飯, 飯後喺商場行一陣&嘆下冷氣, 朗豬好快就比一檔撈魚仔檔吸引住, 檔入面一共有四個吹氣水池仔, 每個水池仔入面都有好多金魚仔游來游去, 價錢係每個魚網$20玩20分鐘。
中秋撈魚夜之一, 去片 >>>


想知道我地撈到幾多條魚仔, 睇埋下面啦!
中秋撈魚夜之二, 去片 >>>

d魚仔全部都係姐姐撈到架, 係咪好犀利哩!!!!!

可惜, 果d魚仔係唔可以帶走架, 但會有一份玩具仔送, 雖然果d只係10元8塊嘅平玩具, 但朗豬有得玩又有玩具攞走, 已經好開心又好滿足lu....

再玩ELMO

2008年8月31日 (星期日) 陽光熾熱

朗豬依家好多口, 我地講乜, 佢就跟住講乜, 有時我同大頭傾計, 佢會無端端搭咀, 又不時自問自答, 悶悶地時又會唱下歌仔自娛。

我發覺朗豬對聲音好敏感, 時常會不自覺地, 自己哼唱一d新嘅音樂旋律, 又會對一d特別聲響好有興趣, 經常因為一d古怪聲音, 而笑得前仆後繼, 例如去某d商場廁所, 有電動抹手紙機器, 朗豬一聽到d機器轉出紙張嘅聲音, 就會覺得好有趣、好新奇, 繼而會學習模仿, 然後哈哈大笑、樂在其中、 一玩再玩, 甚至可以留喺廁所玩15分鐘都唔願走。

依家朗豬識講嘢識表達, 大家嘅溝通就變得好互動, 同佢傾計&玩遊戲又好有交流, 佢嘅學習能力&模仿力好強, 呢頭做過嘅動作, 轉頭佢就學得似模似樣, 因此, 爆笑場面不時出現。但有時, 亦另我地覺得好頭痕, 因為佢識得要求、識得爭取, 下下要講交換條件, 少d耐性&心機都唔掂。

呢日朗豬又攞個Elmo玩具出黎玩, 我諗住等佢玩到入晒神之際, 黎個靜靜雞偷拍, 點知一拍就比佢發現咗, 唯有光明正大繼續拍啦, 好在佢都比我拍一陣, 可惜只係分咗心, 唔能夠比大家見到佢嘅食力。再玩Elmo玩具, 去片 >>>

朗朗豬與黑芝麻

2008年7月13日 (星期日) 天陰多雲, 間中有驟雨
今日係May姨沙田寶寶店的喬遷之日, 今朝起身見天色陰陰地但無落雨, 間中仲有少少陽光, 從厚實的雲層中透視出來, 可惜大頭今日有外快job, 唔能夠一齊去沙田新店贈慶。直至10:00am天氣都唔太差, 大鼻決定同朗朗豬起程去沙田, 恭賀寶寶店開張之喜。


哇....呢度好多嘢玩又好多嘢食呀!!! 朗朗豬四圍跑跑跳跳, 有好多表舅父&表姨姨同佢玩, May姨婆仲讚朗豬有手尾好乖仔忝bor! 又玩又食咁渡過咗一個好開心嘅下午之後, 大慨3:30pm我地就回程lu。

當返到屋企樓下時, 我地見到有個大哥哥, 同隻黑蚊蚊嘅狗仔玩掟波仔, 朗豬好似同佢地好熟絡, 自自然然行去join埋一齊玩, 佢同隻狗仔似乎好friend咁, 又摸下、又錫下、仲有握手忝, 隻狗仔好叻、好乖又好純, 佢擁有一身軟棉棉嘅黑色鬈髦, 聽主人講, 原來佢叫做"芝麻"呀, 朗朗豬同芝麻玩咗半粒鐘, 先至依依不捨咁返屋企, 臨走時仲大大聲聲咁講 "巴拜...施麻"

朗朗豬與黑芝麻, 去片 >>>

自學夾喼舞

2008年7月8日(星期二) 下雨天, 烏雲密佈, 間中有橫風橫雨

今年夏天真係好多雨水呀, 7月頭只係出現咗2日太陽天, 又變番日日落雨luu....

依家每晚8:00至9:30都係朗豬嘅睇碟時段, 佢不嬲都鐘意睇d兒歌碟, 而近期最鐘意睇嘅係Barney, 每次都講要睇Barney, Baby Bob, BJ咁, 我漸漸發覺朗豬從Barney碟中, 學識咗好多生字、歌仔同常識, 近排仲學埋跳土風舞忝, 但朗豬已經對影相機有認識又好敏銳, 佢唔會好似以前咁任我影喇, 所以, 依家要同佢影相/拍video真係好有難度, 呢晚佢睇睇下碟又起舞喇, 我真係好想拍底佢嘅有趣舞姿呀......一於從後偷拍!!

朗豬自學夾喼舞, Ac....tion >>>>

小宇宙大躍進

2008年6月30日(星期一) 天陰多雲有驟雨

根據大鼻非正式統計, 今個月整整30日裡面, 只有3日見到太陽伯伯, 其餘的大部份日子都落住傾盆大雨, 所以, 朗朗豬已經好多日都無得出街街, 無得去公園玩又無得踏單車仔。而直至上星期日, 朗朗豬嘅說話表達能力, 仍然維持喺兩、三個字嘅詞語之間, 大鼻真係估唔到喺呢個6月份裡面, 朗朗豬除咗高度大躍進之外, 原來佢嘅小宇宙亦黎一個大躍進呀。

事情係由一個風和日麗嘅6月24日(星期二)清早開始, 當日一起身, 就見到久違嘅太陽伯伯高高掛, 精神為之一震嘅我就立即起身梳洗, 之後如常去朗豬房間莊下佢, 點知當我一望入房, 就同朗朗豬對矇豬眼四目交投, 跟住佢就用甜到漏嘅笑容黎迎接我, 之後就講 : "起親....色風事", 與此同時, 仲坐起身望向窗口, 就隨即同我講 : "有太陽...去公園...挽單車", 佢無端端比驚喜我不特止, 講完仲隨即撲入我度要抱抱, 仲一路攬住我條頸一路話 : "同媽媽去"。哇....叫我點頂呀, 一個風和日麗嘅清早, 加一個甜到漏嘅笑容, 加一句無心快語, 再加一個情深抱抱, 大鼻即刻冧到暈晒, 成日都迷迷糊糊中....^_^

估唔到嘅驚喜陸續有黎, 話說6月25日(星期三)晚上, 三個黃用膳完畢一齊睇電視, 到廣告時段, 電視機播左一個"麥噹噹"廣告, 朗朗豬就手指指電視講 : "蜜..多盧", 之後, 睇到廣告尾聲嘅時候, 突然又講 : "蜜多盧...包包...好味d"。我同大頭又失驚無神比佢嚇親呀, 朗朗豬只係食過麥噹噹魚柳包一次咋, 就連"好味d"都識得講, 麥記嘅威力真係大呀!!!!

到6月29日(星期日)工人姐姐放假, 當日早上, 大鼻單拖湊住朗朗豬, 同佢一齊玩遊戲&玩具, 其間朗朗豬又有驚喜&驚訝比我勒, 原來佢唔聲唔聲咁, 已經學識好認真咁玩有多玩具, 真係估佢唔到呀。就好似以下嘅片斷, 朗朗豬自己玩ELMO玩具咁, 佢就識得自己襟"Let's Play"黎估發音字母、估生字, 最可惜係拍唔到, 佢全神貫注又完整d嘅版本啦, 我只可以偷偷地拍到廿幾秒咋, anyway, 都好過無啦......玩Elmo玩具, 去片 >>>

一問一答事件簿

2008年6月22日 (星期日) 大紅太陽高高掛, 第一個酷熱天氣警告, 正式為炎夏揭開序幕

今日係朗朗豬2歲零2個月大, 一早瞓醒啱啱記得又係時候要度下高, 於是就坐言起行, 即刻攞把間尺出黎度下先, 哇下……朗朗豬今個月高咗2cm呀, 平時每個月都係高1cm左右, 至勁果兩次都係高1.5cm架咋, 但今個月澎澎聲高double喎, 依家已經有94.5cm高, 腳板仔16cm長, 由於屋企無磅所以唔知佢重咗幾多, 但原本著開嘅加大碼片褲已經好逼迫feel, 我諗用埋屋企嘅存貨, 就要轉用加加大碼嘅片褲先得喇, 希望朗豬快d戒甩片片, 唔係遲d無片褲啱著就閉喇。

朗朗豬依家好多嘢講, 每次我地同佢講乜都好, 佢都會即刻跟住口水尾講, 最攪笑係佢以好論論盡盡又發音唔正嘅聲線, 配以一個事事認真、努力以赴嘅傻氣模樣黎講, 時常都令到我地啼笑皆非。

自從朗豬識講嘢, 大頭爸爸時時都會整估下佢, 又出其不意咁比d唔同嘅難題佢, 令佢嘅小腦袋加速運轉, 初時朗豬遇到唔識回答嘅嘢, 多數笑而不語又或者顧左右而言他就算, 經過一、兩個星期倒, 朗朗豬就開始嘗試回答爸爸嘅問題, 但當爸爸一轉個方式黎問佢, 佢就即刻硬晒呔又投降舉白旗, 直至最近, 佢地兩仔爺嘅一問一答, 至可以節錄到"一問一答事件簿"。

案件重溫一 : 有一日爸爸放工, 剛踏入屋企
朗豬說 : 爸爸, 開風扇 (朗豬手指指, 剛在轉下轉下的風扇)
爸爸說 : 哦, 開咗風扇呀, 點解開咗風扇架?
朗豬答 : 好熱!! (以大大聲又堅定嘅語氣說出)
我同大頭聽到都好驚訝, 佢居然諗都唔洗諗, 就知道好熱就要開風扇, 勁呀!!

案件重溫二 : 有一個晚上, 爸爸同朗朗豬一齊睇Teletubbies VCD, 話說其中有一幕, 公園突然吹大風, 於是Teletubbies全部掉頭走晒。
朗豬說 : 噢..dadadede走晒 (眼望爸爸, 手指指電視)
爸爸問 : dadadede走晒去邊度呀, 係咪走晒返屋企覺覺豬?
朗豬答 : me埋!! (又係大大聲又堅定咁講)
哇..今次又答得有sense喎, VCD嘅內容係無交代Teletubbies走晒去邊, 只係話佢地全部走晒, 我估朗朗豬可能自己代入咗角色, 先答得咁爽呀!
p.s. 由一開始朗朗豬就叫Teletubbies做dadadede, 直到依家都改唔番正。

其實, 簡單嘅對答仲有好多, 但呢兩個案件重溫係比較有代表性, 因為, 呢兩次嘅對答內容, 都係朗朗豬自己作主嘅搶答, 而唔係重覆媽媽或者姐姐嘅說話呀。

一首獨唱的歌

2008年6月10日(星期二) 天晴, 有微風

上回講到, 朗朗豬滿咗2歲都唔肯點講嘢, 喺健康院做成長監察時, 就肥佬咗講嘢呢part, 攪到要2歲半時, 再返健康院跟進監察, 當我將呢件事擺咗上blog之後無幾耐, 朗朗豬就突然開撓喇, 到5月中時更加撻着咗turbo咁, 成日口不停咁好多嘢講, d經驗媽媽講得啱, 唔講由自何, 一講就唔停口。當然, 佢嘅發音仲未係好準確/清晰, 時時都要我地估餐死, 先知道佢講乜嘢。

除咗講嘢, 朗朗豬仲時不時會吚吚唷唷, 又會唸唸有詞咁, 無論我點留心聽, 都聽唔明佢講乜嘢, 真係抓晒頭又百思不得其解。後來有一次我發現到, 佢好似係哼d歌仔嘅音咁喎, 於是我就嘗試帶領佢一齊唱歌仔, 先可以解開呢個迷咋, 雖然佢依家只係跟到三、幾個音, 又唱唔到完整一句歌詞, 但佢都好enjoy同媽媽一齊唱歌仔。

同媽媽一齊唱歌仔, 睇片 >>>>


幾日之後嘅6月10號晚上, 大家食飽飽晚飯, 大頭去沖涼、姐姐去洗碗, 朗朗豬就坐喺自己張私家櫈度碌大巴士, 之後手指指佢面前一張櫈, 同我講 : "麻嗎....左....衣道", 於是我就面對住佢坐低, 之後, 朗朗豬無端端失驚無神, 喺我絲毫無心理準備之下, 完完整整咁唱咗一支歌仔比我聽, 我當時真係好驚訝/好開心呀, 係第一次獨唱而且我係佢第一個聽眾黎呀...heheee, 雖然咬字發音未係好掂, 但韻律拍子同高底音調都算合格, 呢個咁有意義嘅日子, 一定要mark住佢, 好在呢首歌仔佢唱完又唱, 我先可以拍底佢同大家share下。

一首獨唱的歌, 去片 >>>>