科技改變生活

2012年8月7日 (星期二) 晴天

自從i-phone 4由2010年7月出現之後, 我的日常生活便漸漸地起了變化, 首先身邊的朋友和同事開始轉用i-phone, 而且仲超讚i-phone的流暢和速度快, 接著在車上和食店逐漸見到很多人, 會拿著i-phone, i-pad在篤篤篤。

我當時就諗, 點解咁多嘢篤架, 搭車食飯都不停咁篤, 於是我亦抵受不住誘惑, 想換新手機, 但又怕自己會唔會識用呢? 我未用智能手機和PDA手機架！

最後我在2011年3月換了一部Samsung Galaxy Mini S5570


雖然機仔細細, 但已經令我迷上使用智能手機了。 用咗呢部細細嘅智能手機之後, 我就漸漸覺得呢部機太細、太入門、唔夠快、唔夠RAM, 部機仲好快就shot shot地忝！

近龍年的農曆新年前, 即2012年1月尾, 我又換了一部新的手機 Samsung Galaxy SII I9100

用咗呢部手機之後, 我都變成"篤篤篤"一族喇! 一部小小嘅手機喺手, 已經可以影相、拍短片、上網、check email、記事、睇電影、睇書、聽歌、玩game、收即時資訊、同朋友即時分享相片和短片, 實在太精彩喇!!

從此, 手機基乎可以取代家中的桌上電腦了, 從前回家便開電腦的習慣, 已經不復存在, 手機已經變成潮流、科技、資訊、分享、娛樂的隨身物件, 身邊無咗佢, 就會周身唔舒服兼唔聚財。

現在每人的生活和工作模式, 都或多或少跟科技離不開關係了, 我深信第三次世界大戰必定跟科技和網絡拉上關係。

好嘢好嘢.....拍拍手....

2012年8月5日 (星期日) 天晴

尋日大鼻帶孖寶兄弟去剪頭髮, 剪頭髮時細佬同上次(第一次)一樣, 好叻叻、無喊、只係有少少唔自然, 剪完頭髮之後, 變咗一個大頭仔, 超可愛!!

當天下午仲約咗婆婆, 姨媽, 舅父, 表姐一齊飲茶茶, 期間比大家見到細佬豬"胃食"嘅一面, 當大家有嘢食, 佢又要食包包, 如果無得食, 就會大聲叫mum mum...mum mum...要攞野食, 有得食就即刻笑得甜絲絲咁, 真係比佢笑屎!!

細佬豬早兩日已經開始學拍手, 今日就特別留意到, 原來佢一聽到人話"好嘢", 就即刻會笑晒口又拍晒手, 好鬼興奮。

放暑假喇喂.....

2012年7月

7月7日 - 朗朗幼稚園畢業了, 我們分別參加了保良局聯校畢業典禮, 及幼稚園舉辦的畢業典禮, 參加完兩個畢業典禮後, 朗朗並正式告別三年的幼稚園生涯, 開始放暑假了。

7月13日 - 細佬仔依家成日推住櫈仔周圍行, 雖然唔係行得好隱陣, 但起碼想去邊都得, 推櫈仔加上爬爬就可以去周圍去攪攪震, 四圍去八掛都得喇!!

今個月係大鼻嘅生日, 本來好想攬實兩個仔, 一齊影返張左擁右抱相, 可惜哥哥正在發皮氣扭計中唔肯影相, 於是我只好攬住醒醒目目嘅細佬仔影張靚相留念。

7月21日 - 今日係朗朗期待已久嘅暑期活動 : 參加天文台, 在烈日下到室外地方參觀, 真係好很辛苦好曬好熱, 但看見朗朗開心滿足的笑容, 就乜都抵番晒啦!

7月26日 - 細佬豬開始行行喇!! 看牛牛日子正式來臨。

7月29日 - 兩兄弟在家嘻戲, 是最平常的生活鎖碎事, 亦是大鼻最開心最滿足的時刻, 每當大鼻看見孖寶兄弟玩埋一堆嘅時侯, 就特別覺得開心和溫馨, 或者呢D就係媽媽的執著。

夏天到了

2012年6月

6月3日(星期日) 今日天氣好好.....好熱呀! 一家大細去嫲嫲屋企游水, 亦係細佬佬第一次落水, 原來細佬好大膽架, 一D都唔驚, 仲會咀郁郁想飲水, 於是我地比個咀咀佢食住, 以防佢飲泳池水。最開心嘅係哥哥, 佢恨住好耐想我地一家四口一齊去游水架喇, 今次真係願望成真了!

6月9日 - 細佬仔依家學爬又學企, 一比佢落地, 佢就會周圍去玩周圍去攪攪震, 不過始終未企得隱陣又未爬得好, 但勝在夠膽識, 跌咗又黎過。

6月24日 - 細佬仔好有音樂感架, 聽到兒歌就起頭fig fig手擰擰, 好得意好攪笑!! 相差半個月已經進步好多, 爬得又快又隱陣。

孖寶兄弟來了!!

2012年5月

5月初 - 細佬佬八個半月大, 已經坐得好隱定, 仲開始嘰嘰喳喳學講野。

5月中 - 細佬九個月大, 識得爬爬喇!

哥哥漸漸學會照顧細佬, 亦開始識得錫細佬, 對細佬總有一份心思, 見細佬開心佢就更開心, 見細佬笑佢就笑得更大聲, 越來越有哥哥風範了。

生日蛋糕孖住上

2012年4月

4月7日 - 是爸爸生日, 今日買咗一個Angry Bird蛋糕, 唔單只係蛋糕靚, 原來個盒都襯埋一套架, 雖然個蛋糕細細隻, 不過味道真係好好。今次係細佬豬第一次同我地切蛋糕, 原來細佬豬好胃食架, 我地個個有得食, 佢無得食就扭計計。

4月22日 - 今日係朗朗嘅六歲生日, 佢一見到呢個大嘅Angry Bird蛋糕就好興奮喇, 而且仲有嫲嫲, 伯父, 伯娘, 三叔, 三嬸, 五叔, 五嬸一齊黎同佢慶祝, 我地仲第一次同浩然細佬見面忝, 真係好開心又好熱鬧呀!!! 

12年4月25日 - 細佬佬體重 8.375kg, 身高 69.1cm

兩兄弟的情誼

2012年3月11日 (星期日)

今朝一早就比哥哥嘈醒, 嚷著要睇電視, 要睇J2台IQ博士, 當節目快要開始時, 哥哥更提議要同細佬一齊睇, 於是立即同佢地影張靚相先。原來兄弟之間的情誼, 已經在不知不覺間滋長了。

開始唱歌喇, 兩兄弟睇得好入神, 而且不約而同地攞起隻手, 似唔似孖寶兄弟呢, 嘻嘻...... 

唱完主題歌, 細佬開始睇唔明佢講乜東東, 於是就攪哥哥, 要同哥哥玩喇。難得嘅係, 哥哥無嬲仲好開心忝, 兩兄弟越來越大小不良feel呀!!!!

細佬豬要開餐喇, 每次一放佢落呢張餐櫈度, 佢就知道有粥粥食, 就即刻開心晒醒目晒!!!

除咗開餐食粥粥, 佢仲鐘意食扶手, 每次都食到欲罷不能, 食到變咗M字咀, 好攪笑 :P

12年3月21日 朗朗身高 122cm, 體重 33.3kg

細佬佬, 左扭扭, 右扭扭

2012年2月份

2月5日 (星期六)

多聲多氣的細佬仔, 依家會周不時自己喺張床仔度左扭扭右扭扭, 遇上比床圍頂住, 仲會好肉緊大聲呱呱嘈, 皆因佢想轉身但未轉得成, 於是就經常會忟憎大叫.

2月23日(星期四)

今晚我終於都親眼目睹細佬轉身成功了, 仲識得自己攞番隻手仔出黎忝, 不過唔係每次都成功架, 當佢抽唔到隻手仔出黎果陣時, 都係會出絶招大聲呱呱嘈叫人幫手^_^ 

2月26日 (星期日)

自從細佬識得笑又識得比反應哥哥之後, 哥哥就好歡喜同細佬玩, 哥哥經常會諗盡辦法, 並且發出一古靈精怪嘅聲音引細佬笑.

11年12月14日 - 細佬佬體重 6.135kg, 身高 58.8cm
12年2月29日 - 細佬佬體重 7.95kg, 身高 64.4cm

細佬四個半月大

2012年1月3日 (星期二) 天晴, 乾燥微寒

細佬4個半月大喇, 依家成日咿咿呀呀, 好鐘意人同佢傾計, 又好鐘意人同佢玩, 特別鐘意聽哥哥唱歌, 又鐘意睇哥哥玩皮球, 如果無人同佢玩, 佢就鐘意自己啜下又玩下個奶咀咀。

細佬佬暫時只轉得半個身, 未識得轉晒成個身, 體能方面明顯比哥哥差, 但語言方面, 似乎比哥哥強, 依家成日好多野講, 如果無人理佢仲會嘰嘰喳喳咁鬧人忝!!

朗朗做咗哥哥之後, 他各方面都在正面地進步, 由於佢好錫細佬, 所以佢依家會學習 : 接受和諒解, 顧慮別人的需要和感受, 主動幫助人, 怎樣愛錫關懷別人, 怎樣表達......等等, 呢d都係意外收鑊, 想唔到多了一個細佬之後, 我們一家人的心靈, 都被徹底地俘虜了, 估唔到一個"塞豆窿"的震撼力和威力, 足可比美航空母艦。

2012年 - 新年快樂

2012年1月1日 (星期日) 天晴微寒

今天是2012年的元旦日, 也是大哥和大嫂的結婚之日, 我們一家四黃, 個個扮靚靚, 高高興興地去參加他倆的婚宴, 你地睇下哥哥同細佬, 夠唔夠醒目靚仔先?!?!?!

講到靚, 紿終都係主人家至靚至登對。

2012年的來臨, 除了帶來歡欣和希望之外, 亦令好多人有一個疑惑, 究竟世界末日是否真的到臨呢???? .....根據瑪雅曆法，地球已歷經四個太陽紀，而每一紀結束之時，均會發生全球性的大災難。我們現正處於第五太陽紀的末期，瑪雅曆法預言第五太陽紀將於2012年12月21日前後結束。

我唔知道世界末日是否真的在今年發生, 我只知道, 如果是真的話, 我們更應該珍惜現在的一切, 珍惜每一個晨曦暮至, 珍惜與家人至愛相處的分分秘秘, 珍惜對至親的孝心關懷, 即使世界末日到了, 在最後的時段也絶不枉過。

青衣城表演

2011年12月10日 (星期六) 天氣寒冷, 晴天

朗朗從K2暑假開始, 便參加了幼稚園開辦的課外活動-節奏班, 經過半年的學習, 今次是第一次代表學校到青衣城作公開表演。

其實我也是第一次看朗朗的節奏樂表演, 看見一羣天真爛漫的小朋友, 充滿童真的歌聲, 唱出傳統的聖誕樂曲, 加上有趣的作動和做形, 真係好可愛!!!

PART I - 世界真細小

PART II - 歡樂頌和叮叮叮

黃府百日宴

2011年11月26日 (星期六) 天晴 漸入深秋

今日細路豬100日大, 晚上在葵芳名門讌客宴請各方親戚朋友, 當晚細路好醒目好醒神, 可以同各親戚朋友見到好多靚相。

當晚最興奮嘅係朗朗, 佢穿梭於各親朋之間, 四圍同人影相, 又同表姐玩, 又同堂哥玩。

細佬二個月大

2011年10月27日 (星期四) 天晴

朗朗自從做了哥哥之後, 便好像一下子成長了, 他開始關心別人和學習照顧細佬。他每天起床和放學回家的第一件事, 便是向我和姐姐査問細佬有沒有乖、有沒有扭計、食多少奶、有沒有疴臭臭....等等, 然後便是一副大人口吻, 讚賞或教訓細佬一片, 讓我們聽了覺得又好氣又好笑!!!

朗朗已經為細佬改了兩個花名, 第一個係豬仔包, 第二個係egg ao豬。

首先朗朗叫細佬做豬仔包, 係因為佢似豬仔又似包包咁好得意, 所以就叫做豬仔包。

跟住細佬成日食奶後都打c egg, 朗朗覺得佢打c egg好得意, 於是又改多個花名, 叫做egg ao豬。

近日細佬開始學食手指, 仲食到啜啜聲好肉緊忝。

茽褀偷偷食手指

連環甩牙週

2011年10月5日 (星期三) 天晴 漸有秋意, 天氣微涼

朗朗未夠5歲便開始甩牙仔(乳齒), 以下是他的甩牙紀錄 :

2月19日 - 甩第一隻牙 (下排右門牙)

5月1日 - 甩第二隻牙 (下排左門牙)

9月13日 - 甩第三隻牙 (下排門牙旁右邊)

10月1日 - 甩第四隻牙 (下排門牙旁左邊)

10月2日 - 甩第五隻牙 (上排右門牙)

10月5日 - 甩第六隻牙 (上排左門牙)

短短一個月內, 朗朗便甩掉4隻牙仔, 好在佢之前甩掉的兩隻下排門牙已經出了恆齒, 否則就食唔到野喇, 依家朗朗個甩牙樣好得意又好攪笑, 原本想同佢影多幾張甩牙相留念, 點知佢怕羞唔肯影, 今日我叫佢扮怪獸樣拍video, 終於都成功影底佢嘅甩牙攪笑樣了。

飛越十級痛

2011年8月19日(星期五) 晴天

今天是懷孕39週零1天, 白天我如常上班, 旁晚如常放工回家吃飯, 晚上如常在11點左右上床休息, 當我瞓到半夜轉身時, 發現下面好似濕濕地, 有d奇怪, 唔通我賴尿?!?!?! 於是我慢慢的爬起身, 慢慢的行到厠所, 點知我一行仲賴得多d又快d, 呢個時侯我肯定自己唔係賴尿, 係穿水呀, 於是我立即返房拍醒大頭, 然後攞衫褲去沖個涼, 沖完涼出黎, 大頭已經好醒目咁煮住個杯麺面比我食, 之後我地寫底一張字條比姐姐, 便攞埋走佬袋出發到醫院去了。

凌晨4點, 我獨自待在產房, 等待著小生命的誔生, 等待被疼痛的吞噬, 小痛、中痛、大痛、勁痛、狂痛、及至最後的推壓撕裂之痛, 我終於嘗到了十級痛, 但我實在痛得太耐太倦了, 實在沒有足夠氣力把bb推出來, 夜上11點多, 在醫生的吸盤協助下, bb終於成功出來了!!! 我這時亦已筋疲力竭, 軟倒在床, 但我的神志是清醒的, 我當時唯一最想最想要的是......喝水, 我個口真係好乾好乾呀, 好想飲d水呀!!!!

第一眼望bb, 同樣覺得他很標誌, 他乖乖的安靜的睡著, 姑娘告訴我, 他有3.34kg, 比哥哥還重一點呢, 望著細佬我只感到如釋重負, 只感到滿足, 畢竟是第二胎了, 已經沒有了從前的激動。

第二天大清早, 我們接到了一些壞消息, 說細佬的身體上出現了一些問題, 需要專科醫生的跟進和治療, 當時我和大頭的心, 就像突然被澆一大盆冷水, 暖烘烘的心即時涼了下來.......當時我們唯一可以做的便是祈求和信任, 我們相信上天送給我們一個小生命, 自有衪的安排與使命。

雖然經歷較為艱難和曲折, 但最終細佬也總算平安回家了。有時候, 事情發展亦往往是出人意表的, 越過肉體和心靈上的十級考驗之後, 我們都變得更堅強更珍惜, 而我們的心亦變得比以前更緊密更堅固了, 家裡多了一個新成員之後, 我們便變成四個黃了, 從此我們的家亦更熱鬧更溫暖了。

第一份生日禮物

2011年7月20日 (星期三) 陰天多雲, 間中有驟雨

今日如常跟大頭一起放工返屋企, 一入屋便看見朗朗正在自己的房間, 探頭出來神神秘秘又鬼鬼馬馬的張望著我和爸爸。當我地入屋關好門後, 朗朗便從房間跑出來, 手拿一張紙大聲叫嚷著Surprise....happy birthday to mummy!!!!! 然後給我一個大熊抱, 呢一刻真係甜到入心呀~~~

之後朗朗便把那張皺皺的紙張送給我, 並說"媽咪, 送比你, 生日快樂"
大鼻立即讚賞朗朗d字都寫得幾靚喎! 朗朗則指著圖畫說, 左面是媽咪, 右面是爸爸, 黃色是朗朗, 籃色是媽咪肚入面的細路, 哇....連細路都畫埋出黎同媽咪慶祝生日, 真係好有心思呀, 而且每一個人都是笑容滿面的, 真係好驚喜好靚呀!!! 大鼻一定要把這朗朗給我的第一份生日禮物好好保存, 將來慢慢拿出來細味。


第二份禮物係大頭砲制的神秘蛋糕, 大頭在車站接我回家時, 並沒有拿著任何東西的, 但當我地返左屋企, 放好袋兼沖完涼之後, 朗朗便立即爆響口說 : "媽咪, 爸爸話唔好話比你知, 有個蛋糕喺雪櫃度呀"。

剛才朗朗送生日禮物比我時, 大頭還假裝說 : "下....乜今日係媽咪生日呀, 我都唔記得左忝", 點知轉頭便被朗朗踢穿了, 朗朗當時嘅表情好攪笑, 我真係覺得好開心, 因為大頭仲會花小小心思氹我開心, 佢地兩父子都令我覺得好心甜, 雖然無乜特別嘅活動慶祝, 但一個簡簡單單而又窩心的晚上, 夫復何求。

活躍好動的老二

2011年7月13日 (星期三) 天陰多雲, 間中有大雨

老二已接近34週, 還有一個半月便是預產期了。剛剛今天到醫院做產前檢查, 醫生說老二已經轉了正確位置, 現在是腳上頭下了, 之前咁多次的產檢, 老二都是打橫睡在我的肚腩上, 現在剛好在最後限期前轉正了方向, 這樣的話, 醫生就不會硬性要求大鼻開刀了。

轉正位置的老二, 比之前更活躍, 手仔和腳仔都勁度十足, 看著我的肚子便明顯地覺得他正一天一天地快速成長著, 醫生說他的大小和重量都屬正常, 老二現在大慨4磅多點, 我的體重就增加了11磅, 而我的肚圍已變成44吋了....好勁呀!!!!!

最近我和大頭都為老二的名字而傷腦筋, 要字形好、順耳好聽、有意思而又不太平凡, 當中是有一定的難度, 但一想到這是我們送給BB的第一份禮物, 便覺得絕不能馬虎, 費盡心機也是值得的。

大棠荔枝園

2011年6月12日 (星期日) 早上密雲有兩, 下午放晴

今日一早起來, 見到外面落住雨, 原來有黃色暴雨警告, 仲有雷部警告忝呀, 唉....我地今日參加咗一個本地一天遊, 去元朗大棠荔枝山莊, 點算好呢!!??!!??

唔理咁多住, 我地照原定計劃, 早起擦牙、洗面、換衫, 再望下天, 雖然仲係落住雨, 但天上面已經無乜黑雲, 於是我地照樣出發去也。

早上10點多, 已經乘搭旅遊巴士到達目的地了, 起初仲落住細雨, 仍要擔遮, 我地喺荔枝園慢慢行咗一圈, 發現山莊入面, 周圍都種滿不同嘅果樹, 有荔枝、香蕉、楊桃、柚子、大樹蘿菠、蓮霧....等等等等, 品種好多, 而且仲有好多好多隨手摘到嘅果實忝呀。

之後, 又見一幅綠草如茵嘅大平原, 如果好天氣, 喺呢度放風爭就最啱勒。沿住大草園嘅右手邊行, 就見到一個小沙圈, 係比人玩騎馬嘅, d馬好靚好乾淨呀。我地跟住d馬行, 就搵到一個馬房, 入面有十幾匹退役嘅馬喺度, 雖然d馬匹比較老, 但是身體狀況仲好好, 而且仲非常友善。

行到11點左右, 已經開始停雨喇, 我地行到去小動物園區, 朗朗已經急不及侍, 要喂小兔和小山羊食紅蘿蔔。餵完小動物食野, 我地都肚餓喇, 即刻去食BBQ先。


喺我地BBQ之際, 個天已經開始放晴, 食飽飽我地四周圍行下, 中間有一個好大嘅魚池, 朗朗又開開心心咁去餵金魚了。


之後, 我地見到一架牛車, 我同朗朗一齊坐牛車遊山莊一圈, 我地問牛夫, 知道隻牛叫做"黑牛", 雄性, 已經十幾歲, 佢好純又好大力, 仲好懂人性架, 牛夫叫佢點行佢都識得聽。我地係第一次坐牛車, 又咁近同咁大隻嘅牛牛影相, 朗朗真係覺得好新奇又好開心呀!!!!

坐完牛車, 朗朗同爸爸就去打千秋, 又玩咗一陣繩網, 時間就差不多lu.....

下午3點就要回程喇, 黎嘅時候由於仲落緊雨, 都無機會影張相, 走嘅時候一於補番張先。

老二24週了

2011年5月6日 (星期五) 天晴多雲有微風

今年的春天轉眼間便過了, 完全沒有回南天的困擾和悶焗不適, 言而清清爽爽的天氣卻提早到了, 對於我們來說, 清爽的天氣真是暢快和舒服, 但是, 在整體氣侯變化當中, 不知這又會唔會是一件好事呢!!

老二今天已經是24週(6個月)大了, 踏入5個月大開始, 大鼻便漸漸回復精神和體力, 妊娠不適也減輕了, 而且亦明顯地感覺到老二的郁動, 老二的活潑好動, 令大頭和大鼻的感覺都變得實在了和踏實了。醫生已經證實, 老二是個男孩子。不過老二沒有朗朗般大食, 所以到今天為止, 我只增加了6磅體重。

想起來不知是事有湊巧, 還是緣份的安排, 我們這個網頁的名字, 定為"大頭狗狗大鼻兔", 原本是我們一家三口的暱稱, 豈料今年真的會加入一隻小兔成為我們家的成員, 現在, 這個網頁的名稱已變得更加貼切、更加到題了。

朗朗五歲了

2011年4月22日 (星期五) 復活節假期的第一天

眨下眼, 朗朗今日五歲生日了。

由於大鼻早前比較疲倦, 又無精神, 已經好耐無update朗朗嘅近況呀!
身高 : 116.5cm
體重 : 28.2kg (62lb)
2月19日甩第一隻牙仔 (下右門牙)
5月1日甩第二隻牙仔 (下左門牙)

五歲的朗朗已經開始學習和掌握自理, 現在已經可以自己穿脫鞋襪, 然後放進洗衣籃中, 自己穿脫校服, 然後掛好在衣架上, 自己沖涼、洗頭, 然後自己穿好衣服, 自己早晚擦牙、洗面, 然後掛好面巾, 當然有時會需要大人的提示及指點, 但基本上已經能夠全部自己完成了。

5歲需要學習的事情, 包括自己執拾書包及出街用背包, 準時起身返學, 自己摺被等等。

現在的朗朗, 最喜歡的戶外活動, 仍然是玩scooter, 不過他已經不是自己一個人自己玩, 而是和其他小朋友一起玩, 他懂得和別人分享喜愛的玩具, 也學會和其他一起玩遊戲, 真是一大進步。

至於室內活動, 朗朗最喜歡的是睇書(其實是媽咪讀書比佢聽)、寫字和睇DVD。每當朗朗見媽咪在家又有空閒的時候, 朗朗便會拿著一本書, 叫媽咪同佢一齊睇書, 佢經常都要媽咪讀書比佢聽, 然後佢就問各種不同嘅問題, 經常問"點解呀?", 已經成為朗朗嘅口頭蟬。

對於朗朗來說, 將要成為哥哥是一件開心的事, 但不知道將來老二出世之後, 他是否真的不會呷醋哩!